လာလီဂါအဖွဲ့ချုပ်(LFP)ဥက္ကဋ္ဌ တီဘက်စ်က ဥရောပစူပါလိဂ်ပြိုင်ပွဲစီမံကိန်းကို နောက်ကွယ်က ကြိုးကိုင်ခဲ့သူမှာ ကမ္ဘာ့ဘောလုံးအဖွဲ့ချုပ် (FIFA) ဥက္ကဋ္ဌ အင်ဖန်တီနိုဖြစ်သည်ဟု စွပ်စွဲပြောကြားခဲ့သည်။
ဥရောပထိပ်သီး(၁၂)သင်းက ဧပြီလ (၁၈) ရက်တွင် ဥရောပစူပါလိဂ်ပြိုင်ပွဲစီမံကိန်းကို အဆိုပြုခဲ့သော်လည်း ဘောလုံးအလွှာအသီးသီးကန့်ကွက်မှုကြောင့် အင်္ဂလန်ထိပ်သီး (၆)သင်းအပါအဝင် (၉)သင်း နုတ်ထွက်ခဲ့ပြီး ကျန်(၃)သင်းဖြစ်သည့် ရီးယဲလ်၊ ဘာစီလိုနာနှင့် ဂျူဗင်တပ်စ်တို့မှ အရေးယူမှုများနှင့်ရင်ဆိုင်ရဖွယ်ရှိနေသည်။
ဥရောပစူပါလိဂ်ပြိုင်ပွဲကို ရီးယဲလ်ဥက္ကဋ္ဌ ပီရက်ဇ်နှင့် ဂျူဗင်တပ်စ်ဥက္ကဋ္ဌ အက်ဂ်နယ်လီတို့က ဦးဆောင်ကာ ကျင်းပရန်စီစဉ်ခဲ့ခြင်းဖြစ်သော်လည်း ယင်းပြိုင်ပွဲကို ဖန်တီးသူမှာ အင်ဖန်တီနိုသာဖြစ်သည်ဟု တီဘက်စ်က စွပ်စွဲခဲ့ခြင်းဖြစ်သည်။
တီဘက်စ်က ”ဥရောပစူပါလိဂ်ပြိုင်ပွဲစီမံကိန်းကို နောက်ကွယ်က ကြိုးကိုင်သူဟာ အင်ဖန်တီနိုပါ။ ကျွန်တော် သူနဲ့ မျက်နှာချင်းဆိုင်တွေ့ပြီး ပြောဖူးပါတယ်။ ဒါကို အရင်ကလည်း ကျွန်တော် ပြောဖူးပါတယ်။ အခုလည်း ထပ်ပြောပါမယ်။ ဥရောပစူပါလိဂ်ပြိုင်ပွဲကို ဖန်တီးဖို့ကြိုးစားတာဟာ FIFA ဥက္ကဋ္ဌ အင်ဖန်တီနိုဖြစ်ပါတယ်။ သူက ဥရောပထိပ်သီးအသင်းတွေကို မက်လုံးတွေပေးပြီး အဲဒီစီမံကိန်းကို အသက်သွင်းဖို့ ပြင်ဆင်ခဲ့တာပါ”ဟု ပြောကြားခဲ့သည်။
