ရူဘီယာလက်စ်အရှုပ်အထွေး ပေါ်ပေါက်လာပြီးနောက် လိင်အကြမ်းဖက်မှုနှင့်ပတ်သက်သည့် ဥပဒေကြမ်းကို စပိန်ဘောလုံးအဖွဲ့ချုပ် စတင်အသက်သွင်

စပိန်ဘောလုံးအဖွဲ့ချုပ်(RFEF)သည် ဥက္ကဋ္ဌ ရူဘီယာလက်စ်က အမျိုးသမီးကမ္ဘာ့ဖလားပြိုင်ပွဲ ဆုချီးမြှင့်ပွဲအခမ်းအနားတွင် တိုက်စစ်မှူး ဟာမိုဆို၏နှုတ်ခမ်းကို နမ်းခဲ့ခြင်းနှင့်ပတ်သက်သည့် အရှုပ်အထွေး ပေါ်ပေါက်လာခဲ့ပြီးနောက် လိင်အကြမ်းဖက်မှုနှင့် ပတ်သက်သည့်ဥပဒေကြမ်းကို စတင်အသက်သွင်းခဲ့ကြောင်း သိရှိရသည်။

၂၀၂၃ အမျိုးသမီးကမ္ဘာ့ဖလားပြိုင်ပွဲ ဗိုလ်လုပွဲတွင် စပိန်အသင်းက ယူရို-၂၀၂၂ ချန်ပီယံ အင်္ဂလန်အသင်းကို (၁-၀) ဂိုးဖြင့် အနိုင်ရပြီး သမိုင်းတစ်လျှောက် ကမ္ဘာ့ဖလားချန်ပီယံဆုကို ပထမဆုံးအကြိမ် ဆွတ်ခူးရယူနိုင်ခဲ့သည်။

ယင်းနောက် တစ်ဦးချင်းဆုများ ပေးအပ်ချီးမြှင့်နေစဉ် RFEF ဥက္ကဋ္ဌ ရူဘီယာလက်စ်က ဟာမိုဆိုကို ပွေ့ဖက်နှုတ်ဆက်၍ နှုတ်ခမ်းကို နမ်းခဲ့သောကြောင့် ဝေဖန်မှုများ ခံခဲ့ရပြီး ရာထူးမှနုတ်ထွက်ရန် တောင်းဆိုမှုများ ရှိခဲ့သည်။

ရူဘီယာလက်စ်သည် ဟာမိုဆိုအား တောင်းပန်မှုများ ပြုလုပ်ခဲ့သော်လည်း ၎င်း၏တောင်းပန်မှုများသည် မလုံလောက်ဆိုသည့် ဝေဖန်မှုများ ရှိသလို၊ သူ၏ ပြောဆိုမှုများမှာလည်း ပိုမိုဝေဖန်စရာဖြစ်ခဲ့သည်။

သူက ဟာမိုဆိုအား ခွင့်တောင်းခဲ့ပြီး၊ ဟာမိုဆိုက အိုကေဟု ဆိုသဖြင့် နမ်းခဲ့ခြင်းဖြစ်ကြောင်း ပြောကြားခဲ့ခြင်းကိုလည်း ဟာမိုဆိုက ငြင်းဆန်ခဲ့ပြီး သဘောတူခွင့်ပြုခြင်းမရှိသည့် လုပ်ရပ်အဖြစ် ပြန်လည်ဖြေရှင်းခဲ့သည်။

စပိန်ဘောလုံးအဖွဲ့ချုပ်ကိုယ်တိုင်က ရူဘီယာလက်စ်ဘက်မှ ရပ်တည်မှုကို အစောပိုင်းတွင် ပြသခဲ့ပြီး  ရူဘီယာလက်စ်ကို ရာထူးမှ မထုတ်ပယ်ပါက ဆက်မကစားဟု ဆန္ဒပြသည့် အမျိုးသမီးဘောလုံးသမားများကို တရားစွဲဆိုမည်ဟုပင် ခြိမ်းခြောက်ခဲ့သေးသည်။

ယခုအချိန်တွင် ဖီဖာကပါ အရေးယူမှု ပြုလုပ်ခဲ့ပြီးနောက် စပိန်ဘောလုံးအဖွဲ့ချုပ်သည် လိင်အကြမ်းဖက်မှု တားဆီးရေး ဥပဒေမူကြမ်းကို စတင်အသက်သွင်းမည်ဟု ကြေညာခဲ့ခြင်းလည်းဖြစ်သည်။

ဥပဒေမူကြမ်းစောင့်ရှောက်ရေး ကော်မတီဝင်တစ်ဦးဖြစ်သည့် မာရီယာဒိုလိုရက်စ်က ယင်းဥပဒေမူကြမ်းကို အသက်သွင်းနိုင်ခဲ့ခြင်းအတွက် ဝမ်းမြောက်မိကြောင်း ပြောကြားခဲ့ပြီး ”ကျွန်မတို့ရဲ့မူကြမ်းကို စတင်အသက်သွင်းလိုက်ပြီဖြစ်ပြီး ဒီဖြစ်ရပ်နဲ့

ပတ်သက်ပြီးလည်း အသေးစိတ် စုံစမ်းစစ်ဆေးမှုတွေ ပြုလုပ်သွားမှာပါ။ စုံစမ်းစစ်ဆေးနေချိန်အတွင်းမှာ ပါဝင်ပတ်သက်သူအားလုံးရဲ့ ကိုယ်ရေးကိုုယ်တာတွေအပေါ် လေးစားမှုရှိဖို့အတွက်တော့ တိုက်တွန်းလိုပါတယ်”ဟု စပိန် ဘောလုံးအဖွဲ့ချုပ်၏ ထုတ်ပြန်ချက်တွင် ပါရှိခဲ့သည်။

စပိန်ဘောလုံးအဖွဲ့ချုပ်သည် ယင်းဖြစ်ရပ်အတွက် အရေးပေါ်အစည်းအဝေးလည်း ပြုလုပ်ခဲ့ပြီး ကိုယ်တိုင်စုံစမ်းစစ်ဆေးမှုများ ပြုလုပ်မည်ဟု ကြေညာထားသည်။