ရီးယဲလ်အသင်း၏ ခရိုအေးရှားဝါရင့်ကွင်းလယ်ကစားသမား မိုဒရစ်က ကာတာနိုင်ငံတွင် ကျင်းပမည့် ၂၀၂၂ ကမ္ဘာ့ဖလားပြိုင်ပွဲမှာ မိမိ၏ လက်ရွေးစင်ကစားသမားဘဝ နောက်ဆုံးပြိုင်ပွဲဖြစ်လာမည်ဟု ဖွင့်ဟပြောကြားခဲ့သည်။
အသက် (၃၇) နှစ်ကျော်ပြီဖြစ်သည့် မိုဒရစ်သည် ၂၀၁၈ ကမ္ဘာ့ဖလားပြိုင်ပွဲတွင် ခရိုအေးရှားအသင်းကို အသင်းသမိုင်းတစ်လျှောက် ဗိုလ်လုပွဲအထိ ပို့ဆောင်ပေးနိုင်ခဲ့ပြီး ပြိုင်ပွဲ၏ အကောင်းဆုံးကစားသမားဆုကိုလည်း ရရှိခဲ့သည်။
မိုဒရစ်အနေဖြင့် အသက်အရွယ်ရလာသော်လည်း ရီးယဲလ်အသင်းတွင် အဓိကကစားသမားအဖြစ် ခြေစွမ်းပြနေဆဲဖြစ်ပြီး ကစားသမားဘဝမှ အနားယူမည့် အရိပ်အယောင် မမြင်ရသေးပေ။
သို့သော် မိုဒရစ်က ”ကျွန်တော် အသက်အရွယ်ရလာပြီဆိုတာကို ကျွန်တော် သိပါတယ်။ ဒါကြောင့် လာမယ့်ကမ္ဘာ့ဖလားပြိုင်ပွဲဟာ ခရိုအေးရှားလက်ရွေးစင်အသင်းအတွက် ကျွန်တော့်ရဲ့ နောက်ဆုံးပြိုင်ပွဲဖြစ်လာပါလိမ့်မယ်”ဟု ဆိုခဲ့သည်။
