ကမ္ဘာ့ဘောလုံးအဖွဲ့ချုပ်(FIFA) က ပေးအပ်ချီးမြှင့်မည့် ၂၀၂၁ ခုနှစ် The Best FIFA အကောင်းဆုံးနည်းပြဆုအတွက် အပြီး သတ်ဆန်ခါတင်သုံးဦးစာရင်းကို ကြာသပတေးနေ့က ထုတ်ပြန်ခဲ့ကြောင်း သိရသည်။
The Best FIFA အကောင်းဆုံးအမျိုး သားအသင်း နည်းပြဆုအတွက် အပြီးသတ်စာရင်းတွင် အီတလီလက်ရွေးစင်အသင်း နည်းပြ မန်ချီနီ၊ ပရီးမီးယားလိဂ်ကလပ် မန်စီးတီးအသင်းနည်းပြ ဂွါဒီယိုလာနှင့် ချယ်လ် ဆီးအသင်းနည်းပြ သောမတ်စ်တူဟယ်လ်တို့ ရွေးချယ်ခံခဲ့ရသည်။
၎င်းတို့သုံးဦးမှာ ပြီးခဲ့ သည့် ၂၀၂၁ ခုနှစ်အတွင်း အောင်မြင်မှုရယူနိုင်ခဲ့သူများဖြစ်ပြီး မန်ချီနီမှာ အီတလီအသင်းနှင့်အတူ ယူရို-၂၀၂၀ ချန်ပီယံဆု ဆွတ်ခူးရရှိထားသည်။
ဂွါဒီယိုလာက မန်စီးတီးအသင်းနှင့်အတူ ပရီးမီးယားလိဂ်၊ လိဂ်ဖလားချန်ပီယံ ဆုရရှိထားပြီး ချန်ပီယံလိဂ်ပြိုင်ပွဲတွင်လည်း ဗိုလ်လုပွဲတက်ရောက်နိုင်ခဲ့သည်။
ထို့အတူ တူဟယ်လ်မှာ ချယ်လ်ဆီးအသင်းအား ၂၀၂၁ ခုနှစ် ဇန်နဝါရီမှသာ စတင်ကိုင်တွယ်ခွင့်ရသော်လည်း ချန်ပီယံလိဂ်ဖလားနှင့် ဥရောပ စူပါဖလား ဆွတ်ခူးရယူပေးနိုင်ခဲ့သလို FA ဖလားပြိုင်ပွဲတွင်လည်း ဗိုလ်လုပွဲတက်ရောက်နိုင်ခဲ့သည်။
၎င်းတို့သုံးဦးအနက် ဂွါဒီယိုလာ မှာ ၂၀၁၉ ခုနှစ်က အပြီးသတ်သုံးဦးစာရင်းတွင် ပါဝင်ခဲ့ဖူးသဖြင့် ယခုနှစ်တွင် ဒုတိယအကြိမ် ပါဝင်ခွင့်ရခြင်းဖြစ်ပြီး မန်ချီနီနှင့် တူဟယ်လ်မှာမူ ပထမဆုံးအကြိမ် ရွေးချယ်ခံရ ခြင်းဖြစ်သည်။
FIFA သည် အမျိုးသားအသင်းနည်းပြဆုအပြင် အမျိုးသမီးအသင်းနည်းပြဆုအတွက် အပြီးသတ်သုံးဦးစာရင်းကိုလည်း ထုတ်ပြန် ခဲ့ကြောင်း သိရသည်။
ယင်းစာရင်းတွင် ဘာစီလိုနာအသင်းအား အမျိုးသမီးချန်ပီယံလိဂ်၊ အမျိုးသမီးလာလီဂါနှင့် ရှုံးထွက်ဖလားသုံးလုံး ဆွတ်ခူးရယူပေးခဲ့သည့် နည်းပြဟောင်း လူးဝစ်ကော်တက်စ်၊ ချယ်လ်ဆီးအသင်းအား အမျိုးသမီးစူပါလိဂ်၊ FA ဖလား၊ လိဂ်ဖလား စသည့် ပြည်တွင်းဖလားသုံးခုစလုံး ရယူပေးထားသည့် အမ်မာဟေးယက်စ်၊ အင်္ဂလန်လက်ရွေးစင်အမျိုးသမီးအသင်းနည်းပြ ဆာရီနာဝီမန်းတို့ ရွေးချယ်ခံထားရသည်။
The Best FIFA အမျိုးသမီးနည်းပြဆုကို ၂၀၁၇၊ ၂၀၂၀ နှစ်ကြိမ်ရရှိထားသည့် ဝီမန်းသည် အပြီးသတ်စာရင်းတွင် ငါးနှစ်ဆက်တိုက်ပါဝင်ခွင့်ရခြင်းဖြစ်ပြီး အမ်မာဟေးယက်စ်မှာလည်း နှစ်နှစ်ဆက် ရွေးချယ်ခံထားရသည်။
၂၀၂၁ ခုနှစ်အတွက် The Best FIFA အကောင်းဆုံးဆု ချီးမြှင့်ပွဲအခမ်းအနားကို ဇန်နဝါရီ ၁၇ ရက်တွင် ဆွစ်ဇာလန်နိုင်ငံ ဇူးရစ်မြို့ရှိ FIFA ရုံးချုပ်အဆောက်အအုံတွင် ကျင်းပမည်ဖြစ်ပြီး ဆုအမျိုးအစားကိုးခု ပေးအပ်ချီးမြှင့်မည်ဖြစ်သည်။
