စပိန်လက်ရွေးစင်ကွင်းလယ်လူ ရိုဒရီက လက်ရှိအချိန်တွင် UEFA Nations League ချန်ပီယံဆုရယူနိုင်ရေးမှာ အရေးကြီးဆုံးဖြစ်ကြောင်း ထုတ်ဖော်ပြောကြားခဲ့သည်။
ရိုဒရီသည် ကြာသပတေးနေ့က အီတလီအသင်းအား အနိုင်ရသည့် ဆီမီးဖိုင်နယ်ပွဲတွင် ပွဲချိန်ပြည့်ပါဝင်ကစားပြီး ယင်းပွဲ၏ အကောင်းဆုံးကစားသမားဆု ရရှိခဲ့သူဖြစ်သည်။ စပိန် အသင်းရရှိခဲ့သည့် အနိုင်ဂိုးမှာလည်း ရိုဒရီ၏ ၁၈ ကိုက်စည်းအပြင်ဘက်မှကန်သွင်းမှု အီတလီကစားသမားနှင့် ထိသွားရာမှတစ်ဆင့် ဟိုဆေးလူက အနီးကပ်ပိတ်သွင်းယူခဲ့ခြင်းဖြစ်သည်။
“အခုအချိန်မှာ အရေးကြီးဆုံးက ဒီချန်ပီယံဆုကို ကျွန်တော်တို့ ရယူနိုင်ဖို့ပါပဲ။ ကျွန်တော်တို့အသင်းက ဆုဖလားမရတာ အချိန်အတော်ကြာပါပြီ။ အဲဒါကြောင့် ဒီနေ့ကစားရမယ့်ပွဲက ကျွန်တော်တို့အတွက် အခွင့်အရေးပါပဲ” ဟု ၎င်းင်းက ပြောကြားခဲ့သည်။
အသက် ၂၆ နှစ်ရှိပြီဖြစ်သူ ရိုဒရီသည် မန်စီးတီးအသင်းနှင့် ဖလားသုံးလုံးအောင်မြင်မှုရယူအပြီး ရက်ပိုင်းအကြာမှာပင် စပိန်လက်ရွေးစင်အသင်းအတွက် သွားရောက်ကစားနေခြင်းဖြစ်သည်။ ရိုဒရီသည် ချန်ပီယံလိဂ် ဗိုလ်လုပွဲတွင် မန်စီးတီးအသင်းအတွက် တစ် လုံးတည်းသော အနိုင်ဂိုးသွင်းယူပေးခဲ့သလို ယင်းပွဲ၏ အကောင်းဆုံးကစားသမားဆုရရှိခဲ့သည်။
ထို့ပြင် ၎င်းသည် ၂၀၂၂-၂၀၂၃ ရာသီ ချန်ပီယံလိဂ်ပြိုင်ပွဲ၏ အကောင်းဆုံးကစားသမားဆု ဆွတ်ခူးရရှိခဲ့သလို အကောင်းဆုံးအသင်း ၁၁ ဦးစာရင်းတွင်လည်း မန်စီးတီး အသင်းဖော် ဝေါ်လ်ကာ၊ ဒီယက်စ်၊ ဂျွန်စတုန်းစ်၊ ဒီဘရိုင်းနား၊ ဘာနာဒိုဆေးလ်ဗား၊ ဟော်လန်း တို့နှင့်အတူ ပါဝင်ခဲ့သည်။
