ဇန်နဝါရီလ ၃၁ ရက်တွင် အဲဗာတန် နည်းပြသစ်အဖြစ် ခန့်အပ်ခံရသည့် ဖရန့် လမ်းပတ်က မိမိတို့အား အဲဗာတန်ပရိသတ်များ ထောက်ခံအားပေးနေမည်ဟု ယုံကြည်ကြောင်း ပြောကြားခဲ့သည်။
အဲဗာတန်အသင်းသည် ဇန်နဝါရီလအစောပိုင်းက နည်းပြ ဘင်နီတက်ဇ်အား ရာထူးမှထုတ်ပယ်ပြီးနောက် အသက် ၄၃ နှစ်အရွယ်ရှိ လမ်းပတ်အား နှစ်နှစ်ခွဲသက်တမ်းရှိ စာချုပ်တစ်ရပ်ဖြင့် ခန့်အပ်ခဲ့ခြင်းဖြစ်သည်။
“အဲဗာ တန်လို အစဉ်အလာရှိတဲ့ ကလပ်အသင်းတစ်သင်းကို ကိုယ်စားပြုခွင့်ရပြီး စီမံခန့်ခွဲခွင့်ရတာဟာ ကျွန်တော့်အတွက် ကြီးမားတဲ့ ဂုဏ်ယူဖွယ်ရာ တစ်ခုပါပဲ။ ကလပ်အသင်းနဲ့အတူ အမြန်ဆုံးစတင်နိုင်ဖို့ စိတ်အားထက်သန်နေပါတယ်။ အသင်းပိုင်ရှင်၊ ဥက္ကဋ္ဌ၊ ဘုတ်အဖွဲ့ဝင်တွေနဲ့ စကားပြောပြီးချိန်မှာ သူတို့ရဲ့စိတ်အားထက်သန်မှုနဲ့ ရည်မှန်းချက်တွေကို ကျွန်တော် သိရှိခံစားမိခဲ့ပါတယ်။ သူတို့လည်း ကျွန်တော့်ရဲ့ရည်မှန်းချက်နဲ့ ကြိုးပမ်းမှုတွေကို သိရှိနားလည်လိမ့်မယ်လို့ မျှော်လင့်ပါတယ်။ ကစားသမားတွေကို ပထမဆုံးပေးချင်တဲ့ မက်ဆေ့ချ် က ကျွန်တော်တို့အတူတူ လက်တွဲလုပ်ဆောင်သွားဖို့ပါ။ ကိုယ့်အလုပ်ကို ကြိုးစားပမ်းစား လုပ်ဆောင်ပြီး ပရိသတ်တွေကလည်း အားပေးထောက်ခံနေမယ်ဆိုတာကို ကျွန်တော် သိပါတယ်”ဟု လမ်းပတ်က ပြောကြားခဲ့သည်။
လမ်းပတ်သည် ဖေဖော်ဝါရီ ၅ ရက်၌ ဘရန့်ဖို့ဒ်နှင့်ကစားမည့် FA ဖလား စတုတ္ထအဆင့်ပွဲစဉ်ကို စတင်ကိုင်တွယ်မည်ဖြစ်သည်။
