ဆော်ဒီကလပ် အယ်လ်နာဆာအသင်း၏ နာမည်ကြီးကစားသမားဖြစ်သူ စီရော်နယ်လ်ဒိုက ဥရောပလိဂ်ပြိုင်ပွဲများတွင် ပရီးမီးယားလိဂ်မှအပ ကျန်ပြိုင်ပွဲများ အရည်အသွေးကျဆင်းသွားကြောင်း သုံးသပ်ပြောကြားခဲ့သည်။
“ဥရောပဘောလုံးလောကကို ကျွန်တော် မပြန်တော့ပါဘူး။ ဒီတံခါးက လုံးဝပိတ်သွားပါပြီ။ ကျွန်တော့်အသက် ၃၈ နှစ်ရှိပါပြီ။ ဥရောပဘောလုံးလောကကလည်း အရည်အသွေးတွေ များစွာကျဆင်းသွားတယ်။ ကျွန်တော့်အဖို့ တော့ အရည်အသွေးမြင့်မားပြီး တခြားလိဂ်ပြိုင်ပွဲအားလုံးထက် ပိုမိုမြင့်မားတဲ့အဆင့်မှာ ပရီးမီးယားလိဂ်တစ်ခုတည်းပဲ ရှိနေပါတယ်။ စပိန်လိဂ်က ကြီးကျယ်ခမ်းနားတဲ့ အရည်အသွေးတွေ မရှိတော့ဘူး။ ပေါ်တူဂီလိဂ်က လိဂ်ပြိုင်ပွဲကောင်းတစ်ရပ် ဆိုပေမဲ့ သူတို့က ထိပ်တန်းလိဂ်မဟုတ်ပါဘူး။ ဂျာမန်လိဂ်လည်း အရည်အသွေးများစွာ ကျဆင်းသွားပြီလို့ ကျွန်တော် ယူဆပါတယ်။ ဥရောပမှာ ကျွန်တော် နောက်ထပ်မကစားတော့မှာ သေချာပါတယ်”ဟု စီရော်နယ်လ်ဒိုက ပြောကြားခဲ့သည်။
စီရော်နယ်လ်ဒိုသည် ပြီးခဲ့သည့်ရာသီဝက်က မန်ယူအသင်းနှင့် လမ်းခွဲပြီးနောက် အယ်လ်နာဆာအသင်းသို့ ရောက်ရှိလာပြီး တစ်နှစ် ပေါင် ၁၇၅ သန်းအထိ ရရှိနေကြောင်း သိရသည်။ အင်တာမိုင်ယာမီသို့ ပြောင်းရွှေ့သွားသည့် မက်ဆီမှာမူ တစ်နှစ် ပေါင် ၄၅ သန်းဝန်းကျင်သာ ရရှိမည်ဖြစ်သော်လည်း စာချုပ်အရ Adidas ၊ Apple TV တို့မှ ရှယ်ယာဝေစုများလည်း ရရှိမည် ဖြစ်သည်။
ဆော်ဒီလိဂ်သို့ စီရော်နယ်လ်ဒို ရောက်ရှိလာပြီးသည့်နောက်တွင် ဆော်ဒီပရိုလိဂ်သို့ ပြောင်းရွှေ့ လာသည့် ကစားသမားအမြောက်အမြားရှိပြီး ယင်းထဲတွင် ဘန်ဇီမာ၊ ကွန်တေစသည့် နာမည်ကျော်များအပါအဝင် ထင်ရှားသော ကစားသမား အမြောက်အမြားပါဝင်လာသည်။
