လာလီဂါပြိုင်ပွဲသမိုင်းတစ်လျှောက် ပွဲစဉ် (၁၂)အပြီး Clean Sheet ပွဲအများဆုံးရယူနိုင်သည့်အသင်းအဖြစ် ဘာစီလိုနာ စံချိန်သစ်တင်ရှိ

ဘာစီလိုနာအသင်းသည် ပြီးခဲ့သည့် အောက်တိုဘာ (၃၀)ရက်နေ့က ယှဉ်ပြိုင်ခဲ့သော ဗလင်စီယာအသင်းအား (၁-ဝ)ဂိုးဖြင့်အနိုင်ရသည့် စပိန်လာလီဂါပွဲစဉ် (၁၂)တွင် ဂိုးမပေးရအောင်စွမ်းဆောင်နိုင်ခဲ့ပြီးနောက် လာလီဂါပြိုင်ပွဲသမိုင်းတစ်လျှောက် ရာသီအဖွင့်ပွဲစဉ် (၁၂)အပြီး Clean Sheet ပွဲအများဆုံးရယူနိုင်သည့် စံချိန်မှတ်တမ်းသစ်ကို ပိုင်ဆိုင်ခဲ့ကြောင်း သိရသည်။

ဘာစီလိုနာအသင်းသည် ယခုရာသီလာလီဂါပွဲစဉ် (၁၂) ပွဲကစားပြီးချိန်တွင် ဂိုးမပေးရသည့်ပွဲ Clean Sheet (၁၀)ပွဲအထိရှိခဲ့ကာ၊ ယင်းအရေအတွက်မှာ လာလီဂါပြိုင်ပွဲသမိုင်းတစ်လျှောက် ရာသီအဖွင့်ပွဲစဉ် (၁၂)အပြီး ကလပ်အသင်းတစ်သင်း၏ စံချိန်တင် Clean Sheet အရေအတွက်ရယူနိုင်မှုအဖြစ် မှတ်တမ်းဝင်ခဲ့ခြင်းဖြစ်သည်။

ဘာစီလိုနာအသင်းသည် ယခုရာသီလာလီဂါပွဲစဉ် (၁၂)ပွဲကစားပြီးချိန်တွင် ရမှတ် (၃၁)မှတ်ရရှိကာ၊ ဇယားထိပ်ဆုံးမှ လက်ရှိချန်ပီယံရီးယဲလ်အသင်းနှင့် (၁)မှတ်အကွာ အဆင့် (၂)နေရာ၌ရပ်တည်နေသလို၊ လက်ရှိအချိန် အထိပေးဂိုး (၄)ဂိုးသာရှိထားပြီး လာလီဂါပြိုင်ပွဲတွင်သာမက ဥရောပထိပ်တန်းလိဂ် (၅)ခုတွင်ပါ ပေးဂိုးအနည်းဆုံး အသင်းအဖြစ် မှတ်တမ်းဝင်ထားသည်။

ဘာစီလိုနာအသင်းအနေဖြင့် ယခုရာသီလာလီဂါပွဲစဉ် (၁၂) ပွဲကစားပြီးချိန်တွင် ဆိုစီဒက်အဝေးကွင်းတွင် (၄-၁)ဂိုးဖြင့်အနိုင်ရခဲ့သည့် လာလီဂါပွဲစဉ် (၂)နှင့်  ရီးယဲလ်မက်ဒရစ်အသင်းအား အဝေးကွင်းတွင် (၁-၃)ဂိုးဖြင့်ရှုံးနိမ့်ခဲ့သည့် လာလီဂါပွဲစဉ် (၉)တို့တွင်သာ ဂိုးများခွင့်ပြုခဲ့ရခြင်းဖြစ်ပြီး ကျန် (၁၀)စလုံးကို ပေးဂိုးမရှိအောင်ကစားနိုင်ခဲ့ခြင်းဖြစ်သည်။

ဘာစီလိုနာအသင်း၏ Clean Sheet မှတ်တမ်းနှင့်အတူ အသင်း၏ ဂျာမနီလက်ရွေးစင်ဂိုးသမား စတီဂန်မှာလည်း ဥရောပထိပ်တန်းလိဂ် (၅)ခုတွင် Clean Sheet ပွဲအများ ဆုံးရယူနိုင်သည့် ဂိုးသမား (၁၀ ပွဲ) အဖြစ်မှတ်တမ်းဝင်နေကြောင်းသိရသည်။

ထို့ပြင် ဗလင်စီယာအသင်းနှင့်ပွဲတွင် ဘာစီလိုနာအသင်းအတွက် အဖိုးတန်နောက်ကျအနိုင်ဂိုးကိုသွင်းယူပေးခဲ့သည့် ပိုလန်ဝါရင့်တိုက်စစ်မှူး လီဝန်ဒေါစကီးမှာလည်း  ကစားသမားဘ၀ ပထမဆုံးကစားခဲ့သည့် လာလီဂါပွဲစဉ် (၁၂)ပွဲတွင် သွင်းဂိုး (၁၃)ဂိုးအထိသွင်းယူထားနိုင်ပြီး၊ ရီးယဲလ်မက်ဒရစ်တိုက်စစ်မှူးဟောင်း စီရော်နယ်လ်ဒို (၂၀၁၄-၁၅ ရာသီ၊ ရာသီအဖွင့် ၁၂ ပွဲတွင် ဂိုး ၂၀ သွင်းယူခဲ့) နောက်ပိုင်း လာလီဂါရာသီအဖွင့်ပွဲစဉ် (၁၂)အပြီး ဂိုးအများ ဆုံးသွင်းယူနိုင်သူအဖြစ် မှတ်တမ်းဝင်ခဲ့သည်။

ဘာစီလိုနာအနေဖြင့် လာလီဂါပြိုင်ပွဲတွင် ခံစစ်မှတ်တမ်းကောင်းများ ပိုင်ဆိုင်ကာ အတည်ငြိမ်ဆုံးစွမ်းဆောင်ရည်ကို ပြသနေသော်လည်း ချန်ပီယံလိဂ်ပြိုင်ပွဲတွင်မူ အုပ်စုပွဲစဉ် (၅)ပွဲ ကစားပြီးချိန်တွင် Clean Sheet (၁)ပွဲသာ ရရှိခဲ့ပြီး (၁၀)ဂိုး အထိပေးခဲ့ရကာ အုပ်စုအဆင့်မှထွက်ခွာခဲ့ရသည်။