စီးရီးအေထိပ်သီး ဂျူဗင်တပ်စ်အသင်းသည် အာဆင်နယ်အသင်းမှ ဂါနာလက်ရွေးစင်ကွင်းလယ်ကစားသမား သောမတ်စ်ပါတေးအား ခေါ်ယူရန် ပုဂ္ဂိုလ်ရေးသဘောတူညီမှု ရရှိခဲ့ပြီဖြစ်ပြီး ပေါင် ၁၇ သန်းဝန်းကျင်ဖြင့် အပြောင်းအရွှေ့ဖြစ်မြောက်ဖွယ်ရှိနေ ကြောင်း Sky Sports သတင်းဌာနက ဖော်ပြခဲ့သည်။
အသက် ၃၀ နှစ်အရွယ်ရှိ ပါတေးသည် ၂၀၂၀ နွေရာသီတွင် အက်သလက်တီကိုမက်ဒရစ်အသင်းမှ အာဆင်နယ်အသင်းထံသို့ ပေါင် ၄၅ သန်းဖြင့် ပြောင်းရွှေ့လာခဲ့သူဖြစ်သည်။ ၎င်းသည် အာဆင်နယ်အသင်းအတွက် သုံးရာသီအတွင်း ပြိုင်ပွဲစုံ ၉၉ ပွဲ ကစား ခဲ့ပြီး ငါးဂိုး သွင်းယူခဲ့သည်။
အာဆင်နယ်အသင်းသည် ယခုနွေတွင် ချယ်လ်ဆီးကွင်းလယ်တိုက်စစ်ကစားသမား ဟာဗက်ဇ်ကို ခေါ်ယူရန် သဘောတူညီမှုရထားသလို ဝက်စ်ဟမ်း ကွင်းလယ်ကစားသမား ဒက်ကလန်ရိုက်ကိုလည်း ခေါ်ယူရန်စီစဉ်နေသည့်အတွက် ပါတေးအနေဖြင့် အသင်းမှထွက်ခွာရန် ဆုံးဖြတ်ခဲ့ခြင်းဖြစ်ကြောင်း သိရှိရသည်။ ပါတေးသည် ကနဦးက နာမည်ကျော်ကစားသမားများကို လစာငွေမြောက်မြားစွာပေးကာ ခေါ်ယူနေသည့် ဆော်ဒီလိဂ်သို့ ပြောင်းရွှေ့မည်ဟု သတင်းများထွက်ပေါ်ခဲ့သေးသည်။
ဆော်ဒီကလပ်များဖြစ်သည့် အယ်လ်နာဆာနှင့် အယ်လ်အာလီအသင်းတို့က ပါတေးအား ခေါ်ယူရန် မြောက်မြားလှသည့် လစာငွေများဖြင့် ဆွဲဆောင်ခဲ့သော်လည်း ကစားသမားက ဥရောပတွင်သာ ဆက်ကစားရန် ဆုံးဖြတ်ခဲ့ခြင်းဖြစ်ကြောင်း သိရသည်။ ယင်းနောက် ပါတေးသည် ဂျူဗင်တပ်စ်အသင်းထံသို့ ပြောင်းရွှေ့ရန် ဆွေးနွေးခဲ့ပြီး ယခုအခါ ပုဂ္ဂိုလ်ရေးသဘောတူညီမှု ရရှိခဲ့ပြီဖြစ်ကြောင်း Sky Sports က ဖော်ပြခဲ့ခြင်း ဖြစ်သည်။
ဂျူဗင်တပ်စ်အသင်းသည် ပါတေးအား ခေါ်ယူရန် ပြီးခဲ့သည့် ၂၀၂၁ ခုနှစ်ကတည်းက ကြိုးပမ်းခဲ့ဖူးပြီး ပြောင်းရွှေ့ကြေး မြင့်မားလွန်းသဖြင့် အဆင်မပြေဖြစ်ခဲ့ကြောင်း သိရှိရသည်။ ပါတေးသည် ဂျူဗင်တပ်စ်နည်းပြ အယ်လီဂရီ အကြိုက်တွေ့သည့် ကွင်းလယ်အဖျက် ကစားသမားဖြစ်ပြီး ပေါင် ၁၇ သန်းဝန်းကျင် ဖြင့် ခေါ်ယူနိုင်ရန် မျှော်လင့်နေကြောင်း သိရှိရသည်။
အာဆင်နယ်အသင်းသည် ပါတေး နှင့် စာချုပ်သက်တမ်း နှစ်နှစ်သာ ကျန်ရှိတော့ရာ အနာဂတ်တွင် ပြောင်းရွှေ့ကြေးအလွတ် ဖြင့် လက်လွှတ်ရမည့်အရေးထက် ယခုအချိန် တွင် ငွေသားဖြင့်ရောင်းချရန် ပြင်ဆင်လျက်ရှိရာ ဂျူဗင်တပ်စ်အသင်း၏ ကမ်းလှမ်းမှုကို လက်ခံဖွယ်ရှိနေကြောင်းလည်း အီတလီမီဒီယာများက ဖော်ပြနေကြသည်။ ဂျူဗင်တပ်စ်အသင်းသည် ပါတေးအား ခေါ်ယူပြီးပါက သုံးနှစ်သက်တမ်းရှိ စာချုပ်တစ်ရပ် ချုပ်ဆိုသွားမည်ဖြစ်ကြောင်းလည်း သိရသည်။
ဂျူဗင်တပ်စ်နည်းပြ အယ်လီဂရီသည် ယခုနွေတွင် အသင်းနှင့် စာချုပ်သက်တမ်းကုန်ဆုံးပြီးနောက် အသင်းပြောင်းရွှေ့ဖွယ်ရှိနေသည့် ပြင်သစ်ကွင်းလယ်ကစားသမား ရာဘီယူ၏နေရာတွင် အစားထိုးရန် ပါတေးကို ခေါ်ယူလိုနေခြင်းဖြစ်ပြီး အသင်း၏ကွင်း လယ်တွင် ပေါ့ဘာနှင့် ပါတေးကို တွဲဖက်ကစားစေရန် ဆန္ဒရှိနေကြောင်းလည်း သိရှိရသည်။
