ဘာစီလိုနာအသင်းသည် ယခုနွေရာသီတွင် ခေါ်ယူထားသည့် ကစားသမား (၃)ဦးအပါအဝင် ကစားသမား(၈)ဦးအား လာမည့်ရက်ပိုင်းအတွင်း လာလီဂါအဖွဲ့ချုပ်ထံ စာရင်းသွင်းနိုင်ရန် မျှော်လင့်နေကြောင်း စပိန်အားကစားသတင်းစာ Marca ကဖော်ပြခဲ့သည်။
ပြီးခဲ့သည့် ၂၀၂၂-၂၃ ရာသီ စပိန်လာလီဂါချန်ပီယံ ဘာစီလိုနာအသင်းသည် ဘဏ္ဍာရေးအခက်အခဲများနှင့် လစာငွေစည်းမျဉ်းကန့်သတ်ချက်များကြောင့် လာမည့် ၂၀၂၃-၂၄ ရာသီသစ်အတွက် ကစားသမားအချို့အား တရားဝင်စာရင်းသွင်းနိုင်ရန် အခက်အခဲများကြုံတွေ့ခဲ့ပြီး လက်ရှိတွင်မူ ဝါရင့်ကစားသမားများထွက်ခွာသွားသွားခြင်းနှင့်အတူ လစာငွေများစွာ လျှော့ချနိုင်ခဲ့သည့်အတွက် အမြန်ဆုံး စာရင်းသွင်းနိုင်ရန် မျှော်လင့်နေခြင်းဖြစ်ကြောင်း သိရသည်။
ဘာစီလိုနာအသင်းသည် ယခုနွေရာသီအပြောင်းအရွှေ့ကာလအတွင်း ခေါ်ယူထားသည့် ဂွန်ဒိုဂန်၊ အီနီဂိုမာတီနက်ဇ်နှင့် ရိုမီအူတို့ (၃)ဦးအပြင် အသင်း နှင့်စာချုပ်သစ်များ အသီးသီးချုပ်ဆိုထားသည့် နောက်ခံ လူ အာရူဟို၊ မားကို့စ်အလွန်ဆို၊ ဆာဂျီရောဘတ်တို၊ ကွင်းလယ်လူဂါဗီနှင့် ဂိုးသမား အီညာကီပီနာတို့ (၅)ဦးတို့အား လာလီဂါအဖွဲ့ချုပ်ထံ စာရင်းသွင်းနိုင်ရန် ကျန်ရှိနေသေးပြီး ရက်ပိုင်းအတွင်း အပြီးသတ်နိုင်ရန် ကြိုးစားသွားမည်ဖြစ်ကြောင်း စပိန်မီဒီယာများကဖော်ပြခဲ့သည်။
ဘာစီလိုနာအသင်းသည် လာမည့် ၂၀၂၃-၂၄ ရာသီ လာလီဂါအဖွင့်ပွဲစဉ်အဖြစ် သြဂုတ် (၁၃)ရက်နေ့တွင် ဂီတာဖေးအသင်းနှင့် အဝေးကွင်းပွဲစဉ် ယှဉ်ပြိုင်ကစားရမည်ဖြစ်ပြီး လက်ရှိအချိန်တွင် ကစားသမား (၈)ဦအား ရာသီသစ် မစတင်မီ စာရင်းသွင်းနိုင်ရန်အတွက် အချိန် (၁၆)ရက်သာ ကျန်ရှိတော့သောကြောင့် အသင်းဥက္ကလာပေါ်တာအနေဖြင့် ယင်းအခြေအနေ အားထုတ်ဆောင်ရွက်နေခြင်းဖြစ်ကြောင်းသိရသည်။
လက်ရှိတွင် ဘာစီလိုနာအသင်းသည် စီနီယာအသင်းကြီးအတွက် ကစားသမား (၁၃)ဦးကိုသာ လာလီဂါအဖွဲ့ချုပ် စာရင်းသွင်းထားနိုင်သေးပြီး ကျန်ကစားသမားများအား ရာသီသစ်မစတင်မီတွင် အချိန်မီစာရင်းသွင်းရမည်ဖြစ်သည်။
ဘာစီလိုနာအသင်းသည် ပြီးခဲ့သည့် (၂)ရာသီအတွင်း လစာငွေမြင့်မားစွာပေးချေရသည့် ကစားသမားများဖြစ်သော မက်ဆီ၊ ပီကေး၊ ဘူးစကွက်စ်၊ အယ်လ်ဘာ အစရှိသည့် ဝါရင့်ကစားသမားများအပါအဝင် ကော်တင်ဟို၊ ဒီပိုင်း၊ အူဘာမီယန်း၊ ယာနစ်အစရှိသည့် ကစားသမားများနှင့် လမ်းခွဲနိုင်ခဲ့သည့်အတွက် တစ်နှစ်လစာငွေ ယူရိုသန်း (၂၀၀)နီးပါး သက်သာသွားခဲ့ပြီး ယင်းအခြေအနေမှာ ကစားသမားသစ်များ စာရင်းသွင်းနိုင်ရန်အတွက် လုံလောက်သောကြောင့် ဘာစီလိုနာအသင်းအနေဖြင့် အဓိက ကစားသမားများ ထပ်မံမရောင်းချလျင်ပင် ပြဿနာမရှိကြောင်း Marca ကဖော်ပြခဲ့သည်။
