ဘာစီလိုနာအသင်းသည် အသင်းနောက်ခံလူဟောင်း အဲလ်ဗတ်စ်အား ပြန်လည်ခေါ်ယူရန် ပုဂ္ဂိုလ်ရေးသဘောတူညီမှု ရခဲ့ပြီဖြစ်ကြောင်း စပိန်အားကစားသတင်းစာ Diario Sport က ဖော်ပြခဲ့သည်။
အသက် (၃၈)နှစ်အရွယ်ရှိ ဘရာဇီးလ်ဝါရင့်နောက်ခံလူ အဲလ်ဗတ်စ်သည် စက်တင်ဘာလတွင် ဘရာဇီးလ်ကလပ် ဆော်ပေါ်လိုအသင်းနှင့် စာချုပ်ဖျက်သိမ်းပြီးနောက် အသင်းလက်မဲ့ဖြစ်နေသူ ဖြစ်သည်။
Diario Sport ၏ ဖော်ပြချက်အရ ဘာစီလိုနာနည်းပြသစ် ဇာဗီသည် နိုဝင်ဘာ (၁၂)ရက်(သောကြာနေ့)တွင် အဲလ်ဗတ်စ်အား ခေါ်ယူရန် ဘာစီလိုနာအသင်းတာဝန်ရှိသူများကို တိုက်တွန်းခဲ့ကြောင်း သိရသည်။
ထို့ကြောင့် ဘာစီလိုနာအသင်းတာဝန်ရှိသူများသည် အဲလ်ဗတ်စ်နှင့် အပြောင်းအရွှေ့အတွက် ဆွေးနွေးခဲ့ရာ ပုဂ္ဂိုလ်ရေးသဘောတူညီမှု ရရှိခဲ့ပြီး အဲလ်ဗတ်စ်သည် ဘာစီလိုနာအသင်းတွင် လစာအနိမ့်ဆုံးရယူရန် သဘောတူညီမှု ရခဲ့ကြောင်း သိရသည်။
ဘာစီလိုနာအသင်းသည် အဲလ်ဗတ်စ်နှင့် ပုဂ္ဂိုလ်ရေးသဘောတူညီမှု ရခဲ့ပြီးနောက် လာမည့်အပတ်တွင် အပြောင်းအရွှေ့သတင်းကို အတည်ပြုဖွယ်ရှိကြောင်းလည်း Diario Sport က ဖော်ပြခဲ့သည်။
အဲလ်ဗတ်စ်သည် ဘာစီလိုနာအသင်းတွင် ၂၀၀၈ ခုနှစ်မှ ၂၀၁၆ ခုနှစ်အထိ ကစားခဲ့သူဖြစ်ပြီး အသင်းအတွက် ပြိုင်ပွဲစုံ (၃၉၁)ပွဲတွင် (၂၁)ဂိုး သွင်းယူထားသည်။
၎င်းသည် ဘာစီလိုနာအသင်းနှင့်အတူ လာလီဂါဖလား (၆)ကြိမ်၊ ချန်ပီယံလိဂ် (၃)ကြိမ် အပါအဝင် ဆုဖလားပေါင်း (၂၃)လုံးအထိ ရယူနိုင်ခဲ့သည်။
