အာဆင်နယ်ကွင်းလယ်တိုက်စစ်ကစားသမားသစ် ဟာဗက်ဇ်က အသင်းတွင် ကစားခွင့်ရသည့်အတွက် အလွန်ပျော်ရွှင်ကြောင်းနှင့် အောင်မြင်မှုများရရှိရန် မျှော်လင့်ထားကြောင်း ပြောကြားခဲ့သည်။
အသက် ၂၄ နှစ်အရွယ်ရှိ ဂျာမနီလက်ရွေးစင်ကွင်းလယ်တိုက်စစ်ကစားသမား ဟာဗက်ဇ်သည် ယခုနွေရာသီတွင် ချယ်လ်ဆီးအသင်းမှ အာဆင်နယ်အသင်းထံသို့ ပေါင် ၆၅ သန်းဖြင့် ပြောင်းရွှေ့လာခဲ့သူဖြစ်သည်။
၎င်းသည် ဇူလိုင် ၁၃ ရက်က ကစားခဲ့သည့် ရာသီကြိုခြေစမ်းပွဲ နုရင်ဘတ် (၁-၁) အာဆင်နယ်ပွဲ၌ ဒုတိယပိုင်းတွင် အာဆင်နယ်အသင်းအတွက် ပထမဆုံးအကြိမ် ပါဝင်ကစားခဲ့သည်။ အဆိုပါခြေစမ်းပွဲအပြီးတွင် ဟာဗက်ဇ်က အာဆင်နယ်အသင်းတွင် က စားခွင့်ရသည့်အတွက် ပျော်ရွှင်ကြောင်းနှင့် အာဆင်နယ်အသင်းမှာ မိသားစုကဲ့သို့ ခံစားရကြောင်း ပြောကြားခဲ့ခြင်းဖြစ်သည်။
ဟာဗက်ဇ်က “ကျွန်တော် အရမ်းပျော်ပါတယ်။ ကျွန်တော့်အတွက်တော့ အာဆင်နယ်အသင်းက ကြီးကျယ်ခမ်းနားတဲ့အသင်း ဖြစ်ပြီး အာဆင်နယ်အသင်းမှာ ကစားခွင့်ရဖို့က ကျွန်တော့်ရဲ့ အိပ်မက်လည်း ဖြစ်ပါတယ်။ အခု အာဆင်နယ်အသင်းရဲ့ အစိတ်အပိုင်းတစ်ခုဖြစ်ခွင့်ရလို့ ကျွန်တော် ပျော်ပါတယ်။ အသင်းမှာရှိတဲ့ လူတွေအားလုံးက လိုလိုချင်ချင်နဲ့ ကျွန်တော့်ကို ကြိုဆိုကြတယ်။ ပြီးတော့ အသင်းဖော်သစ်တွေနဲ့အတူ ကစားရတာကိုလည်း ကျွန်တော် သဘောကျပါတယ်။ အာဆင်နယ်အသင်းဟာ လူငယ်တွေနဲ့ဖွဲ့စည်းထားပြီး ပြီးခဲ့တဲ့ရာသီက သူတို့ကစားတဲ့ပွဲတွေကို ကြည့်ရတာ အရမ်းကောင်းပါတယ်။ ကျွန်တော့်အနေနဲ့ အာဆင်နယ်အသင်းနဲ့အတူ အောင်မြင်မှုတွေ ရယူနိုင်ဖို့ မျှော်လင့်ထားပါတယ်”ဟု ပြောကြားခဲ့သည်။
