ကြာသပတေးနေ့ည နူးကမ့်တွင် မန်ယူနှင့်တွေ့ဆုံးရာတွင် တိုက်စစ်မှူးရက်ရှ်ဖို့ကို တားဆီးနိုင်ရေးအတွက် ဘာစီလိုနာအသင်းသားများကို အနီရောင်အဆင့် သတိပေးထားကြောင်း ဘာစီလိုနာ နည်းပြချုပ် ဇာဗီးက ပြောဆိုလိုက်သည်။
ကမ္ဘာ့ဖလားအပြီး မန်ယူအတွက် ၁၅ ပွဲကစားရာတွင် ရက်ရှ်ဖို့သည် စုစုပေါင်း ၁၃ ဂိုးသွင်းယူထားသည်။ တန်းဟက်၏အသင်းသည် ဘာစီလိုနာအတွက် နည်းလမ်းပေါင်းစုံဖြင့် ဒုက္ခပေးနိုင်သည်မှာ မှန်သော်လည်း ရက်ရှ်ဖို့သည် အန္တရာယ်အပေးနိုင်ဆုံးကစားသမားဖြစ်ကြောင်း ဇာဗီး ထောက်ပြ ပြောဆိုလိုက်ခြင်းဖြစ်သည်။
“သူက ဥရောပမှာ အန္တရာယ်ပေးနိုင်မှုအရှိဆုံး ကစားသမားတစ်ဦးပါ။ သူကအရမ်းမြန်သလို တစ်ယောက်ချင်းတွေ့ရင်လည်း ကျော်ဖြတ်နိုင်စွမ်းရှိပါတယ်။ တန်ပြန်တိုက်စစ်ကို အစပြုတဲ့နေရာမှာလည်း ကောင်းတယ်။ ကျွန်တော်တို့က ကစားသမားတစ်ယောက်တည်းကိုပဲ အာရုံစိုက်လို့မရဘူး။ တန်းဟက်အသင်းက ဘာတွေလုပ်နိုင်လည်းဆိုတာ ခွဲခြမ်းစိတ်ဖြာကြည့်နိုင်ရမယ်။ သူတို့က တန်ပြန်တိုက်စစ်ကို အကွက်ဖော်ရာမှာလည်း ဂါနာချို ဝက်ဟော့စ်နဲ့ဆန်ချိုတို့ကြောင့် သိပ်ကောင်းတယ်။ တန်ပြန်တိုက်စစ်ကလည်း အရမ်းမြန်ပြီး ထိရောက်တယ်။ သူတို့မှာ အရမ်းသန်မာတဲ့ ခြေထောာက်တွေ ရှိတယ်လို့လည်း ပြောလို့ရပါတယ်။ မန်ယူရဲ့ အမြန်နှုန်းကို ထိန်းချုပ်နိုင်ဖို့ ဘာဆာ ကစားသမားတွေကို မှာထားတယ်။ သူတို့အားလုံးကို သတိထားရမယ်၊ ရက်ရှ်ဖို့ကတော့ ထိပ်ဆုံးကပေါ့”ဟု ဇာဗီးက ပြောဆိုလိုက်သည်။
ဘာစီလိုနာသည် လက်ရှိလာလီဂါဘောလုံးရာသီ တွင်ပေးဂိုး ၇ ဂိုးသာ ပေးထားရသည်။ သို့ရာတွင် အင်တာနှင့် ဘိုင်ယန်ပါသည့် ချန်ပီယံလိဂ်အုပ်စုမှ နေ၍ ယူရိုပါလိဂ်ကို ဆင်းကစားခဲ့ရခြင်းကြောင့် ဘာစီလိုနာသည် ဥရောပတွင် ပြည်တွင်းပွဲစဉ်များလောက် ခြေစွမ်းမကောင်းဟု သုံးသပ်နိုင်ကြောင်း မီဒီယာများကဖော်ပြသည်။
