အင်္ဂလန်လက်ရွေးစင်အသင်း ညာနောက်ခံလူ ဝေါ်လ်ကာက ၎င်းအနေဖြင့် အီရန်အသင်းနှင့်ကစားရမည့် အုပ်စုအဖွင့်ပွဲကို လွဲချော်ဖွယ်ရှိကြောင်း ဝန်ခံပြောကြားခဲ့သည်။
အသက် (၃၂) နှစ်ရှိပြီဖြစ်သူ ဝေါ်လ်ကာသည် ပြီးခဲ့သည့်လက ပေါင်ခြံဒဏ်ရာခွဲစိတ်မှုလုပ်ထားရသော်လည်း အင်္ဂလန်အသင်း နည်းပြ ဆောက်ဂိတ်က ကမ္ဘာ့ဖလားပြိုင်ပွဲ ယှဉ်ပြိုင်မည့် အပြီးသတ်စာရင်းတွင် ထည့်သွင်းရွေးချယ်ခဲ့ခြင်းဖြစ်သည်။
၎င်းအနေဖြင့် ဗုဒ္ဓဟူးနေ့ကပြုလုပ်သည့် လေ့ကျင့်မှုအစီအစဉ်တွင် အသင်းဖော်များနှင့်အတူ အပြည့်အဝလေ့ကျင့်နိုင်ခဲ့သော်လည်း အဖွင့်ပွဲစဉ်တွင် ပါဝင်နိုင်ဖွယ်မရှိကြောင်း ယင်းလေ့ကျင့်မှုမတိုင်မီ ပြောကြားထားခြင်းဖြစ်သည်။
“အဲဒါက မန်နေဂျာအပေါ်မူတည်ပါတယ်။ ပထမပွဲကတော့ အချိန်အရမ်းနည်းလွန်းတယ်လို့ ကျွန်တော်ထင်တယ်။ ဒါပေမဲ့ နောက်ပိုင်းကျရင်တော့ အဆင်ပြေသွားမှာဖြစ်ပြီး အဆင်သင့်ဖြစ်နေမှာပါ”ဟု ၎င်းက ပြောကြားခဲ့သည်။
အင်္ဂလန်အသင်းသည် အုပ်စု (B) ၌ ကျရောက်နေပြီး နိုဝင်ဘာ (၂၁)ရက်တွင် အီရန်နှင့် အဖွင့်ပွဲ၊ နိုဝင်ဘာ (၂၅)ရက်တွင် အမေရိကန်နှင့် ဒုတိယပွဲ၊ နိုဝင်ဘာ (၂၉)ရက်တွင် ဝေးလ်စ်နှင့် နောက်ဆုံးပွဲ ယှဉ်ပြိုင်ရမည်ဖြစ်သည်။
