မက်ဆီရောက်ရှိလာပြီးနောက် နေမာနှင့် ဘာပေတို့အကြားဆက်ဆံရေးတင်းမာနေဟု L’Equipe ဖော်ပြ

အာဂျင်တီးနားတိုက်စစ်မှူး မက်ဆီရောက်ရှိလာပြီးနောက် PSG အသင်းတွင် ကြယ်ပွင့်ကစားသမားများဖြစ်သည့် နေမာနှင့် ဘာပေတို့အကြား ဆက်ဆံရေးတင်းမာနေသည်ဟု L’Equipe က ဖော်ပြခဲ့သည်။

အသက် (၃၄)နှစ်အရွယ်ရှိ မက်ဆီသည် ပြီးခဲ့သည့် နွေရာသီအပြောင်းအရွှေ့ကာလတွင် ဘာစီလိုနာအသင်းက ၎င်းအားလစာပေးချေရန် မတတ်နိုင်သဖြင့် PSG အသင်းသို့ ပြောင်းရွှေ့ကြေးအလွတ်ဖြင့် ရောက်ရှိလာခဲ့သည်။

မက်ဆီ ရောက်ရှိလာပြီးနောက် PSG အသင်းတိုက်စစ်တွင် မက်ဆီ၊ နေမာ၊ ဘာပေ တို့၏အတွဲကိုကြည့်ရှုရန် ပရိသတ်များ စိတ်ဝင်စားခဲ့သော်လည်း ၎င်းတို့သုံးဦးအကြား ဆက်ဆံရေးပြိုကွဲမှုများရှိနေကြောင်း သိရသည်။

ပြင်သစ်သတင်းစာ L’Equipe က မက်ဆီရောက်ရှိလာခြင်းသည် PSG အဝတ်လဲခန်းအတွင်း ကစားသမားများ၏ ဆက်ဆံရေးကို ပြိုကွဲစေသည်ဟု ရေးသားခဲ့သည်။

နေမာနှင့် ဘာပေတို့သည် PSG အသင်းကို စတင်ရောက်ရှိလာခဲ့သည့် ၂၀၁၇ ခုနှစ်ကပင် ညီအစ်ကိုကဲ့သို့ ရင်းနှီးခဲ့ကြပြီး အလွန်ကောင်းမွန်သည့် ဆက်ဆံရေးရှိခဲ့ကြောင်း သိရသည်။

သို့သော် PSG အသင်းသို့ မက်ဆီရောက်ရှိလာပြီးနောက်တွင် နေမာသည် ဘာပေကိုခွာကာ ဘာစီလိုနာအသင်းဖော်ဟောင်း မက်ဆီနှင့် ပြန်ပေါင်းခဲ့ကြောင်း L’Equipe က ဖော်ပြခဲ့သည်။

ယင်းနောက်တွင် နေမာနှင့် ဘာပေတို့အကြား ဆက်ဆံရေးအဆင်မပြေဖြစ်ခဲ့ပြီး စက်တင်ဘာလက ကစားခဲ့သည့် PSG (၂-ဝ) မောင့်ပယ်လီယာပွဲတွင် ၎င်းတို့ စကားများခဲ့ကြသည်မှာ မြင်သာသည့်အချက်ဖြစ်ကာ ယင်းမှာ ၎င်းတို့အကြား ဆက်ဆံရေးပြိုကွဲမှုကို ပြသခြင်းဖြစ်ကြောင်း L’Equipe က ရေးသားခဲ့သည်။