လီဗာပူးလ်အသင်းသည် စနေနေ့က ယှဉ်ပြိုင်ကစားခဲ့သော ပရီးမီးယားလိဂ်ပွဲစဉ်တွင် လိဒ်စ်အသင်းကို အိမ်ကွင်း၌ (၁-၂)ဂိုးဖြင့် ရှုံးနိမ့်ခဲ့သည့်အတွက် ပရီးမီးယားလိဂ်အိမ်ကွင်း (၂၉)ပွဲဆက် ရှုံးပွဲမရှိစံချိန် ရပ်တန့်ခဲ့ရကြောင်း သိရသည်။
လီဗာပူးလ်အသင်းသည် ၂၀၂၁ ခုနှစ် မတ်လတွင် ဖူလ်ဟမ်အသင်းကို ရှုံးနိမ့်ခဲ့ပြီးနောက် စုစုပေါင်း(၂၉)ပွဲအထိ ရှုံးပွဲမရှိအောင် ကစားနိုင်ခဲ့ပြီး (၂၂)ပွဲအနိုင်ရကာ (၇)ပွဲသရေ ကျခဲ့သည်။
လီဗာပူးလ်အသင်းသည် ပြီးခဲ့သည့်တစ်ရာသီလုံး အိမ်ကွင်း၌ ရှုံးပွဲမရှိအောင် ကစားနိုင်ခဲ့ခြင်းဖြစ်ပြီး (၁၅)ပွဲ အနိုင်ရကာ (၄)ပွဲသရေကျခဲ့သည်။ ယခုရာသီတွင်လည်း အိမ်ကွင်း၌ ဘုန်းမောက်ကို (၉)ဂိုးသွင်းယူခြင်း၊ မန်စီးတီးကို အနိုင်ယူခြင်းတို့ဖြင့် ခြေစွမ်းပြခဲ့သော်လည်း လိဒ်စ်အသင်းကို အံ့အားသင့်ဖွယ် အရှုံးပေးခဲ့ရခြင်းဖြစ်သည်။
လီဗာပူးလ်အသင်းသည် ပြီးခဲ့သည့်ပွဲစဉ်တွင် အမှတ်ပေးဇယားအဆင့်(၂၀)နေရာမှ နော်တင်ဟမ်ဖောရက်စ်ကို ရှုံးနိမ့်ခဲ့ပြီးနောက် ယခုတစ်ပတ်တွင် အဆင့်(၁၈)နေရာမှ လိဒ်စ်အသင်းကို ထပ်မံရှုံးနိမ့်ခဲ့သည့်အတွက် တန်းဆင်းဇုန်အတွင်းမှ အသင်းနှစ်သင်းကို ဆက်တိုက်အရှုံးပေးခဲ့ရခြင်းလည်းဖြစ်သည်။
လီဗာပူးလ်အသင်းအနေဖြင့် လိဒ်စ်နှင့်ပွဲတွင် အိမ်ကွင်းမှတ်တမ်းကောင်းတစ်ခု ရပ်တန့်သွားခဲ့ရသလို၊ နောက်ခံလူ ဗန်ဒိုက်အနေဖြင့်လည်း အန်ဖီးလ်မှတ်တမ်းကောင်းတစ်ခု အဆုံးသတ်သွားခဲ့ရသည်။
ဗန်ဒိုက်သည် ၂၀၁၈ ခုနှစ်တွင် ဆောက်သမ်တန်အသင်းမှ လီဗာပူးလ်အသင်းထံ ပြောင်းရွှေ့ ရောက်ရှိလာခဲ့ပြီးနောက် အန်ဖီးလ်ကွင်း၌ ၎င်းပါဝင်ကစားသည့် ပရီးမီးယားလိဂ်ပွဲတိုင်း ရှုံးပွဲမရှိသည့်မှတ်တမ်းကို ယခုပွဲမတိုင်မီအထိ ပိုင်ဆိုင်ထားသူဖြစ်သည်။ ဗန်ဒိုက်သည် အန်ဖီးလ်ကွင်း၌ ပရီးမီးယားလိဂ်ပွဲ(၇၀)အထိ ရှုံးပွဲမရှိအောင် ကစားနိုင်ခဲ့ပြီး (၅၉)ပွဲအနိုင်ရကာ (၁၁)ပွဲသရေကျခဲ့ခြင်းဖြစ်သည်။ ထို့ကြောင့် လိဒ်စ်အသင်းသည် လီဗာပူးလ်အသင်း၏ အိမ်ကွင်းရှုံးပွဲမရှိမှတ်တမ်းကိုသာမက ဗန်ဒိုက်၏ အန်ဖီးလ်ကွင်းမှတ်တမ်းကိုပါ အဆုံးသတ်ပေးနိုင်ခဲ့ခြင်းဖြစ်ပြီး တန်းဆင်းဇုန်အတွင်းမှလည်း လွတ်မြောက်ခဲ့သည်။
ဂိုးဖြင့် ရှုံးနိမ့်ခဲ့သည့်အတွက် ပရီးမီးယားလိဂ်အိမ်ကွင်း (၂၉)ပွဲဆက် ရှုံးပွဲမရှိစံချိန် ရပ်တန့်ခဲ့ရကြောင်း သိရသည်။){kind=link}