၂၀၂၂ ကာတာကမ္ဘာ့ဖလားပြိုင်ပွဲဝင်အသင်းများ မိတ်ဆက်

Group (F)

ဘယ်လ်ဂျီယံ

==========

■ သမိုင်းကြောင်း

ဘယ်လ်ဂျီယံဘောလုံးသမိုင်းနှင့် ပတ်သက်ပြီး တခုတ်တရ ပြောရလောက်စရာ ဆုဖလားအောင်မြင်မှုမျိုး မရှိသော်လည်း ကမ္ဘာ့ဖလားပြိုင်ပွဲတွင်တော့ အစဉ်အလာကောင်းများ၊ အတွေ့အ ကြုံကောင်းများရှိသည့် အသင်းတစ်သင်းအဖြစ် သတ်မှတ်ရ မည်ဖြစ်သည်။ ဘယ်လ်ဂျီယံလက်ရွေးစင်အသင်းသည် ကမ္ဘာ့ ဖလားပြိုင်ပွဲ ပထမဆုံးအကြိမ်စတင်ကျင်းပသည့် ၁၉၃၀ ပြိုင်ပွဲ ကတည်းက ပါဝင်ယှဉ်ပြိုင်ခဲ့သည့်အသင်းဖြစ်ကာ၊ လက်ရွေးစင် အသင်းသမိုင်းတစ်လျှောက် ကမ္ဘာ့ဖလားပြိုင်ပွဲကို (၁၃)ကြိမ်အထိ ယှဉ်ပြိုင်ခဲ့ဖူးပြီး ပြီးခဲ့သည့် ၂၀၁၈ ရုရှားကမ္ဘာ့ဖလားတွင် တတိယ ဆုရယူနိုင်ခဲ့ခြင်းက အသင်းအတွက် အအောင်မြင်ဆုံးမှတ်တမ်း ဖြစ်သည်။ ဘယ်လ်ဂျီယံအသင်းအနေဖြင့် ၂၀၀၆ နှင့် ၂၀၁၀ ကမ္ဘာ့ဖလားပြိုင်ပွဲများတွင် ခြေစစ်ပွဲမအောင်မြင်ခဲ့သောကြောင့်  ပါဝင်ယှဉ်ပြိုင်ခွင့်မရခဲ့သော်လည်း ရွှေရောင်မျိုးဆက်အစုအဖွဲ့ တစ်ခုထွက်ပေါ်လာခဲ့ခြင်းနှင့်အတူ ၂၀၁၄ နှင့် ၂၀၁၈ ကမ္ဘာ့ဖလား တို့တွင် ထိုက်သင့်သည့်စွမ်းဆောင်ရည်ကောင်းများကို ပြသနိုင် ခဲ့သည်။

■ လက်ရှိအခြေအနေ

လက်ရှိဘယ်လ်ဂျီယံလက်ရွေးစင်အသင်းတွင် ဒီဘရိုင်း နား၊ လူကာကူ၊ ကော်တိုအာတို့ကဲ့သို့ ကမ္ဘာ့အကောင်းဆုံးစာရင်း ဝင်ကစားသမားများရှိနေသလို ကာရက်စ်ကို၊ ဗစ်ဆဲလ်၊ တီလေ မန်းစ်၊ ထရိုဆက်ဒ်၊ သော်ဂန်ဟာဇက်၊ ဗစ်ဆဲလ်တို့ကဲ့သို့ ထိပ်တန်း အဆင့်ကစားသမားကိုလည်း စုဖွဲ့ထားနိုင်သည်။ သို့သော် အဓိက ကြယ်ပွင့်ကစားသမားများ အကောင်းဆုံးအချိန်ဖြစ်သည့် ၂၀၁၈ ကမ္ဘာ့ဖလားတွင်ပင် ဆုဖလားနှင့်လွဲချော်ခဲ့သည့် ဘယ်လ်ဂျီယံအ တွက် ယခုတစ်ကြိမ်မှာ ပိုမိုခက်ခဲနိုင်ပြီး၊ ပြိုင်ဘက်အသင်းကြီး များ၏ အင်အားကြီးထွားလာမှုကြောင့်လည်း အဆင့်တစ်ခုရောက် ရန်ပင် ရုန်းကန်ရဖွယ်ရှိနေသည်။ အသင်းခေါင်းဆောင်လည်းဖြစ်၊ အဓိက ကစားသမားတစ်ဦးလည်းဖြစ်သည့် ဟာဇက်ဒဏ်ရာပြ ဿနာများနှင့် ခြေစွမ်းကျဆင်းသွားခြင်းကလည်း ဘယ်လ်ဂျီယံ အသင်းအပေါ် အကျိုးသက်ရောက်မှုများစွာရှိလာနိုင်သည်။

