လီဗာပူးလ်ကွင်းလယ်ကစားသမားသစ် မက်အယ်လစ္စတာက မိမိအနေဖြင့် လီဗာပူးလ်အသင်းနှင့် ပိုကောင်းသည့် ကစားသမားဖြစ်လာရန် ရည်မှန်းထားကြောင်း ပြောကြားခဲ့သည်။
လီဗာပူးလ်အသင်းသည် ဘရိုက်တန်အသင်း၏ အာဂျင်တီးနားကွင်းလယ်ကြယ်ပွင့် ကစားသမားတစ်ဦး ဖြစ်သည့် မက်အယ်လစ္စတာအား ပြောင်းရွှေ့ကြေး ပေါင် (၃၅)သန်းဖြင့် အပြီးသတ်စာချုပ်ခေါ်ယူနိုင်ခဲ့ကြောင်း သိရှိရသည်။
ယခု ပေးချေရသည့် ပြောင်းရွှေ့ကြေးသည် ကနဦးပြောင်းရွှေ့ကြေးသာဖြစ်ပြီး မက်အယ်လစ္စတာ၏ အနာဂတ်အောင်မြင်မှုများအပေါ် မူတည်ကာ ပြောင်းရွှေ့ကြေး ပမာဏမှာ ပေါင် (၅၅)သန်းအထိ ရောက်ရှိသွားနိုင်သည် ဟုလည်း သိရှိရသည်။
မက်အယ်လစ္စတာသည် ပြီးခဲ့သည့်ရာသီက ဘရိုက်တန်အသင်းအား ရာသီကုန် အဆင့် (၆)နေရာတွင် ရပ်တည်နိုင်အောင် စွမ်းဆောင်ပေးနိုင်ခဲ့ပြီး ဘရိုက်တန်အသင်းသည် ကလပ်အသင်းသမိုင်းတစ်လျှောက်တွင် ပထမဆုံးအကြိမ်အဖြစ် ယူရိုပါလိဂ်ဝင်ခွင့်ရရှိခဲ့ကြောင်းလည်း သိရှိရသည်။
အသက် (၂၄) နှစ်အရွယ်သာရှိသေးသူ မက်အယ်လစ္စတာသည် ဘရိုက်တန်အသင်းတွင် စုစုပေါင်း (၁၁၂) ပွဲကစားပေးခဲ့ရာ၌ သွင်းဂိုး (၂၀)ဂိုးသွင်းယူပေးနိုင်ခဲ့ကာ ၂၀၂၂ ကမ္ဘာ့ဖလားပြိုင်ပွဲဝင် အာဂျင်တီးနားအသင်းအတွက် ရွေးချယ်ခံခဲ့ရသည်။ ယင်းနောက် ကာတာကမ္ဘာ့ဖလားပြိုင်ပွဲတွင် အာဂျင်တီးနားအသင်းက အနိုင်ရဗို်လ်စွဲခဲ့ရာတွင်လည်း အဓိက ကစားသမားတစ်ဦးအဖြစ် ခြေစွမ်းပြကစားနိုင်ခဲ့သူဖြစ် သည်။
မက်အယ်လစ္စတာက “အိပ်မက်တွေ အမှန်တကယ်ဖြစ်လာခဲ့တာဖြစ်ပြီး လီဗာပူးလ်အသင်းအတွက် ပွဲထွက်ကစားခွင့်ရဖို့ ကျွန်တော် မစောင့်နိုင်တော့ပါဘူး။ ကျွန်တော် လီဗာပူးလ်ကို အမြန်ဆုံးပြောင်းရွှေ့ချင်ခဲ့ပြီး ရာသီကြိုခြေစမ်းခရီးစဉ်တွေ မတိုင်ခင် ပထမဆုံးနေ့ကတည်းက အသင်းမှာ ရှိချင်ခဲ့တာပါ။ အခု အရာအားလုံးက အကောင်းဆုံးဖြစ်လာခဲ့ပြီး ကျွန်တော့်ရဲ့အသင်းဖော်သစ်တွေနဲ့လည်း အမြန်ဆုံးတွေ့ဖို့ လုပ်ဆောင်နေပါတယ်။ ဒီနှစ်က ကျွန်တော့်အတွက် အရမ်းထူးခြားတဲ့ နှစ်တစ်နှစ် ဖြစ်ပါတယ်။ ကမ္ဘာ့ဖလားမှာ လက်ရွေးစင်အသင်းနဲ့အတူ အောင်မြင်ခဲ့သလို၊ ဘရိုက်တန်အသင်းနဲ့အတူ အောင်မြင်မှုတွေလည်း ရခဲ့ပါတယ်။ အခု လီဗာပူးလ်အသင်းကို ပြောင်းရွှေ့ခွင့်ရခဲ့ပြန်ပါပြီ။ အခုအချိန်မှာ လီဗာပူးလ်အသင်းနဲ့အတူ ပိုကောင်းတဲ့ ကစားသမားဖြစ်လာဖို့နဲ့ ပိုကောင်းတဲ့ လူသားတစ်ဦးဖြစ်လာဖို့ကို ကျွန်တော် အာရုံစိုက်နေပါတယ်”ဟု ပြောကြားခဲ့သည်။
လီဗာပူးလ်အသင်းသည် ယခုရာသီတွင် အသင်း၏ ကွင်းလယ်ကစားသမားများဖြစ်သည့် ဂျိမ်းစ်မီလ်နာ၊ နာဘီကီတာ၊ ချိန်ဘာလိန်တို့နှင့် လမ်းခွဲထားရာ အသင်းနည်းပြဖြစ်သူ ယာဂန်ကလော့ပ်သည် ကွင်းလယ်ကို ပြန်လည်အားဖြည့်ရန် ပြင်ဆင်နေပြီး မက်အယ်လစ္စတာကို ပထမဆုံးခေါ်ယူခဲ့ခြင်းလည်း ဖြစ်သည်။
