အာဆင်နယ်အသင်းသည် ကြာသပတေးနေ့က ယှဉ်ပြိုင်ကစားခဲ့သည့် PSV နှင့်ပွဲတွင် (၁-၀)ဂိုးဖြင့် အနိုင်ရရှိခဲ့ပြီးနောက် ယူရိုပါလိဂ်ရှုံးထွက်အဆင့်သို့ တက်ရောက်နိုင်ခဲ့ကြောင်း သိရသည်။
အာဆင်နယ်အသင်းသည် ဗြိတိန်ဘုရင်မကြီး၏ စျာပနကြောင့် ရွှေ့ဆိုင်းခဲ့ရသည့် PSV နှင့်ပွဲကို ယခုတစ်ပတ် ပြန် လည်ယှဉ်ပြိုင်ကစားခဲ့ခြင်းဖြစ်ပြီး အုပ်စုတွင်း၌ (၄)ပွဲဆက် အနိုင်ရခဲ့သည့်အတွက် (၂)ပွဲအလိုတွင် နောက်တစ်ဆင့်တက်ရန် သေချာသွားခဲ့ခြင်းဖြစ်သည်။
ယူရိုပါလိဂ်အုပ်စု (A) ၌ (၄)ပွဲကစားပြီးချိန်တွင် အာဆင်နယ်အသင်းက (၁၂)မှတ်၊ PSV အသင်းက (၇) မှတ်ရရှိထားပြီး တတိယနေရာမှ ဘိုဒယ်ဂလင့်အသင်းမှာ (၄)မှတ်သာ ရရှိထားသည်။ ထို့ကြောင့် အာဆင်နယ်အသင်းအနေဖြင့် အနိမ့်ဆုံးအုပ်စုဒုတိယနေရာ ရရှိရန် သေချာသွားခဲ့ခြင်းဖြစ်သည်။
အာဆင်နယ်အသင်းသည် ယခုရာသီတွင် ပြိုင်ပွဲစုံ(၁၄) ပွဲ ယှဉ်ပြိုင်ကစားရာ၌ ပရီးမီးယားလိဂ်တွင် မန်ယူတစ်သင်းကို သာ ရှုံးနိမ့်ပြီး ကျန်(၁၃)ပွဲကို အနိုင်ရရှိခဲ့သည်။
ထို့ကြောင့် နည်းပြ အာတီတာ၏ ဦးဆောင်မှုအောက်တွင် အကောင်းဆုံး ရာသီအဖွင့်ရလဒ်ပိုင်းကို ပိုင်ဆိုင်နေခြင်းဖြစ်ပြီး ပရီးမီးယားလိဂ်ပြိုင်ပွဲ၌ ဗိုလ်စွဲရန် ဒုတိယရေပန်းအစားဆုံး၊ ယူရိုပါလိဂ်ပြိုင်ပွဲ၌ ဗိုလ်စွဲရန် ရေပန်းအစားဆုံးအသင်းအဖြစ် ရပ်တည်နေသည်။
အာဆင်နယ်အသင်းသည် ပရီးမီးယားလိဂ်ပြိုင်ပွဲတွင် ဒုတိယနေရာမှ လက်ရှိချန်ပီယံမန်စီးတီးအသင်းကို (၄)မှတ် ဖြတ်ကာ ဦးဆောင်နေခြင်းဖြစ်ပြီး လာမည့်စနေနေ့တွင် ဆောက်သမ်တန်အသင်းနှင့် အဝေးကွင်းပွဲ ယှဉ်ပြိုင်ကစားရမည်ဖြစ်သည်။
ယူရိုပါလိဂ်ပွဲအပြီးတွင် အာတီတာက “နောက်တစ်ဆင့်တက်နိုင်တဲ့အတွက် ကျေနပ်မိပါတယ်။ အခု ကျွန်တော်တို့ အုပ်စုပထမနေရာ လိုချင်ပါတယ်”ဟု ပြောကြားခဲ့ပြီး ဆောက်သမ်တန်နှင့်ပွဲအတွက်လည်း “ဒီပွဲအတွက် ကျွန်တော်တို့ အဆင်သင့်ပါပဲ။ ဒါဟာ စိန်ခေါ်မှုတစ်ခုဖြစ်ပြီး ဒီလို စိန်ခေါ်မှုတွေကို ကျွန်တော်တို့ သဘောကျပါတယ်”ဟု ပြောကြားခဲ့သည်။
ဂိုးဖြင့် အနိုင်ရရှိခဲ့ပြီးနောက် ယူရိုပါလိဂ်ရှုံးထွက်အဆင့်သို့ တက်ရောက်နိုင်ခဲ့ကြောင်း သိရသည်။){kind=link}