■ အုပ်စုအလားအလာ

ပုံမှန်အရ ဘယ်လ်ဂျီယံအတွက် အခက်အခဲမရှိနိုင်သည့် အုပ်စုဟု ထင်စရာရှိသော်လည်း လက်တွေ့ကျမှုအရတော့ အမှား အယွင်းတစ်စုံတစ်ရာပြုလုပ်လို့မရအောင် ခက်ခဲနိုင်သည့်အနေ အထားအမျိုးဖြစ်နေသည်။ ၂၀၁၈ ကမ္ဘာ့ဖလားဗိုလ်လုပွဲရောက် ခရိုအေးရှားအသင်းက ဘယ်လ်ဂျီယံအတွက် အုပ်စုအတွင်းအဓိ ကပြိုင်ဘက်ဖြစ်လာမည်ဖြစ်ပြီး အာဖရိကဇုန်မှ မော်ရိုက အုပ်စု ၏ ဖျက်မြင်းအသင်းဖြစ်လာနိုင်သည်။ အုပ်စုအဖွင့်ပွဲအဖြစ်ရင်ဆိုင်  ရမည့် ကနေဒါနှင့်ပွဲစဉ်က ဘယ်လ်ဂျီယံအသင်းအတွက် ယုံကြည် မှုတည်ဆောက်နိုင်ရန် အရေးပါသည့်ပွဲစဉ်ပြီး၊ ပုံမှန်စွမ်းဆောင်ရည် ပြသနိုင်လျှင် အုပ်စုမှသေချာပေါက် တက်ရောက်နိုင်သည်။

■ ခရိုအေးရှား

=========

လက်ရွေးစင်အသင်းသမိုင်းတစ်လျှောက် ပထမဆုံးအကြိမ် ယှဉ်ပြိုင်ခွင့်ရသည့် ၁၉၉၈ ကမ္ဘာ့ဖလားတွင် တတိယနေရာရပြီး ဘောလုံးကမ္ဘာဆီတိုးဝင်လာခဲ့သည့် ခရိုအေးရှားသည် ပြီးခဲ့သည့် ၂၀၁၈ ကမ္ဘာ့ဖလားတွင်လည်း ဗိုလ်လုပွဲတက်ရောက်နိုင်သည် အထိ အမြင့်ဆုံးပေါက်ကွဲအားကို ပြသနိုင်ခဲ့သည့်အသင်းဖြစ် သည်။ ဥရောပထိပ်တန်းလက်ရွေးစင်အသင်းကြီးတွေအတွက် ခေတ်အဆက်ဆက် အမာကျောဆုံးပြိုင်ဘက်အသင်းအဖြစ် ရပ်တည်နိုင်ခဲ့ပြီး အသင်း၏ပြိုင်ပွဲကြီးအတွေ့အကြုံနှင့် ကစား သမားများ၏ အရည်အသွေးအရ ၂၀၂၂ ကမ္ဘာ့ဖလားတွင်လည်း အဓိကဖျက်မြင်းအသင်းဖြစ်လာနိုင်သည်။ ခရိုအေးရှားအသင်းအ တွက် စိုးရိမ်စရာဖြစ်လာနိုင်သည်က အသက်အရွယ်ရနေသည့် ဝါရင့်ကစားသမားကို အဓိအားပြုနေရသည့်အခြေအနေဖြစ်ပြီး လူငယ်ကစားသမားများဆီမှ ပုံစံကောင်းရနိုင်ခဲ့လျှင်တော့ အုပ်စု မှတက်ရောက်ရန် မခက်ခဲနိုင်ပေ။ လက်ရှိခြေစွမ်းနှင့် ပြိုင်ဘက် အသင်းများ၏ အရည်အသွေးအရ ခရိုအေးရှားအတွက် အမြင့် ဆုံးမျှော်လင့်နိုင်မည်မှာ ကွာတားဖိုင်နယ်သာဖြစ်လိမ့်မည်။

