စပါးနည်းပြ ကွန်တီက နော်တင်ဟမ်အသင်းနှင့် လိဂ်ဖလားပွဲ၌ ဟာရီကိန်းအား လူစားလဲခြင်းမှာ အလွန်ပင်ပန်းနေသောကြောင့်ဖြစ်ကြောင်း ရှင်းလင်းပြောကြားခဲ့သည်။
ကွန်တီသည် နှစ်ဂိုးပေးရပြီးနောက် ဂိုးများပြန်လည်သွင်းယူရန် လိုအပ်နေသော်လည်း မိနစ်ပိုင်းအကြာ ဒုတိယပိုင်း (၅၉) မိနစ်တွင် ဟာရီကိန်းကို လူစားလဲခဲ့ခြင်းဖြစ်သည်။
“ဒါက ပင်ပန်းနွမ်းနယ်မှုပြဿနာပါ။ သူက ပင်ပန်းနေပါပြီ။ ဒါပေမဲ့ အဲဒါက ပုံမှန်ပါပဲ။ ဘာဖြစ်လို့လဲဆိုတော့ ဟာရီက ပွဲစဉ်တိုင်း ကစားနေရလို့ပါ။ ဟာရီက အရမ်း(အရမ်း) ပင်ပန်းပါပြီ”ဟု ကွန်တီက ပြောကြားခဲ့သည်။
ဟာရီကိန်းသည် ယခုရာသီတွင် စပါးအသင်းအတွက် ပြိုင်ပွဲစုံ (၂၁) ပွဲအထိ ကစားထားရပြီး (၁၂) ဂိုး သွင်းယူပေးထားသည်။
