အသင်းလက်မဲ့ဖြစ်နေသည့် ချယ်လ်ဆီးနည်းပြဟောင်း သောမတ်စ်တူဟယ်လ် ဗြိတိန်မှ ထွက်ခွာရတော့မည်ဖြစ်ပြီး အင်္ဂလန်နည်းပြရာထူးကို စိတ်ဝင်စားနေ

အသင်းလက်မဲ့ဖြစ်နေသည့် ချယ်လ်ဆီးနည်းပြဟောင်း သောမတ်စ်တူဟယ်လ်သည် ဗြိတိန်နိုင်ငံ၏ Brexit စည်း မျဉ်းအရ နိုင်ငံအတွင်းမှ ထွက်ခွာရတော့မည်ဖြစ်ကြောင်း သိရသည်။

သောမတ်စ်တူဟယ်လ်သည် စက်တင်ဘာ(၇)ရက်နေ့တွင် ချယ်လ်ဆီးနည်းပြရာထူးမှ ထုတ်ပယ်ခံခဲ့ရသောကြောင့် ၎င်းအလုပ်လက်မဲ့ဖြစ်နေသည်မှာ (၂)နှစ်ကျော် ကြာမြင့်သွား ခဲ့ပြီဖြစ်သည်။ ထို့ကြောင့် Brexit စည်းမျဉ်းအရ ဗြိတိန်တွင် နေထိုင်ခွင့်မရှိတော့ဘဲ လာမည့် ဒီဇင်ဘာလနောက်ဆုံးထား၍ ထွက်ခွာရတော့မည်ဟု သိရသည်။ 

ထို့ပြင် ယင်းကဲ့သို့ ထွက်ခွာရမည်ဆိုပါက သောမတ်စ်တူဟယ်လ်သည် ဗြိတိန်သို့ ရောက်ရှိလာသည့် နည်းပြများထဲတွင် Brexit စည်းမျဉ်းအရ နိုင်ငံအတွင်းမှ ထွက်ခွာရန် ညွှန်ကြားခံရသည့် ပထမဆုံးနည်းပြအဖြစ် မှတ်တမ်းဝင်မည်ဖြစ်ကြောင်း သိရသည်။

သောမတ်စ်တူဟယ်လ်သည် ၂၀၂၁ ဇန်နဝါရီတွင် ချယ်လ်ဆီးအသင်းကို စတင်ကိုင်တွယ်ခဲ့ပြီးနောက် ယင်းရာသီတွင်ပင် ချန်ပီယံလိဂ်ဖလား ရယူပေးနိုင်ခဲ့သည်။ သို့သော်  ပြီးခဲ့သည့် နွေရာသီတွင် ချယ်လ်ဆီးအသင်း ပိုင်ရှင်အပြောင်း အလဲဖြစ်ပေါ်ခဲ့ပြီးနောက် ရာထူးမှ ထုတ်ပယ်ခံခဲ့ရခြင်းဖြစ်သည်။ 

၎င်းသည် အင်္ဂလန်တွင်သာ ဆက်လက်နေထိုုင်ခဲ့သော်လည်း အသင်းသစ် ကိုင်တွယ်နိုင်ခြင်းမရှိသည့်အတွက် ယခုအခါ  နိုင်ငံအတွင်းမှ ထွက်ခွာရမည့်အခြေအနေ ဖြစ်ပေါ်လာခြင်းဖြစ်သည်။ ထိပ်တန်းနည်းပြတစ်ဦးအဖြစ် သတ်မှတ်ခံရသည့် သောမတ်စ်တူဟယ်လ်ကို ခေါ်ယူလိုသည့် ကလပ်အသင်းများစွာရှိခဲ့ပြီး ချယ်လ်ဆီးမှ ထုတ်ပယ်ခံရပြီးနောက်ပိုင်း အင်္ဂလန်ကလပ်နှစ်သင်းနှင့် စပိန်ကလပ်တစ်သင်း၏ ကမ်းလှမ်းမှုကို ၎င်းကပယ်ချခဲ့ကြောင်း သိရသည်။ 

သို့သော် သောမတ်စ်တူဟယ်လ်သည် ဗြိတိန်တွင် ဆက်လက်နေထိုင်ရန် ဆန္ဒရှိနေသည့်အပြင် အင်္ဂလန်လက်ရွေးစင်အသင်းကို ကိုင်တွယ်ရန် စိတ်ဝင်စားနေကြောင်းလည်း သတင်းထွက်နေသည်။ ကမ္ဘာ့ဖလားရလဒ်အပေါ် စောင့်ကြည့်၍ ဆုံးဖြတ်ဖွယ်ရှိကြောင်းလည်း ထင်ကြေးပေးနေကြသည်။