ဥရောပစူပါလိဂ်၏ အဖွဲ့ဝင်ကလပ်အသင်းများသည် ဥရောပစူပါလိဂ်အဖွဲ့ချုပ်၏ ဥက္ကဋ္ဌအဖြစ် ရီးယဲလ်မက်ဒရစ်အသင်း၏ ဥက္ကဋ္ဌဖြစ်သူ ဖလော်ရင်တီနိုပီရက်ဇ်အား ခန့်အပ်ခဲ့ကြောင်း သိရှိရသည်။
ပီရက်ဇ်သည် ဘောလုံးလောကအတွင်း သြဇာလွှမ်းမိုးမှု ကြီးမားသူဖြစ်ပြီး ရီးယဲလ်မက်ဒရစ်အသင်းကိုလည်း အောင်မြင်မှုများစွာ ရရှိအောင် စွမ်းဆောင်နိုင်ခဲ့သူဖြစ်သလို၊ စျေးကွက်သစ်ချဲ့ထွင်မှု၊ ဘဏ္ဍာရေးအခြေအနေကိုင်တွယ်မှုတို့တွင် ကျွမ်းကျင်သူတစ်ဦးလည်းဖြစ်သည်။
သူသည် ဥရောပစူပါလိဂ်ပြိုင်ပွဲသမိုင်းတွင် ပထမဆုံးဥက္ကဋ္ဌ ဖြစ်လာခဲ့ပြီး ယခုပြိုင်ပွဲသစ်သည် မည်သည့်အတွက် အပြုသဘောဆောင်သည့် ပြိုင်ပွဲတစ်ခုဖြစ်လာမည်ဆိုသည်ကိုလည်း ရှင်းပြခဲ့သည်။
ပီရက်ဇ်က ကျွန်တော်တို့က ဘောလုံးလောကရဲ့ အလွှာတိုင်းကို အကူအညီတွေပေးသွားမှာဖြစ်ပြီး ဘောလုံးလောကဟာ ဒီကမ္ဘာကြီးမှာ မှန်ကန်တဲ့နေရာတစ်ခုဖြစ်လာအောင် ဆောင်ရွက်သွားမှာပါ။ ဘောလုံးအားကစားနည်းဟာ ကမ္ဘာပေါ်မှာ အားပေးသူ (၄)ဘီလီယံကျော်ရှိတဲ့ တစ်ခုတည်းသော အားကစားနည်းဖြစ်ပြီး ဘောလုံးလောကရဲ့ ထိပ်တန်းအသင်းကြီးတွေအနေနဲ့ ကျွန်တော်တို့ ယူနိုင်တဲ့ တာဝန်တွေကို ပိုယူသွားပါမယ်”ဟု ပြောကြားခဲ့သည်။
ဥရောပစူပါလိဂ်ပြိုင်ပွဲ၏ ဒုဥက္ကဋ္ဌတာဝန်များကို လက်ရှိ ဥရောပကလပ်အသင်းများအဖွဲ့အစည်း၏ ဥက္ကဋ္ဌဖြစ်သူ ဂျူဗင်တပ်စ်အသင်းဥက္ကဋ္ဌ အက်ဂ်နယ်လီနှင့် မန်ယူအသင်းပိုင်ရှင် ဂျိုဝယ်လ်ဂလေဇာတို့က ဆောင်ရွက်သွားမည်ဖြစ်ပြီး အက်ဂ်နယ်လီသည် မူလယူထားသည့် ECA ဥက္ကဋ္ဌ ရာထူးမှလည်း နုတ်ထွက်ခဲ့သည်။
”ကျွန်တော်တို့က ကမ္ဘာ့ဘောလုံးလောကရဲ့ ဘီလီယံနဲ့ချီတဲ့ ပရိသတ်တွေကို ကိုယ်စားပြုပြီး ဥရောပရဲ့ဖလားအရေအတွက် (၉၉)ခုကို ယူထားပါတယ်။ ကျွန်တော်တို့ဟာ အခုလို အကျဉ်းအကျပ်ကာလမှာ အတူလက်တွဲနိုင်ခဲ့ကြပါတယ်။ ကျွန်တော်တို့မှာ ရှည်လျားတဲ့ အနာဂတ် ရှိလာမှာဖြစ်ပြီး ပရိသတ်တွေနဲ့ အပျော်တမ်းကစားသမားတွေအတွက်ပါ အကျိုးပြုနိုင်အောင် ကြိုးစားသွားပါမယ်” ဟု ပီရက်ဇ်က ဆိိုခဲ့သည်။
