အဲဗာတန်အသင်းနည်းပြ ဘင်နီတက်ဇ်သည် ပရီးမီးယားလိဂ်တွင် (၇)ပွဲဆက် နိုင်ပွဲပျောက်ဆုံးနေသဖြင့် ရာထူးမှထုတ်ပယ်ခံရနိုင်သူများအနက် ရေပန်းအစားဆုံးဖြစ်လာကြောင်း သိရသည်။
အဲဗာတန်အသင်းသည် တနင်္ဂနွေနေ့က ယှဉ်ပြိုင်ကစားသည့်ပွဲတွင် တန်းတက် ဘရန့်ဖို့ဒ်အသင်းအား ပထမပိုင်း ၂၄ မိနစ်တွင် ပေးရသည့် ပယ်နယ်တီဂိုးဖြင့် ရှုံးနိမ့်ခဲ့သည်။
အဲဗာတန်အသင်းအနေဖြင့် အောက်တိုဘာလဆန်းက မန်ယူအသင်းနှင့် သရေကျသည့် ပွဲမှစတင်ကာ နှစ်လအတွင်း အမှတ်ပေးပွဲ နိုင်ပွဲတစ်ပွဲမှ ရယူနိုင်ခြင်းမရှိဘဲ နှစ်ပွဲသရေကျကာ ငါးပွဲအထိ ရှုံးနိမ့်ထားသည်။
အဲဗာတန်အသင်းသည် ပွဲစဉ် ၁၃ အပြီးတွင် လေးပွဲသာ အနိုင်ရကာ သုံးပွဲသရေ၊ ခြောက်ပွဲရှုံး၊ ၁၅ မှတ်ဖြင့် အဆင့် ၁၄ နေရာအထိ ရောက်ရှိနေသောကြောင့် နည်းပြ ဘင်နီတက်ဇ်အနေ ဖြင့် ထုတ်ပယ်ခံရနိုင်သည့်စာရင်းတွင် ထိပ်ဆုံးနေရာ ရောက်ရှိနေခြင်းဖြစ်သည်။
ဗြိတိန်လောင်းကစားဒိုင်များ၏ လောင်းကြေးဖွင့်မှုအရ ဘင်နီတက်ဇ်သည် အလေးပေးမှု ၆း၄ ဖြင့် ထုတ်ပယ်ခံရရန် ရေပန်းအစားဆုံးဖြစ်နေပြီး ၎င်း၏နောက်တွင် ဆောက်သမ်တန်အသင်းနည်းပြ ဟာဆန်ဟူတယ်က ၃း၁ ဖြင့် ဒုတိယ၊ ဝက်ဖို့ဒ်အသင်းနည်းပြ ရာနီရေးရီးက ၁၃း၂ ဖြင့် တတိယ၊ လိဒ်စ်အသင်းနည်းပြ ဘီယဲလ်ဆာက ၁ဝး၁ ဖြင့် စတုတ္ထ၊ နယူးကာဆယ်အသင်းနည်းပြ အက်ဒီဟောင်းက ၁၆း၁ ဖြင့် ပÍ္စမနေရာ ရပ်တည်နေသည်။
ဘင်နီတက်ဇ်ကမူ ”ပရိသတ်တွေရဲ့ စိတ်ပျက်မှုကို ကျွန်တော်တို့ နားလည်ပါတယ်။ ဒါပေမဲ့ ကျွန်တော်တို့လည်း ဒီရလဒ်အတွက် စိတ်ပျက်ရပါတယ်။ ဒီနေ့ပွဲမှာ ကျွန်တော်တို့ ရှုံးနိမ့်မှုနဲ့ မထိုက်တန်ပါဘူး။ ဒီအခြေအနေကို နောက်တစ်ကြိမ်ကျော်ဖြတ်နိုင်မယ်လို့ ယုံကြည်ပါတယ်” ဟု ပြောကြားသည်။
