ချယ်လ်ဆီးနည်းပြ ဂရေဟမ်ပေါ်တာက အသင်းတွင် ပြဿနာများကို ဖြေရှင်းရန်အတွက် အသစ်ခေါ်ယူထားသည့် တိုက်စစ်ကစားသမား ဂျော်အိုဖေးလစ်တစ်ဦးတည်းကို အားကိုး၍မရကြောင်း ပြောကြားခဲ့သည်။
ချယ်လ်ဆီးအသင်းသည် ယခုရာသီတွင် ရုန်းကန်နေရပြီး ပရီးမီးယားလိဂ် (၁၇)ပွဲကစားပြီးချိန်တွင် ရမှတ် (၂၅)မှတ်ဖြင့် အဆင့် (၁၀)နေရာအထိ ရောက်ရှိနေသည်။ ယခုအခါ ချယ်လ်ဆီးအသင်းအနေဖြင့် ဂိုးသွင်းအားနည်းသည့် တိုက်စစ်ပိုင်းအတွက် အက်သလက်တီကိုအသင်းမှ ပေါ်တူဂီလက်ရွေးစင်တိုက်စစ်ကစားသမား ဂျော်အိုဖေးလစ်ကို ယခုရာသီကုန်အထိ အငှားဖြင့် ခေါ်ယူခဲ့ခြင်းဖြစ်သည်။
သို့သော် ဂရေဟမ်ပေါ်တာက “အခု ချယ်လ်ဆီးအသင်း ရင်ဆိုင်နေရတဲ့ပြဿနာက အသင်းကို ပြင်ရမှာပါ။ ကစားသမားတစ်ဦးတစ်ယောက်တည်းက ဒီပြဿနာကို မဖြေရှင်းနိုင်ပါဘူး။ ကျွန်တော်တို့အနေနဲ့ အသင်းကို တိုက်စစ်ပိုင်းပိုကောင်းလာအောင်၊ ဂိုးရနိုင်တဲ့အခွင့်အရေးတွေ ပိုမိုဖန်တီးနိုင်အောင် ပြုပြင်ရမှာပါ။ အဲဒီမှာ ကျွန်တော်တို့အနေနဲ့ ဂိုးတွေရလာမှာဖြစ်ပြီး နိုင်ပွဲတွေ ရယူနိုင်မှာဖြစ်ပါတယ်။ ဂျော်အိုဖေးလစ်က အမြဲလေ့ကျင့်နေပြီး အက်သလက်တီကိုမှာလည်း ပွဲတွေကစားခဲ့ရလို့ ဒီမှာ ပွဲကစားဖို့ အသင့်ဖြစ်နေမှာပါ။ ဒါပေမဲ့ နိုင်ငံတစ်ခုကနေ တစ်ခုကိုပြောင်းလာတဲ့ ကစားသမားတွေအနေနဲ့ ဘယ်လိုဖြစ်မယ်ဆိုတာကို မသိနိုင်သေးပါဘူး။ ဘာပဲပြောပြော သူ့ကိုခေါ်ယူနိုင်တာ ကောင်းပါတယ်” ဟု ပြောကြားခဲ့သည်။
