PSG နည်းပြ ပိုချက်တီနိုက ၎င်း၏နေရာကို ဆက်ခံမည်ဟု သတင်းထွက်နေသည့် ရီးယဲလ်နည်းပြဟောင်း ဇီဒန်းမှာ ထိပ်တန်းနည်းပြတစ်ဦးဖြစ်ကြောင်း ပြောကြားခဲ့သည်။
ပိုချက်တီနိုသည် လာမည့်နွေရာသီတွင် မန်ယူအသင်းကို ပြောင်းလဲကိုင်တွယ်မည်ဖြစ်ပြီး ၎င်း၏နေရာကို ရီးယဲလ်နည်းပြဟောင်း ဇီဒန်းက ဆက်ခံမည်ဟု ဥရောပမီဒီယာများက ဖော်ပြနေကြသည်။
ရန်းစ်အသင်းနှင့် ကစားမည့်အတွက် ပြုလုပ်သည့် သတင်းစာရှင်းလင်းပွဲတွင် သတင်းထောက်များက ၎င်း၏နေရာကို ဇီဒန်း ဆက်ခံနိုင်သလားဟု ပိုချက်တီနိုအား မေးမြန်းခဲ့သည်။
ယင်းမေးခွန်းကို ပိုချက်တီနိုက “ကျွန်တော် မသိပါဘူး။ အဲဒီလိုဆုံးဖြတ်ခွင့်လည်း ကျွန်တော့်မှာ မရှိပါဘူး။ ဇီဒန်းက ထိပ်တန်းနည်းပြတစ်ဦးပါ။ သူ့အနေနဲ့ ဒါကို ရီးယဲလ်အသင်းနဲ့ သက်သေပြပြီးပါပြီ။ သူက ကမ္ဘာပေါ်မှာ ရှိတဲ့ ဘယ်အသင်းကိုမဆို ကိုင်တွယ်နိုင်ပါတယ်။ ပြီးတော့ သူက ပြင်သစ်လူမျိုးလည်း ဖြစ်တယ်။ တကယ်တော့ ဒီမေးခွန်းကို အားကစားဒါရိုက်တာ ဒါမှမဟုတ် အသင်းဥက္ကဋ္ဌကို မေးမြန်းသင့်တာပါ”ဟု ပြောကြားခဲ့သည်။
ထို့ပြင် ပိုချက်တီနိုက လက်ရှိတွင် မိမိအနေဖြင့် PSG အတွက်သာ အာရုံစိုက်ထားကြောင်းနှင့် လာမည့်နွေရာသီတွင် မန်ယူအသင်းကို ပြောင်းလဲကိုင်တွယ်မည်ဆိုသော သတင်းများမှာ မဟုတ်မှန်ကြောင်း ပြောကြားခဲ့သည်။
