ပရီးမီးယားလိဂ်ချန်ပီယံ မန်စီးတီးအသင်းတွင် အင်္ဂလန်တောင်ပံတိုက်စစ်ကစားသမား စတာလင် နေရာရရန် ရုန်းကန်နေရခြင်းမှာ ၎င်းနှင့်မန်စီးတီးအသင်းနည်းပြ ဂွါဒီယိုလာတို့အကြား ပြဿနာဖြစ်ပွား၍ ဖြစ်နိုင်ကြောင်း မန်ယူအသင်း၏ဂန္ထဝင်ကစားသမားတစ်ဦးဖြစ်သူ ရွိုင်ကင်းက သုံးသပ်ပြောကြားခဲ့သည်။
စတာလင်သည် ယခုရာသီ မန်စီးတီးအသင်း၏ ပရီးမီးယားလိဂ်ပွဲစဉ်များတွင် ပွဲထွက်ကစားသမားအဖြစ်(၂)ပွဲသာ ကစားခဲ့ရပြီး ပွဲအများစုကို အရန်ကစားသမားအဖြစ်သာ ပါဝင်ကစားနေရသည်။
၎င်းအနေဖြင့် မန်စီးတီးအသင်းတွင် ပရီးမီးယားလိဂ်ပွဲချိန်ပြည့်ကစားခွင့်ရရှိသည့်ပွဲမှာ တစ်ပွဲသာရှိခဲ့ပြီး ပွဲကစားချိန်နည်းပါးခြင်းအတွက် အသင်း၌ မပျော်မရွှင်ဖြစ်နေကြောင်းလည်း သတင်းများထွက်ပေါ်နေသည်။
စတာလင်သည် မန်စီးတီးနှင့် ဆောက်သမ်တန်တို့ ဂိုးမရှိ သရေကျသည့်ပွဲ၌သာ ပွဲချိန်ပြည့်ကစားခဲ့ရခြင်းဖြစ်ပြီး ကျန်ပရီးမီးယားလိဂ်(၆)ပွဲ တွင်(၅)ပွဲကို အရန်ကစားသမားအဖြစ်လည်းကောင်း၊ ကျန်(၁)ပွဲတွင် လူစားလဲခံရခြင်းဖြင့်လည်းကောင်း မိနစ်အနည်းငယ်သာ ကစားခွင့်ရရှိခဲ့သည်။
စတာလင်သည် ပြီးခဲ့သည့်နွေရာသီက ကစားခဲ့သော ယူရို-၂၀၂၀ ပြိုင်ပွဲတွင် အင်္ဂလန်လက်ရွေးစင်အသင်းအတွက်ခြေစွမ်းပြခဲ့သည့် ကစားသမားတစ်ဦးဖြစ်ပြီး လက်ရှိတွင်လည်း နည်းပြဆောက်ဂိတ်၏ အင်္ဂလန်လက်ရွေးစင်အသင်း၌ အဓိက ကစားသမားအဖြစ် ကစားခွင့်ရရှိနေသည့် ကစားသမားတစ်ဦးဖြစ်သည်။
သို့ဖြစ်ရာ ကြံ့ခိုင်မှုပြည့်ဝလျက် ကလပ်အသင်းဖြစ်သည့် မန်စီးတီးအသင်းတွင် ပါဝင်ကစားချိန်နည်းပါးနေခြင်းမှာ ဘောလုံးအကြောင်းအရာကြောင့်မဟုတ်ဘဲ နည်းပြဖြစ်သူ ဂွါဒီယိုလာနှင့် ၎င်းကြားမှ ပုဂ္ဂိုလ်ရေးဆိုင်ရာ အကြောင်းအရာများကြောင့်ဖြစ်ကြောင်း ရွိုင်ကင်းက သုံးသပ်ခဲ့သည်။
ပြီးခဲ့သည့် အင်္ဂါနေ့က ကစားခဲ့သော အင်္ဂလန် – ဟန်ဂေရီ ကမ္ဘာ့ဖလားခြေစစ်ပွဲအတွက် ဘောလုံးဝေဖန်သူအဖြစ်ပြုလုပ်ခဲ့သော ရွိုင်ကင်းက ” ဆောက်ဂိတ်ဟာ ရာဟမ် (စတာလင်)ရဲ့ ပရိသတ်တစ်ဦးပါ။ ကလပ်အသင်းမှာ သူဘယ်လိုပြဿနာပဲရှိရှိ ဆောက်ဂိတ်က သူ့အပေါ်ယုံကြည်ချက်အပြည့်ရှိပါတယ်။ ဒါကြောင့် ဒီညမှာလည်း သူ့ကိုပွဲထွက်ကစားသမားအဖြစ် အသုံးပြုတာပေါ့။ မန်စီးတီးမှာတော့ ပတ် (ဂွါဒီယိုလာ)နဲ့ သူ့အကြား အချင်းများမှုတွေ ရှိကောင်းရှိနိုင်ပါတယ်။ အဲဒီမှာ ပြဿနာတစ်စုံတစ်ရာတော့ ရှိနိုင်ပါတယ်။ သူတို့က ဂရီးလစ်ရှ်ကိုလည်း ဝယ်ယူလိုက်တာကိုး”ဟု သုံးသပ်ပြောကြားခဲ့သည်။
စတာလင်သည် မန်စီးတီးအသင်းနှင့် စာချုပ်သက်တမ်း လ(၂၀)ခန့် ကျန်ရှိနေသေးပြီး သူ၏စာချုပ်မှာ လာမည့်ရာသီကုန်မှ သက်တမ်းကုန်ဆုံးမည်ဖြစ်သည်။
မန်စီးတီးအသင်းတွင် ပုံမှန်နေရာမရသည့် စတာလင်အားခေါ်ယူရန် စပိန်ကလပ် ရီးယဲလ်မက်ဒရစ်အသင်းအပါအဝင် ဥရောပအသင်းကြီးအချို့က စောင့်ကြည့်လျက်ရှိနေကြောင်း သတင်းများလည်း ထွက်ပေါ်နေသည်။
