ဘာစီလိုနာအသင်းသည် လိုင်ယွန်အသင်းမှ နယ်သာလန်တိုက်စစ်ကစားသမား ဒီပိုင်းကို ခေါ်ယူရန် သဘောတူညီမှုရရှိထားပြီဖြစ်ပြီး ၂၀၂၄ ခုနှစ်အထိ စာချုပ်ချုပ်ဆိုသွားမည်ဟု သတင်း များထွက်ပေါ်လျက်ရှိသည်။
နယ်သာလန်နည်းပြ ရော်နယ်လ်ကိုးမန်း ကိုင်တွယ်နေသော ဘာစီလိုနာအသင်းသည် နယ်သာလန်ကစားသမားများဖြစ်သည့် လိုင်ယွန်မှ ဒီပိုင်းနှင့် လီဗာပူးလ်မှ ၀ိုင်နယ်လ်ဒမ်းတို့ ကို ခေါ်ယူရန် ကြိုးပမ်းခဲ့ရာတွင် ၀ိုင်နယ်လ်ဒမ်းမှာ လစာပိုပေးသည့် PSG အသင်းကို ရွေးချယ်ရန် သေချာသလောက်ရှိသွားပြီဖြစ်ကြောင်း သိရသည်။
ထို့ကြောင့် ဘာစီလိုနာအသင်းသည် ဒီပိုင်းကို လက်မလွတ်ရစေရန်အတွက် စာချုပ်သက်တမ်းတိုးမြှင့်၍ ကမ်းလှမ်းခဲ့ရပြီး ဒီပိုင်းက လက်ခံခဲ့ခြင်းဖြစ်ကြောင်း သိရသည်။
ဒီပိုင်းသည် ယခုနွေရာသီတွင် လိုင်ယွန်အသင်းနှင့် စာချုပ်သက်တမ်းကုန်ဆုံးမည်ဖြစ်၍ ပြောင်းရွှေ့ ကြေးအလွတ်ဖြင့် ထွက်ခွာခွင့်ရမည်ဖြစ်သောကြောင့် ခေါ်ယူလိုသည့်အသင်းများစွာ ရှိနေကြောင်းလည်း သိရသည်။
သို့သော် ၎င်းက ဘာစီလိုနာ အသင်းထံ ပြောင်းရွှေ့ရန် ပိုမိုစိတ်အားထက်သန်နေပြီး ရော်နယ်လ်ကိုးမန်းသာ နည်းပြအဖြစ် ဆက်ရှိခဲ့ပါက အပြောင်းအရွှေ့ဖြစ်မြောက်မည် ဟု ပြောကြားခဲ့ဖူးသည်။
ဘာစီလိုနာအသင်းသည် ဒီပိုင်းအား စာချုပ်ချုပ်ဆိုမှုကို ယူရို-၂၀၂၀ ပြိုင်ပွဲမတိုင်မီ ပြုလုပ်ရန် စီစဉ်နေကြောင်း သတင်းများထွက်ပေါ်နေသလို၊ ယခုရက်ပိုင်းအတွင်း အပြောင်းအရွှေ့အပြီးသတ်နိုင် ဖွယ်ရှိနေသည်ဟု သုံးသပ်မှုများလည်း ရှိနေသည်။
