မေဂျာလိဂ်ကလပ် အင်တာမိုင်ယာမီအသင်းကစားသမားသစ် မက်ဆီက အသင်းဖွံ့ဖြိုးတိုးတက်လာစေရန် ကူညီပေးသွားမည်ဟု မိတ်ဆက်ပွဲအခမ်းအနားတွင် ကတိပေးခဲ့သည်။
”မိသားစုနဲ့အတူ ဒီမြို့ကိုလာရောက်ဖို့ ရွေးချယ်ရတာ၊ ဒီပရောဂျက်ကို ရွေးချယ်ရတာကို ကျွန်တော် အရမ်းပျော်ပါတယ်။ အဲဒီအရာအတွက် ကျွန်တော်တို့ အရမ်းပျော်နေမယ်ဆိုတာ သံသယဖြစ်စရာ မရှိပါဘူး။ ကောင်းမွန်တဲ့အချိန်တွေ ကျွန်တော်တို့ ပိုင်ဆိုင်ရမှာဖြစ်ပြီး ကောင်းမွန်တဲ့အရာတွေလည်း ဖြစ်လာမှာပါ။ ကျေးဇူးအများကြီးတင်ပါတယ်။ ဒီနေ့အတွက် အားလုံးကို ကျေးဇူးတင်ပါတယ်။ ပြိုင်ပွဲတွေ ယှဉ်ပြိုင်ဖို့အတွက် လေ့ကျင့်မှုစတင်ဖို့ မစောင့်နိုင်တော့ပါဘူး။ ကျွန်တော့်ဆီမှာ အမြဲတမ်းရှိနေတဲ့ ယှဉ်ပြိုင်မှုလုပ်ချင်တဲ့ဆန္ဒက အတူတူပဲလို့ ခံစားရပါတယ်။ မိုင်ယာမီအသင်း ပိုပြီးဖွံ့ဖြိုးလာစေဖို့ ကူညီပေးသွားမှာဖြစ်ပြီး အသင်းနဲ့အတူ ချန်ပီယံဆုလည်း အမှန်တကယ်ရယူချင်ပါတယ်”ဟု မက်ဆီက စပိန်ဘာသာဖြင့် နှုတ်ဆက်စကားပြောကြားခဲ့သည်။
အင်တာမိုင်ယာမီအသင်းသည် ကစားသမားသစ်နှစ်ဦးဖြစ်သည့် အာဂျင်တီးနားဝါရင့် တိုက်စစ်ကစားသမား မက်ဆီနှင့် စပိန်ကွင်းလယ်လူ ဘူး စကွက်စ်တို့ကို တစ်ပြိုင်တည်း ပရိသတ်များနှင့် မိတ်ဆက်ပွဲအခမ်းအနား ပြုလုပ်ခဲ့ခြင်းဖြစ်သည်။
အဆိုပါအခမ်းအနားကို အင်တာမိုင်ယာမီအသင်း၏အိမ်ကွင်းဖြစ်သည့် DRV PNK Stadium ကွင်း၌ မြန်မာစံတော်ချိန် တနင်္လာနေ့ နံနက်ပိုင်းတွင် ပြုလုပ်ခဲ့ခြင်းဖြစ်သည်။
နွေရာသီမုန်တိုင်းကြောင့် မိုးသည်းထန်စွာ ရွာသွန်းနေသဖြင့် အခမ်းအနားကို နှစ်နာရီနောက်ကျပြီးမှ စတင်နိုင်ခဲ့သော်လည်း NBA ကြယ်ပွင့်ကစားသမား စတီဖင်ကာရီ၊ NFL ဂန္ထဝင်ကစားသမား တွမ်ဘရေဒီ၊ ဒီဂျေခါလက်စသည့် ထင်ရှားကျော်ကြားသူများအပါအဝင် ပရိသတ်များ ကွင်းလုံးပြည့် လာရောက်အားပေးခဲ့ကြသည်။
ကစားသမားသစ်များနှင့် မိတ်ဆက်ပေးသည့် အစီအစဉ်ကို ပူးတွဲအသင်းပိုင်ရှင်များဖြစ်သည့် ဒေးဗစ်ဘက်ခမ်၊ ဂျော့ချ်မက်စ်နှင့် ဂျိုဆေးမက်စ်တို့က ပြုလုပ်ခဲ့ပြီး မီးရှူးမီးပန်းများပစ်ဖောက်၍ ခမ်းနားစွာ ကြိုဆိုခဲ့ကြောင်း သိရသည်။
