လီဗာပူးလ်နည်းပြ ယာဂန်ကလော့ပ်သည် ပေါ်တိုအသင်းမှ ကိုလံဘီယာတောင်ပံကစားသမား လူးဝစ်ဒီယာ့ဇ်အား မိမိစိတ်ကြိုက်ကစားသမားဖြစ်သဖြင့် အရခေါ်ယူခဲ့သည်ဟု ဆိုခဲ့သည်။
လီဗာပူးလ်အသင်းသည် လူးဝစ်ဒီယာ့ဇ်ကို ပေါင် (၃၇.၅)သန်းဖြင့် ခေါ်ယူပြီး၂၀၂၇ ခုနှစ်အထိ စာချုပ် ချုပ်ဆိုလိုက်ကြောင်း သိရသည်။
လူးဝစ်ဒီယာ့ဇ်(၂၅ နှစ်)သည်ကို လံဘီယာလက်ရွေးစင်အသင်းနှင့်အတူ ကမ္ဘာ့ဖလားခြေစစ်ပွဲယှဉ်ပြိုင်ရန် အာဂျင်တီးနားနိုင်ငံသို့ ရောက်ရှိနေသည့်အတွက် ယင်းနိုင်ငံတွင်ပင် အပြောင်းအရွှေ့အတွက်လိုအပ်သည်များကို လုပ်ဆောင်ခဲ့ရကြောင်း သိရသည်။
ထို့ပြင် လီဗာပူးလ်နည်းပြ ယာဂန်ကလော့ပ်သည် လူးဝစ်ဒီယာ့ဇ်ကို ခေါ်ယူရန် ချိန်ရွယ်ထားသော်လည်း မူလက လာမည့်နွေရာသီမှသာ ခေါ်ယူရန် စီစဉ်ထားခြင်းဖြစ်ပြီး စပါးအသင်းက ကြိုးပမ်းလာသည့်အတွက် ယခုဈေးကွက်အတွင်းမှာပင် ခေါ်ယူခဲ့ခြင်းဖြစ်ကြောင်းလည်း သိရသည်။
သို့သော် ပေါ်တိုအသင်းသည် စပါးအသင်း၏ ပေါင်(၃၈)သန်းဖြင့် ကမ်းလှမ်းမှုကို ငြင်းပယ်ကာ လီဗာပူးလ်အသင်းထံ ရောင်းထုတ်ခဲ့ခြင်းဖြစ်ပြီး လက်ရှိတန်ဖိုးအပြင် အပိုဆုကြေး ပေါင်(၁၂.၅)သန်း ပေးချေရမည့် သဘောတူညီချက်ပါဝင်ကြောင်းလည်း သိရသည်။
လီဗာပူးလ်အသင်းအနေဖြင့် လူးဝစ်ဒီယာ့ဇ်ကို ခေါ်ယူခဲ့ခြင်းကြောင့် လာမည့် ၂၀၂၃ ခုနှစ်တွင် စာချုပ်သက်တမ်းကုန်ဆုံးမည့် ဆာလာ၊ မာနေနှင့် ဖေမီနိုတို့ အပေါ် သက်ရောက်မှုရှိလာနိုင်ကြောင်း သုံးသပ်မှုများလည်း ရှိလာခဲ့သည်။
လီဗာပူးလ်အသင်းသည် အဆိုပါ တိုက်စစ်အတွဲနှင့် အောင်မြင်မှုများစွာ ရယူနိုင်ခဲ့သော်လည်း ယိုတာကို ခေါ်ယူခဲ့ပြီးနောက် ဖေမီနို၏ အခန်းကဏ္ဍ လျော့ကျသွားခဲ့သလို၊ ယခု လူးဝစ်ဒီယာ့ဇ်ကြောင့် ဆာလာနှင့် မာနေတို့၏ အခန်းကဏ္ဍ လျော့ကျသွားနိုင်သည်ဟုလည်း သုံးသပ်နေကြသည်။
လောလောဆယ်တွင်မူ လူးဝစ်ဒီယာ့ဇ်သည် Work Permit ရရှိရန် စောင့်ရဦးမည်ဖြစ်၍ အစောဆုံးလာမည့်ရက် သတ္တပတ်မှသာ စကစားနိုင်မည်ဟု သိရသည်။
