PSG အသင်းမှ ဘရာဇီးလ်တိုက်စစ်မှူး နေမာ၏ မှတ်တမ်းရုပ်ရှင်ဖြစ်သော The Perfect Chaos အတွက် နမူနာဇာတ်လမ်း Trailer ထွက်ရှိလာပြီး ပရိသတ်များ၏ စိတ်ဝင်စားမှုရရှိခဲ့ကြောင်း သိရသည်။
Netflix သည် နေမာ၏ မှတ်တမ်းရုပ်ရှင်ကို အပိုင်း (၃)ပိုင်းခွဲ၍ ရိုက်ကူးထားခြင်းဖြစ်ပြီး လာမည့် ဇန်နဝါရီ(၂၅)တွင် ပထမဆုံးအပိုင်း စတင်ပြသမည်ဖြစ်သည်။
အဆိုပါမှတ်တမ်းရုပ်ရှင်ကို ဒါရိုက်တာ ဒေးဗစ်ချားလ်စ်ရိုဒရီဂွက်ဇ်က ရိုက်ကူးခြင်းဖြစ်ပြီး နေမာ၏ ပုဂ္ဂိုလ်ရေးဘဝ အသေးစိတ်အကြောင်းအရာအချို့လည်း ပါဝင်သည်ဟု သိရသည်။
ဒါရိုက်တာ ဒေးဗစ်ချားလ်စ်ရိုဒရီဂွက်ဇ်သည် နေမာနှင့် ရင်းနှီးသူတစ်ဦးဖြစ်ပြီး ယခင်က မမြင်တွေ့ခဲ့ဖူးသည့် မှတ်တမ်းရုပ်ရှင်ဇာတ်ကားတစ်ခုအဖြစ် မြင်တွေ့ရလိမ့်မည်ဟု ညွှန်းဆိုထားသည်။
Netflix ကလည်း ဘောလုံးသမိုင်း၌ အကျော်ကြားဆုံးနှင့် တန်ဖိုးအကြီးဆုံးကစားသမားတစ်ဦး၏အကြောင်းကို ပြည့်စုံစွာ ပုံဖော်ရိုက်ကူးထားသည့် မှတ်တမ်းရုပ်ရှင်ဖြစ်ကြောင်း ညွှန်းဆိုထားသည်။
အဆိုပါမှတ်တမ်းရုပ်ရှင်တွင် နာမည်ကျော်ဘောလုံးသမားများဖြစ်သည့် ဒေးဗစ်ဘက်ခမ်၊ မက်ဆီ၊ ဘာပေ စသည့် ကစားသမားများ၏ အင်တာဗျူးအစီအစဉ်များလည်း ပါဝင်ကြောင်း သိရသည်။
နေမာက ”ဒီရုပ်ရှင်ကို ဘယ်လိုစသင့်သလဲလို့ ဒါရိုက်တာအဖွဲ့ဝင်တစ်ယောက်က မေးပါတယ်။ ကျွန်တော့်အမူအကျင့်အပေါ် လူတွေထင်မြင်ချက်ပေးတာနဲ့ စသင့်တယ်ထင်တယ်လို့ ပြန်ပြောလိုက်တယ်”ဟု ပြောကြားခဲ့သည်။