■ မော်ရိုကို

========

အာဖရိကဒေသ၏ အစဉ်အလာကြီးမားသည့်အသင်းတစ် သင်းဖြစ်ပြီး ကမ္ဘာ့ဖလားပြိုင်ပွဲနှင့်ပတ်သက်ပြီးလည်း ထိုက်သင့် သည့်အတွေ့အကြုံများကို ပိုင်ဆိုင်ထားသည့်အသင်းတစ်သင်း ဖြစ်သည်။ မော်ရိုကိုသည် လက်ရွေးစင်အသင်းသမိုင်းတစ်လျှောက် ကမ္ဘာ့ဖလားပြိုင်ပွဲကို (၅)ကြိမ်ယှဉ်ပြိုင်ခဲ့ဖူးပြီး ၁၉၈၆ ကမ္ဘာ့ဖလား ပြိုင်ပွဲတွင် ရှုံးထွက် (၁၆)သင်းအဆင့်တက်ရောက်ထားနိုင်သည့် အစဉ်အလာလည်းရှိနေသည်။ ဘယ်လ်ဂျီယံ၊ ခရိုအေးရှားတို့နှင့် နှိုင်းယှဉ်ပါက အုပ်စုမှ တက်ရောက်နိုင်ရန် ရာခိုင်နှုန်းအနည်း ငယ်သာရှိသော်လည်း ယင်းနှစ်သင်းအတွက် အခက်ခဲဆုံးပြိုင် ဘက်အဖြစ် ရပ်တည်နေသည့် အခြေအနေမျိုးဖြစ်သည်။ အဓိက ကစားသမား ဇီယာ့ရှ်ပြန်လည်ပါဝင်လာခဲ့ခြင်းက မော်ရိုကိုအ တွက် အလှည့်အပြောင်းတစ်ခုဖြစ်လာနိုင်ပြီး ဘွန်နူ၊ မာဇာရာဝီ၊  ဟာကီမီ၊ ဆာအိ၊ အန်နက်ဆီရီ၊ ဘူဖယ်၊ ဟာရစ် အစရှိသည့် ကစားသမားများက ဘာမဆိုစွမ်းဆောင်ပြနိုင်သည်။

■ ကနေဒါ

======

၂၀၂၂ ကမ္ဘာ့ဖလားမှာ ကနေဒါအသင်းအတွက်  သမိုင်းတစ်လျှောက် ဒုတိယအကြိမ်မြောက်ယှဉ်ပြိုင်ခွင့်ရသည့် ကမ္ဘာ့ ဖလားဖြစ်ပြီး ၁၉၈၆ ပြိုင်ပွဲနောက်ပိုင်း ပထမဆုံးအကြိမ်တစ်ကျော့ ပြန်ယှဉ်ပြိုင်ခွင့်ရခဲ့ခြင်းဖြစ်သည်။ ယင်းအခြေအနေကပင် ကနေ ဒါအသင်းအတွက် ဂုဏ်ယူရမည့်အခြေအနေဖြစ်ပြီး လာမည့် ၂၀၂၂ ကမ္ဘာ့ဖလားတွင်တော့ အဖြည့်ခံအသင်းတစ်သင်းအဆင့် အတန်းမျိုးသာရှိနေသည်။ ပြည်တွင်းအခြေစိုက် ကစားသမား များဖြင့် အဓိကစုဖွဲ့ထားသည့် ကနေဒါအသင်း၏ လူစာရင်းက အုပ်စုတွင်းအားအနည်းဆုံးဖြစ်နေပြီး ဘိုင်ယန်မြူးနစ်နောက်ခံ လူ အယ်လ်ဖွန်ဆိုဒေးဗီးစ် မပါနိုင်လျှင် အသင်းအတွက် ပို၍ ခက်ခဲသွား နိုင်သည့်အခြေအနေမျိုးဖြစ်သည်။ လိုင်လီတိုက်စစ်မှူး ဂျွန်နသန်ဒေးဗစ်က ကနေဒါအသင်း၏အရေးပါဆုံး အဓိက လက်နက်ဖြစ်လာနိုင်ပြီး အုပ်စုပြိုင်ဘက်အသင်းများအတွက် စာမေးပွဲစစ်ပေးရမည့် အသင်းဖြစ်သည်။