ဘာစီလိုနာအသင်းသည် ၂၀၁၇ နွေရာသီတွင် နည်းပြ လူးဝစ်အင်းနရစ်နှင့် လမ်းခွဲခဲ့ပြီးနောက်ပိုင်း နည်းပြအပြောင်းအလဲများအတွက် လျော်ကြေးငွေ ယူရို(၃၃)သန်း ပေးချေခဲ့ရကြောင်း သိရသည်။
ဘာစီလိုနာအသင်းသည် လူးဝစ်အင်းနရစ်နှင့် လမ်းခွဲခဲ့ပြီးနောက် ဗယ်လ်ဗာဒီ၊ ဆယ်တီယန်၊ ရော်နယ်လ်ကိုးမန်းတို့နှင့် လက်တွဲခဲ့ခြင်းဖြစ်ပြီး အဆိုပါနည်းပြ (၃)ဦးစလုံးကို လျော်ကြေးပေးကာ ထုတ်ပယ်ခဲ့ရခြင်းဖြစ်သည်။
ဗယ်လ်ဗာဒီကို ထုတ်ပယ်ခဲ့ခြင်းအတွက် လျော်ကြေးအဖြစ် ယူရို(၁၁)သန်းပေးချေခဲ့ရပြီး ဆယ်တီယန်အတွက် လျော်ကြေးယူရို(၄)သန်း၊ ရော်နယ်လ်ကိုးမန်းအတွက် လျော်ကြေးယူရို(၁၃)သန်း ပေးချေခဲ့ရသည့်အပြင် ယခုနည်းပြသစ်အဖြစ် ဇာဗီကို ခန့်အပ်ရာတွင်လည်း အယ်လ်ဆတ်ဒ်အသင်းထံ လျော်ကြေး ယူရို(၅)သန်း ပေးချေခဲ့ရခြင်းကြောင့် စုစုပေါင်း ယူရို(၃၃) သန်း ရှိသွားခဲ့ခြင်းဖြစ်သည်။
အယ်လ်ဆတ်ဒ်အသင်းထံ ပေးချေရသည့် လျော်ကြေးငွေကို ဇာဗီက ကိုယ်တိုင်စိုက်ထုတ်ပေးခဲ့ခြင်းဖြစ်သော်လည်း ဘာစီလိုနာအသင်းက အရစ်ကျပုံစံဖြင့် ပြန်ပေးရမည်ဟုလည်း သိရသည်။
ဘာစီလိုနာအသင်းအနေဖြင့် ယခုကဲ့သို့ ငွေကြေးဆုံးရှုံးမှုများဖြစ်ပေါ်ခဲ့ခြင်းမှာ အသင်းအတွက် မှန်ကန်သင့်လျော်မည့်နည်းပြကို မရွေးချယ်နိုင်ခဲ့ခြင်းကြောင့်ဖြစ်ကြောင်း သုံးသပ်မှုများလည်း ရှိနေသည်။
ထို့ပြင် ဆယ်တီယန်ကို မခန့်အပ်မီကတည်းကဇာဗီကိုခန့်အပ်ခဲ့သင့်သည်ဟုလည်း ထောက်ပြခဲ့ကြသည်။
