လက်ရှိအက်စတွန်ဗီလာအသင်းတွင် အငှားကစားနေသည့် ဘာစီလိုနာအသင်း၏ ဘရာဇီးလ်ကစားသမား ကော်တင်ဟိုက မိမိအနေဖြင့် လီဗာပူးလ်အသင်းမှ ဘာစီလိုနာသို့ပြောင်းရွှေ့ခဲ့ခြင်းအတွက် နောင်တမရကြောင်း ပြောကြားခဲ့သည်။
အသက်(၂၉)နှစ်အရွယ်ရှိ ကော်တင်ဟိုသည် မာဆေးလ်ဆိုက်ဒ်ဒေသခံ လီဗာပူးလ်အသင်းတွင် (၅)နှစ်ကြာ ကစားခဲ့သူဖြစ်သည်။
ယင်းနောက်တွင် ၂၀၁၈ ဇန်နဝါရီအပြောင်းအရွှေ့၌ လီဗာပူးလ်အသင်းမှ ဘာစီလိုနာအသင်းသို့ ပေါင် (၁၀၅)သန်းဖြင့် ပြောင်းရွှေ့ခဲ့သည်။
ဘာစီလိုနာကစားသမားဘဝအစပိုင်းတွင် ခြေစွမ်းပြနိုင်သော်လည်း နောက်ပိုင်းတွင် ပွဲထွက်ကစားခွင့်ရရန် ရုန်းကန်ခဲ့ရသည်။
၂၀၁၉-၂၀ ရာသီတွင် ဘိုင်ယန်မြူးနစ်သို့ တစ်ရာသီအငှားကစားခဲ့ပြီး ပြီးခဲ့သည့်လက လီဗာပူးလ်အသင်းဖော်ဟောင်း ဂျရတ် ကိုင်တွင်နေသည့် ဗီလာအသင်းသို့ အငှားဖြင့် ထပ်မံပြောင်းရွှေ့ခဲ့ခြင်းဖြစ်သည်။
ကော်တင်ဟိုသည် ဘာစီလိုနာအသင်း၌ကစားသည့် (၄)ရာသီအတွင်း ၁၀၆ ပွဲသာ ကစားခဲ့ရပြီး (၂၆)ဂိုး သွင်းယူခဲ့ကြောင်း သိရသည်။
