ပြင်သစ်ကြယ်ပွင့်တိုက်စစ်မှူး အမ်ဘာပေအနေဖြင့် ဆော်ဒီကလပ် အယ်လ်ဟီလယ် အသင်းသို့ မပြောင်းရွှေ့ဘဲ လာမည့် ၂၀၂၃-၂၄ ရာသီတွင် PSG အသင်း၌သာ ဆက်နေမည်ဆိုပါကလည်း ဝင်ငွေ ယူရို ၃၉၆ သန်း ရရှိမည်ဖြစ်ကြောင်း သိရှိရသည်။
PSG အသင်းနှင့် ချုပ်ဆိုထားသည့် အမ်ဘာပေ၏ လက်ရှိစာချုပ်မှာ ၂၀၂၄ ဇွန်လ ၃၀ ရက်တွင် သက်တမ်းကုန်ဆုံးမည်ဖြစ်ပြီး ၎င်းအနေဖြင့် စာချုပ်သက်တမ်းတိုးမည်မဟုတ်ကြောင်း PSG အသင်းထံ အကြောင်း ကြားထားသည်။ PSG အသင်းသည် အမ်ဘာ ပေကို ၂၀၂၄ ခုနှစ်တွင် ပြောင်းရွှေ့ကြေးအလွတ်ဖြင့် လက်လွှတ်လိုခြင်းမရှိသည့်အတွက် စာချုပ်သက်တမ်းမတိုးပါက ယခုနွေတွင် ရောင်းထုတ်မည်ဟု ကြေညာထားသည်။
PSG အသင်း ယင်းသို့ကြေညာပြီးနောက် ဆော်ဒီပရိုလိဂ်ကလပ် အယ်လ်ဟီလယ်အသင်းက အမ်ဘာပေကို ကမ္ဘာ့စံချိန်တင်ပြောင်းရွှေ့ကြေး ယူရိုသန်း ၃၀၀ ဖြင့် ခေါ်ယူရန် ကမ်းလှမ်းခဲ့သည်။ အယ်လ်ဟီလယ်အသင်းသည် အမ်ဘာပေကိုလည်း တစ်နှစ်လစာ ယူရိုသန်း ၂၀၀ နှင့် စပွန်ဆာကြေး ယူရိုသန်း ၅၀၀၊ စုစုပေါင်း ယူရိုသန်း ၇၀၀ အထိ ပေးမည်ဟု ကမ်းလှမ်းခဲ့ကြောင်း သိရှိရသည်။
PSG အသင်းသည် အမ်ဘာပေအတွက် အယ်လ်ဟီလယ်အသင်း၏ ကမ်းလှမ်းမှုကို လက်ခံခဲ့ပြီး ကစားသမားအား အပြောင်းအရွှေ့ကိစ္စအတွက် အယ်လ်ဟီလယ်အသင်းတာဝန်ရှိသူများနှင့် ဆွေးနွေးခွင့်ပေးခဲ့ကြောင်း သိရသည်။ သို့သော် အမ်ဘာပေသည် အပြောင်းအရွှေ့ကိစ္စအတွက် အယ်လ်ဟီလယ်အသင်း နှင့်ဆွေးနွေးရန် ငြင်းဆန်ခဲ့ကြောင်း L’Equipe က ဖော်ပြခဲ့သည်။ အမ်ဘာပေအတွက် အယ်လ်ဟီလယ်အသင်း ကမ်းလှမ်းသည့် ယူရိုသန်း ၇၀၀ မှာ များပြားလှသည့်ငွေကြေးဖြစ်ပြီး NBA မှ ထိပ်တန်းဘတ်စကတ်ဘောကစားသမား ၁၆ ဦးပေါင်း၏ တစ်နှစ်လစာမှာပင် ယူရိုသန်း ၇၀၀ မပြည့်ကြောင်း သိရှိရသည်။
အမ်ဘာပေအနေဖြင့် အယ်လ်ဟီလယ် အသင်း၏ ယင်းကဲ့သို့ များပြားလှသည့်ငွေကြေးဖြင့် ကမ်းလှမ်းမှုကို ငြင်းပယ်ပြီး PSG အသင်းတွင် ဆက်နေမည်ဆိုပါက လာမည့်ရာသီတွင် ဝင်ငွေ ယူရို ၃၉၆ သန်းအထိ ရရှိ မည်ဖြစ်ကြောင်း သိရသည်။ အမ်ဘာပေသည် PSG အသင်းတွင် တစ်နှစ်လစာ ယူရို ၉၃ သန်း ရရှိနေပြီး လာမည့်ရာသီဆက်နေမည်ဆိုပါက သစ္စာစောင့်သိကြေး ယူရိုသန်း ၉၀ ရမည်ဖြစ်သည်။
ထို့ပြင် ၎င်းအနေဖြင့် လာမည့်ရာသီတွင် ပြင်သစ်၌ဆက်ရှိမည်ဆိုပါက ၂၀၂၄ ပါရီအိုလံပစ်အတွက် စပွန်ဆာကြေးအဖြစ် ယူရို ၉၃ သန်း ရရှိမည်ဖြစ်သည်။ ပြင်သစ်မီ ဒီယာများက အမ်ဘာပေသည် ၂၀၂၄ တွင် ရီးယဲလ်အသင်းသို့ ပြောင်းရွှေ့ကြေးအလွတ် ဖြင့် ပြောင်းရွှေ့မည်ဖြစ်ပြီး ရီးယဲလ်က ၎င်းကို စာချုပ်လက်မှတ်ရေးထိုးကြေး ယူရို သန်း ၁၂၀ ပေးမည်ဟု ကတိပေးထားကြောင်း ဖော်ပြနေကြသည်။
