ရီးယဲလ်အသင်း၏ ဥက္ကဋ္ဌ ဖလော်ရင်တီနိုပီရက်ဇ်က ဥရောပစူပါလိဂ်စီမံကိန်းမှာ အဆုံးသတ်သွားခြင်းမရှိသေးဘဲ မိမိတို့အနေဖြင့် ဆက်လက်ကြိုးစားလုပ်ဆောင်သွားမည် ဟု ပြောကြားခဲ့သည်။
ဥရောပစူပါလိဂ်ပြိုင်ပွဲကို အကောင်အထည်ဖော်မည်ဖြစ်ကြောင်း ရီးယဲလ်အပါအဝင် ဥရောပထိပ်သီးအသင်း (၁၂)သင်းက ကြေညာချက်ထုတ်ပြန်ခဲ့သော်လည်း ယခုနောက်ဆုံးတွင် ရီးယဲလ်၊ ဘာစီလိုနာနှင့် ဂျူဗင်တပ်စ်တို့ (၃) သင်းသာ ကျန်ရှိပြီး ကျန်အသင်း (၉) သင်းမှာ ပြန်လည်နုတ်ထွက်သွားခဲ့ကြသည်။
ထို့ကြောင့် ဥရောပစူပါလိဂ်ပြိုင်ပွဲစီမံကိန်း အဆုံးသတ်သွားပြီဟု သုံးသပ်နေကြသော်လည်း ပီရက်ဇ်က စီမံကိန်းမှာ အကောင်အထည်ဖော်ရန် အသင့်အနေအထားတွင် ရှိနေဆဲဖြစ်ကြောင်း ပြောကြားခဲ့ခြင်းဖြစ်သည်။
ပီရက်ဇ်က “ကျွန်တော်တို့ ဆက်လက်လုပ်ဆောင်သွားမှာပါ။ စီမံကိန်းက အသင့်အနေအထားမှာ ရှိနေပါတယ်။ အခု တုံ့ပြန်ခဲ့တာတွေက စိတ်ပျက်စရာကောင်းပေမဲ့ နောက်(၃)နှစ်အတွင်းမှာ ဖြစ်လာနိုင်ပါတယ်။ အရည်အသွေးမပြည့်ဝတဲ့ ဘောလုံးပွဲတွေ များလာရင် ဘောလုံးအားကစားအပေါ် ပရိသတ်တွေရဲ့ စိတ်ဝင်စားမှုက ကြာကြာခံနိုင်မှာ မဟုတ်ပါဘူး”ဟု ပြောကြားခဲ့သည်။
ထို့ပြင် ပီရက်ဇ်က မိမိတို့အနေဖြင့် ဘောလုံးလောကကို သတ်ဖြတ်ရန် ကြိုးပမ်းနေခြင်းမဟုတ်ဘဲ ကယ်တင်ရန် ကြိုးပမ်းနေခြင်းသာဖြစ်ကြောင်း၊ ချန်ပီယံလိဂ်ပြိုင်ပွဲ ကျင်းပသည့်ပုံစံမှာ ဟောင်းနွမ်းနေပြီး ကွာတားဖိုင်နယ်အဆင့်ရောက်မှသာ စိတ်ဝင်စားစရာကောင်းကြောင်းလည်း ဆိုခဲ့သည်။
ဖလော်ရင်တီနိုပီရက်ဇ်သည် ဥရောပစူပါလိဂ်၏ ဥက္ကဋ္ဌအဖြစ် ခန့်အပ်ခံထားရသူဖြစ်ပြီး ဝေဖန်မှုများစွာနှင့် ရင်ဆိုင်ခဲ့ရပြီး အကောင်အထည်ဖော်ရန် ခက်ခဲသည့်အခြေအနေဖြစ်သွားသောကြောင့် သိက္ခာကျ အရှက်ရစရာဖြစ်ခဲ့ကြောင်း သုံးသပ်မှုများလည်း ရှိနေသည်။
သို့သော် ရီးယဲလ်အသင်း၏ မဟာပြိုင်ဘက် ဘာစီလိုနာအသင်းဥက္ကဋ္ဌသစ် လာပေါ်တာက ဥရောပစူပါလိဂ်ကို ထောက်ခံခဲ့ကြောင်းလည်း သိရသည်။
လာပေါ်တာက “ဒီပြိုင်ပွဲက တကယ်လိုအပ်ပါတယ်။ ပရိသတ်တွေကို ဆွဲဆောင်နိုင်မယ့် ပြိုင်ပွဲတစ်ခုဖြစ်လာမှာ သေချာနေပြီး ဥရောပဘောလုံးအဖွဲ့ချုပ်နဲ့ ကျွန်တော်တို့ ဆွေးနွေးသွားမှာပါ”ဟု ဆိုခဲ့သည်။
