စပါးအသင်းသည် ရီးယဲလ်မက်ဒရစ်အသင်းမှ အသင်း၏ကစားသမားဟောင်းဖြစ်သူ ဂါရတ်ဘေးလ်အား လာမည့်နွေရာသီအပြောင်းအရွှေ့တွင် အလွတ်ပြောင်းရွှေ့ကြေးဖြင့်ခေါ်ယူရန် မျက်စိကျနေကြောင်း စပိန်မီဒီယာများကဖော်ပြခဲ့သည်။
အသက် (၃၂)နှစ်အရွယ်ရှိ ဝေးလ်စ်လက်ရွေးစင်အသင်းခေါင်းဆောင် ဂါရတ်ဘေးလ်သည် လာမည့် ၂၀၂၂ နွေရာသီတွင် ရီးယဲလ်မက်ဒရစ်အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး ရီးယဲလ်အသင်းမှ စာချုပ်သစ်ချုပ်ဆိုရန် အစီအစဉ်မရှိသောကြောင့် လာမည့်ဇန်နဝါရီတွင် အလွတ်ပြောင်းရွှေ့ကြေးဖြင့်ထွက်ခွာရန် အကြိုဆွေးနွေးခွင့်ရှိမည်ဖြစ်သည်။
ဂါရတ်ဘေးလ်အား အလွတ်ပြောင်းရွှေ့ကြေးဖြင့်ခေါ်ယူလိုသည့် အသင်းများရှိသော်လည်း ဘေးလ်၏ လစာငွေများပြားမှုမှာ အဟန့်တစ်ခုဖြစ်နေပြီး စပါးအသင်းမှာမူ လစာငွေပမာဏကို ညှိနှိုင်းပေးချေရန်အသင့်ရှိနေကြောင်းသိရသည်။
ဘေးလ်သည် ကြံ့ခိုင်မှုပြဿနာနှင့် ပုဂ္ဂိုလ်ရေးပြဿနာများကြောင့် နည်းပြဟောင်းဇီဒန်းလက်ထက်ကတည်းက ရီးယဲလ်အသင်းတွင် ပုံမှန်နေရာပျောက်ဆုံးနေသူဖြစ်ပြီး လက်ရှိနည်းပြအန်ဆယ်လော့တီလက်ထက်တွင်လည်း ပွဲကစားခွင့်ရရန် ရုန်းကန်နေရသူဖြစ်သည်။
စပါးအသင်းသည် ပြီးခဲ့သည့်ရာသီကလည်း ဘေးလ်အား တစ်ရာသီအငှားစာချုပ်ဖြင့်ခေါ်ယူခဲ့ပြီး ပြိုင်ပွဲစုံ (၃၄)ပွဲကစားကာ (၁၆)ဂိုးသွင်းယူပေးခဲ့သည်။ ဘေးလ်သည် စပါးအသင်းတွင် ၂၀၀၇-၀၈ ရာသီမှ ၂၀၁၂-၁၃ ရာသီအထိ ကစားခဲ့ပြီး ၂၀၁၃ နွေရာသီတွင် ရီးယဲလ်အသင်းသို့ ယူရို (၉၁)သန်း (ထိုစဉ်က ကမ္ဘာ့စံချိန်တင်ပြောင်းရွှေ့ကြေးဖြစ်ခဲ့) ဖြင့်ပြောင်းရွှေ့သွားခဲ့သူဖြစ်သည်။
