ပြင်သစ်လက်ရွေးစင်အသင်းနည်းပြ ဒေးရွှမ့်က ကမ္ဘာ့ဖလားပြိုင်ပွဲတွင် အက်သလက်တီကိုတိုက်စစ်ကစားသမား ဂရီးဇ်မန်းအား ကွင်းလယ်တွင် အသုံးပြုဖွယ်ရှိကြောင်း ဝန်ခံပြောကြားခဲ့သည်။
၂၀၂၂ ကမ္ဘာ့ဖလားပြိုင်ပွဲဝင်ရောက် ယှဉ်ပြိုင်မည့် ပြင်သစ်အသင်း၏ လူစာရင်းတွင် ကာမာဗင်ဂါ၊ ချူအာမန်နီ၊ ရာဘီယူ၊ ဖိုဖာနာ၊ ဗယ်ရီတူ၊ ဂန်ဒူဇီတို့ကဲ့သို့ လူငယ်ကစားသမားများသာ ပါဝင်ပြီး နာမည်ကြီးကွင်းလယ်ကစားသမားများဖြစ်သည့် ပေါ့ဘာနှင့် ကွန်တေတို့မှာ ဒဏ်ရာပြဿနာများကြောင့် ကမ္ဘာ့ဖလားပြိုင်ပွဲနှင့်လွဲချော်ခဲ့ရသည်။
ထို့ကြောင့် ပြင်သစ်အသင်း၏ ကွင်းလယ်မှာ အားနည်းသွားဖွယ်ရှိနေရာ အသင်းနည်းပြ ဒေးရွှမ့်က တိုက်စစ်ကစားသမား ဂရီးဇ်မန်းကို ကွင်းလယ်၌ အသုံးပြုနိုင်ကြောင်း ပြောကြားခဲ့ခြင်းဖြစ်သည်။
“ဂရီးဇ်မန်းက တိုက်စစ်မှာ ကစားသူပါ။ ဒါပေမဲ့ သူဟာ ပွဲရဲ့ Tempo ကို ထိန်းနိုင်စွမ်းရှိသူ ဖြစ်ပါတယ်။ သူ့အနေနဲ့ တိုက်စစ်ကို လိုက်ကစားတဲ့အချိန်မှာ ခံစစ်ကို သိပ်ကူစရာ မလိုပေမဲ့ တစ်ခါတလေမှာ ခံစစ်ကိုကူညီဖို့လိုပါတယ်။ ဂရီးဇ်မန်းအနေနဲ့ အက်သလက်တီကိုအသင်းရဲ့ တိုက်စစ်မှူးတွေနောက် ကွင်းလယ်သုံးယောက်တန်းမှာ ကစားဖူးတာကြောင့် ကွင်းလယ်တိုက်စစ်နေရာမှ ကစားတာက သူ့အတွက် ပြဿနာမရှိပါဘူး” ဟု ဒေးရွှမ့်က ပြောကြားခဲ့သည်။
ကမ္ဘာ့ဖလား လက်ရှိချန်ပီယံ ပြင်သစ် အသင်းသည် အုပ်စု (D) တွင် သြစတြေးလျ၊ ဒိန်းမတ်၊ တူနီးရှားတို့နှင့်အတူ ကျရောက်နေပြီး နိုဝင်ဘာ ၂၂ ရက်တွင် သြစတြေးလျနှင့် အုပ်စုအဖွင့်ပွဲ ကစားရမည်ဖြစ်သည်။
