ဦးခေါင်းထိခိုက်မှုကြောင့် သတိမေ့မြော သွားပါက လူစားလဲခွင့်ပြုသည့်စည်းမျဉ်းကို ဖေဖော်ဝါရီ ၆ ရက်မှစ၍ စမ်းသပ်အသုံးပြုမည်ဖြစ်ကြောင်း ပရီးမီးယားလိဂ်ပြိုင်ပွဲက အတည်ပြု ကြေညာခဲ့သည်။
ယင်းစည်းမျဉ်းအရ ဦးခေါင်းထိခိုက်မှုကြောင့် သတိမေ့မြောသွားပါက အပိုလူစား လဲခွင့်ရမည်ဖြစ်ပြီး အသင်းတစ်သင်းအနေဖြင့် ပွဲစဉ်တစ်ပွဲတွင် နှစ်ကြိမ်ပြုလုပ်ခွင့်ရမည် ဖြစ်ကြောင်း ပရီးမီးယားလိဂ်ပြိုင်ပွဲက ထုတ်ပြန်ခဲ့သည်။ ထို့ကြောင့် ကလပ်အသင်းများ အနေဖြင့် ပုံမှန်လူစားလဲခွင့် သုံးဦးအပြင် ဦးခေါင်းထိခိုက်မှုကြောင့် သတိမေ့မြောသွားပါက အပိုလူစားလဲခွင့်နှစ်ကြိမ် ထပ်မံရရှိမည် ဖြစ်သည်။
ယင်းစည်းမျဉ်းအသုံးပြုရန် နိုင်ငံတကာဘောလုံးအဖွဲ့ချုပ်များဘုတ်အဖွဲ့ (IFAB) က ဒီဇင်ဘာတွင် ခွင့်ပြုပေးခဲ့ပြီး ပရီးမီးယားလိဂ်အနေဖြင့် အမျိုးသားလိဂ်ပြိုင်ပွဲများအနက် ပထမဆုံးအသုံးပြုသည့် လိဂ်အဖြစ် မှတ်တမ်းဝင်မည်ဖြစ်သည်။ စည်းမျဉ်းအသစ် ပထမဆုံး အသုံးပြုခွင့်ရမည့်ပွဲမှာ ဖေဖော်ဝါရီ ၆ ရက် မြန်မာစံတော်ချိန် ည ၇ နာရီတွင် ယှဉ်ပြိုင်ကစားမည့် ဗီလာ-အာဆင်နယ်ပွဲစဉ်ဖြစ်ကြောင်း သိရသည်။ ထို့ပြင် ဖေဖော်ဝါရီ ဒုတိယပတ်တွင်ကျင်းပမည့် FA ဖလား ပဥ္စမအဆင့်ပွဲစဉ်များအပါအဝင် အမျိုးသမီးစူပါလိဂ်နှင့် အမျိုးသမီးချန်ပီယံရှစ်ပြိုင်ပွဲတွင်လည်း အသုံးပြုသွားမည်ဖြစ်သည်။
ကမ္ဘာ့ဘောလုံးအဖွဲ့ချုပ် (FIFA) က လည်း ဖေဖော်ဝါရီ ၄ ရက်မှ ၁၁ ရက်အထိ ကျင်းပမည့် ၂၀၂၀ ကလပ်ကမ္ဘာ့ဖလားပြိုင်ပွဲ တွင် စမ်းသပ်အသုံးပြုခွင့်ပေးမည်ဖြစ်ကြောင်း ကြေညာထားသည်။ ကလပ်ကမ္ဘာ့ဖလားပြိုင်ပွဲမှာ နိုင်ငံတကာပြိုင်ပွဲများအနက် ယင်းစည်းမျဉ်းအသုံးပြုခွင့်ရမည့် ပထမဆုံး ပြိုင်ပွဲလည်းဖြစ်သည်။ သို့သော် ကလပ်ကမ္ဘာ့ဖလားပြိုင်ပွဲတွင်မူ ပရီးမီးယားလိဂ်ကဲ့သို့ နှစ်ဦးလဲလှယ်ခွင့်မရဘဲ တစ်ဦးတည်းသာ ခွင့်ပြုမည်ဖြစ်ကြောင်း သိရသည်။
ဦးခေါင်း ဒဏ်ရာရရှိပါက လူစားလဲခြင်းကို ရပ်ဘီပြိုင်ပွဲများတွင် အသုံးပြုနေသည်မှာ ကာလအတန်ကြာပြီဖြစ်ပြီး ယာယီလဲလှယ်မှုအဖြစ်သာ ခွင့်ပြုထားသည်။ ယာယီလူစားလဲခြင်းမှာ ကစားသမားအနေဖြင့် ဒုတိယအကြိမ် ထပ်မံ ထိခိုက်နိုင်ခြေရှိသောကြောင့် ဘောလုံးပြိုင်ပွဲ များတွင်မူ အပိုလူစားလဲခြင်းကို အတည်အဖြစ် သတ်မှတ်ထားကြောင်း သိရသည်။
၂၀၁၉ ခုနှစ်တွင် ဂလပ်စဂိုတက္ကသိုလ် ၏ လေ့လာတွေ့ရှိချက်အရ ဘောလုံးသမားဟောင်းများအနေဖြင့် Dementia (ဦးခေါင်းထိခိုက်မှုကြောင့် ဦးနှောက်ပျက်စီးခြင်း) ဝေဒနာကြောင့် သေဆုံးနိုင်ခြေမှာ သာမန်လူများထက် သုံးဆခွဲပိုများကြောင်း သိရသည်။
