ရီးယဲလ်မက်ဒရစ်အသင်းနည်းပြ ဇီဒန်းသည် ပြီးခဲ့သည့် စနေနေ့ကယှဉ်ပြိုင်ခဲ့သော လာလီဂါပွဲစဉ်တွင် ဘက်တစ်အသင်းအား ဂိုးမရှိသရေသာကစားနိုင်ခဲ့ပြီး ရမှတ် (၂)မှတ် ဆုံးရှုံးခဲ့သော်လည်း အသင်းအတွက် လာလီဂါချန်ပီယံတိုက်ပွဲမှာ မပြီးဆုံးသေးကြောင်း ပွဲပြီးမီဒီယာတွေ့ဆုံမှုတွင် ပြောကြားခဲ့သည်။
ရီးယဲလ်မက်ဒရစ်အသင်းသည် ယခုရာသီ လာလီဂါချန်ပီယံဆုအတွက် အက်သလက်တီကို၊ ဘာစီလိုနာအသင်းတို့နှင့် ရာသီကုန်ဆုံးချိန်အထိ အကြိတ်အနယ်ယှဉ်ပြိုင်ရဖွယ်ရှိနေပြီး လက်ရှိအချိန်တွင် ရီးယဲလ်အသင်းအနေဖြင့် ရာသီကုန်ဆုံးရန် (၅)ပွဲအလို၌ ဇယားထိပ်ဆုံးမှ အက်သလက်တီကိုအသင်းနှင့် (၂)မှတ်သာ ကွာဟလျက် ရှိနေသည်။
သို့သော် အမှတ်ပေးဇယားအဆင့် (၃)နေရာမှ မဟာပြိုင်ဘက် ဘာစီလိုနာအသင်းမှာ ရီးယဲလ်အသင်းအား တစ်ပွဲလျော့ အမှတ်တူအနေအထားဖြင့် ဖိအားပေးနေရာ ရီးယဲလ်အသင်းအနေဖြင့် လာလီဂါချန်ပီယံဆုအတွက် ဖိအားဝင်နေပြီဖြစ်ကြောင်း စပိန်မီဒီယာများက သုံးသပ်ခဲ့ကြသည်။
သို့သော် ဇီဒန်းက ယင်းကဲ့သို့ သုံးသပ်ပြောကြားမှုများကို ငြင်းဆန်ခဲ့ပြီး လာလီဂါချန်ပီယံတိုက်ပွဲမှာ မပြီးဆုံးသေးကြောင်း တုံ့ပြန်ခဲ့ခြင်းဖြစ်သည်။
ဇီဒန်းက ”ကျွန်တော်တို့ ရမှတ် (၂)မှတ် ဆုံးရှုံးခဲ့ပါတယ်။ ဒါပေမဲ့ အကောင်းကိုရွေးပြောရရင် ကျွန်တော်တို့ အကောင်းဆုံးကစားခဲ့နိုင်ပါတယ်။ တိုက်စစ်ပိုင်းမှာတော့ ကျွန်တော်တို့ အားနည်းခဲ့ပြီး ဆုံးရှုံးမှုတွေရှိခဲ့ပါတယ်။ ကျွန်တော်တို့မှာ နောက်ထပ်လာလီဂါပွဲစဉ် (၅)ပွဲ ကစားဖို့ကျန်သေးသလို၊ အသင်းအနေနဲ့ နောက်ဆုံးအချိန်အထိ တိုက်ပွဲဝင်သွားဦးမှာပါ။ ဒီနေ့ပွဲစဉ် (ဘက်တစ်နှင့်ပွဲ)အပြီးမှာ လာလီဂါချန်ပီယံတိုက်ပွဲက မပြီးဆုံးသေးပါဘူး။ ကျွန်တော်တို့ ပွဲတွေကစားဖို့ကျန်သေးသလို၊ ပြိုင်ဘက်အသင်းတွေလည်း ပွဲတွေကစားရပါဦးမယ်” ဟု ဘက်တစ်အသင်းနှင့်ပွဲအပြီးတွင် ပြောကြားခဲ့သည်။
