ပရီးမီးယားလိဂ်ချန်ပီယံ မန်စီးတီးအသင်းသည် စပါးအသင်းထံမှ အင်္ဂလန်လက်ရွေးစင်တိုက်စစ်မှူး ဟာရီကိန်းအားခေါ်ယူရန် ပစ်မှတ်ထားနေသော်လည်း ပြောင်းရွှေ့ကြေးနှင့်ပတ်သက်၍ စပါးအသင်းဘက်မှ အလျှော့မပေးခဲ့ပါက ၎င်းတို့၏ ကြိုးစားမှု ကို ရှေ့ဆက်သွားမည်မဟုတ်ကြောင်း သိရှိရသည်။
မန်စီးတီးအသင်းသည် ဟာရီကိန်းအားခေါ်ယူရန်အတွက် စပါးအသင်းထံ ပေါင်သန်း (၁၀၀)ဖြင့် ကမ်းလှမ်းထားဖူးပြီး ယင်းကမ်းလှမ်းမှုကို စပါးအသင်းဘက်က ငြင်းဆန်ပယ်ချခဲ့သည်ဟု သတင်းများက ဖော်ပြခဲ့သည်။
စပါးအသင်းဥက္ကဋ္ဌ ဒန်နီယဲလ်လီဗီသည် ဟာရီကိန်းအတွက် ပြောင်းရွှေ့ကြေးကို ပေါင်သန်း (၁၅၀) အလိုရှိနေသည်ဟု ဗြိတိန်မီဒီယာများကဖော်ပြခဲ့ကြပြီး မန်စီးတီးအသင်းအနေဖြင့် ယင်းပမာဏကိုပေးချေရန် ဆန္ဒမရှိပေ။
စပါးအသင်းတာဝန်ရှိသူများသည် စာချုပ်သက်တမ်း (၃)နှစ်ကျန်ရှိနေသေးသည့် ဟာရီကိန်းအား အလောတကြီးရောင်းချရန် အကြောင်းမရှိဟု ပြောကြားခဲ့ကြပြီး ၎င်းအား အသင်းတွင်ဆက်လက်ထားရှိလိုသည့် ၎င်းတို့၏ ဆန္ဒကိုထုတ်ဖော်ပြောကြားခဲ့သည်။
ဗြိတိန်သတင်းစာ Daily Mail ၏ဖော်ပြချက်အရ စပါးအသင်းသည် ယခုရာသီတွင် ဟာရီကိန်းအား အသင်း၌ ဆက်ရှိစေရန် စီစဉ်နေလျက်ရှိကြောင်း သိရှိရသည်။
ဟာရီကိန်းသည် ယူရို-၂၀၂၀ ပြိုင်ပွဲအပြီး အားလပ်ရက်ရရှိချိန်၌ ဘဟားမားစ်ကျွန်းနှင့် အမေရိကန်နိုင်ငံသို့ အပန်းဖြေခရီးသွားရောက်ခဲ့ခြင်းအတွက် အင်္ဂလန်သို့ ပြန်လည်ရောက်ရှိလာရာတွင် သီးခြားနေထိုင်ခဲ့ရပြီး ပြီးခဲ့သည့်တစ်ပတ်က ကစားခဲ့သော ပရီးမီးယားလိဂ်ပွဲစဉ် စပါး (၁-၀) မန်စီးတီးပွဲ၌ ပါဝင်နိုင်ခဲ့ ခြင်းမရှိပေ။
စပါးအသင်းနည်းပြ နူနိုဆန်တိုက ဟာရီကိန်းအနေဖြင့် သီးခြားနေထိုင်မှုအပြီး လေ့ကျင့်ခန်းအလုံအလောက် မဆင်းရသေး၍ ကြံ့ခိုင်မှုအခြေအနေအရ မန်စီးတီးနှင့်ပွဲတွင် အသုံးမပြုခဲ့ခြင်းဖြစ်သည်ဟု ထုတ်ဖော်ပြောကြားခဲ့သည်။
မန်စီးတီးအသင်းအနေဖြင့် ဟာရီကိန်းအတွက် စပါးအသင်း သတ်မှတ်ထားသောကြေးကို ပေးချေရန် ဆန္ဒမရှိဘဲ အကယ်၍ စပါးအသင်းဘက်မှ ပြောင်းရွှေ့ကြေး လျှော့ချမပေးပါက ၎င်းအား ခေါ်ယူရန်ကြိုးပမ်းမှုကို လက်လျှော့သွားမည်ဖြစ်ကြောင်း သိရှိရသည်။
ထို့ပြင် မန်စီးတီးအသင်းသည် လက်ရှိအချိန်တွင် အသက် (၂၉)နှစ်အရွယ်ရှိနေပြီ ဖြစ်သည့် ဟာရီကိန်းအား (ယခုနွေရာသီတွင် မခေါ်ယူဖြစ်ခဲ့ပါက) ၎င်း၏အသက်အရွယ်အရ လာမည့် နွေရာသီ၌ခေါ်ယူရန် ထပ်မံကြိုးပမ်းသွားမည်မဟုတ်ကြောင်း လည်း သိရှိရသည်။
