ဇာဗီ၏ လက်ရွေးစင်ပွဲအရေအတွက်ကို ဘူးစကွက်စ် လိုက်မီခဲ့ပြီး လာမည့် ၂၀၂၂ ကျော်လွန်သည်အထိ စပိန်အတွက်ကစားပေးနိုင်မည်ဟု ယုံကြည်နေ

ဘာစီလိုနာအသင်း၏ စပိန်လက်ရွေးစင်ကွင်းလယ်လူ ဘူးစကွက်စ်သည် ဆွီဒင်အသင်းနှင့် ကစားခဲ့သည့် ၂၀၂၂ ကမ္ဘာ့ဖလားခြေစစ်ပွဲစဉ်တွင် ပါဝင်ကစားခဲ့ပြီးနောက် ၎င်း၏ လက်ရွေးစင်ကစားသမားဘဝ ပွဲအရေအတွက်မှာ (၁၃၃)ပွဲအထိရှိလာခဲ့ပြီး လက်ရှိ ဘာစီလိုနာအသင်းနည်းပြ ဇာဗီ၏ စပိန်လက်ရွေးစင်ကစားသမားဘဝ ပွဲအရေအတွက် (၁၃၃ ပွဲ) ကို လိုက်မီခဲ့ကြောင်း သိရသည်။

အသက် (၃၃)နှစ်အရွယ်ရှိကွင်းလယ်လူ ဘူးစကွက်စ်အနေဖြင့် ရာမို့စ် (၁၈၀ ပွဲ)နှင့် ကာဆီးလက်စ် (၁၆၇ ပွဲ)တို့နောက် စပိန်လက်ရွေးစင်အသင်းသမိုင်းတစ်လျှောက် တတိယပွဲအများဆုံးကစားသူအဖြစ် (ဇာဗီနှင့်ပူးတွဲ) ရပ်တည်နိုင်ခဲ့ပြီဖြစ်ပြီး ၎င်းအနေ ဖြင့် လာမည့် ၂၀၂၂ ခုနှစ်ကျော်လွန်သည်အထိ စပိန်လက်ရွေးစင်အသင်းအတွက် ကစားပေးနိုင်မည်ဟုယုံကြည်ကြောင်း ပြောကြားခဲ့သည်။

ဘူးစကွက်စ်သည် ၂၀၀၉ ခုနှစ်တွင် စပိန်လက်ရွေးစင်အသင်းအတွက် စတင်ပွဲကစားခွင့်ရရှိခဲ့ပြီး လက်ရွေးစင်အသင်းနှင့်အတူ ၂၀၁၀ ကမ္ဘာ့ဖလားနှင့် ယူရို-၂၀၁၂ ချန်ပီယံဆုများကို ဆွတ်ခူးနိုင်ခဲ့သည်။

ဘူးစကွက်စ်က ”ကျွန်တော့်အနေနဲ့ အလွန်ကောင်းမွန်ပြီး အလွန်ပျော်ရွှင်နေပါတယ်။ စပိန်အသင်းအတွက် နောက်ထပ်ပွဲတွေ အများကြီးကစားနိုင်ဖို့ ယုံကြည်ထားသလို၊ ဒီအစုအဖွဲ့နှစ်ခု (စပိန်နှင့် ဘာစီလိုနာ)မှာ ရှိနေခွင့်ရတဲ့အတွက်လည်းပျော်ရွှင်မိပါတယ်။ ၂၀၂၂ ကျော်တဲ့အထိ စပိန်အသင်းအတွက်ကစားဖို့ယုံကြည်ထားပါတယ်”ဟုဆိုခဲ့သည်။