ဟာဗက်ဇ်ကိုခေါ်ယူရန် အာဆင်နယ်အသင်း ပုဂ္ဂိုလ်ရေးသဘောတူညီမှု ရရှိခဲ့ပြီဖြစ်ပြီး ကွင်းလယ်လူ ပါတေးကို ရောင်းထုတ်ရန် ဆွေးနွေးနေ

အာဆင်နယ်အသင်းသည် ချယ်လ်ဆီးအသင်းမှ ဂျာမန်တိုက်စစ်ကစားသမား ဟာဗက်ဇ်ကို ခေါ်ယူရန် ပုဂ္ဂိုလ်ရေးသဘောတူညီမှုရရှိခဲ့ပြီဖြစ်ပြီး နိုင်ငံတကာရက်သတ္တပတ်အလွန်၌ အပြောင်းအရွှေ့ အပြီးသတ်နိုင်ဖွယ်ရှိကြောင်း အီတလီ ဂျာနယ်လစ် ဖာဘရီဇီယိုရိုမာနိုက ဖော်ပြခဲ့သည်။

အာဆင်နယ်အသင်းသည် တိုက်စစ်ပိုင်းကို အားဖြည့်ရန်အတွက် ဟာဗက်ဇ်ကို ကြိုးပမ်းခဲ့ခြင်းဖြစ်ပြီး ချယ်လ်ဆီးအသင်းကလည်း နွေရာသီတွင် အပြောင်းအလဲများစွာ ပြုလုပ်သွားရန် စီစဉ်နေသည့်အတွက် အပြောင်းအရွှေ့ဖြစ်မြောက်ရန် နီးစပ်ခဲ့ခြင်းဖြစ်ကြောင်း ဖာဘရီဇီယိုရိုမာနိုက သုံးသပ်ခဲ့သည်။

ဟာဗက်ဇ်(၂၄ နှစ်)သည် ချယ်လ်ဆီးအသင်းနှင့် ၂၀၂၅ ခုနှစ်အထိ စာချုပ်ချုပ်ဆိုထားသော်လည်း ပြီးခဲ့သည့်ရာသီက အသင်း၏အခြေအနေဆိုးရွားခဲ့ပြီး ဥရောပဝင်ခွင့်နှင့် လွဲချော်ခဲ့ရသည့်အတွက် ချန်ပီယံလိဂ်ဝင်ခွင့်ရရှိခဲ့သော အာဆင်နယ်အသင်းထံ ပြောင်းရွှေ့ရန် သဘောတူညီခဲ့ခြင်းဖြစ်ကြောင်း သိရသည်။

အာဆင်နယ်အသင်းသည် ကစားသမားနှင့် ပုဂ္ဂိုလ်ရေးဆိုင်ရာ သဘောတူညီမှုရရှိခဲ့ပြီဖြစ်သော်လည်း ပြောင်းရွှေ့ကြေးအတွက်မူ ချယ်လ်ဆီးအသင်းနှင့် ဆက်လက်ဆွေးနွေးနေဆဲဖြစ်ကြောင်း သိရသည်။ ချယ်လ်ဆီးအသင်းက ၂၀၂၀ ခုနှစ်တွင် လေဗာကူဆင်အသင်းထံမှ Add-ons ကြေးအပါအဝင် ပေါင်(၇၁)သန်းဖြင့် ခေါ်ယူခဲ့သည့် ဟာဗက်ဇ်ကို လက်ရှိအချိန်တွင်လည်း ပေါင်သန်း(၇၀)ဝန်းကျင်ရရှိရန် လိုလားနေကြောင်း သိရသည်။

အာဆင်နယ်အသင်းက ပေါင်သန်း (၆၀) ဖြင့်သာ စတင်ကမ်းလှမ်းခဲ့ခြင်းကြောင့် အသင်းနှစ်သင်းကြား ညှိနှိုင်းဆွေးနွေးမှုများ ထပ်မံပြုလုပ်ရဦးမည်ဖြစ်သော်လည်း သဘောတူညီမှုရရှိလာရန် အလားအလာကောင်းနေကြောင်း အပြောင်းအရွှေ့ကျွမ်းကျင်သူ ဖာဘရီဇီယိုရိုမာနိုက သုံးသပ်ခဲ့သည်။

ဟာဗက်ဇ်သည် လက်ရှိအချိန်တွင် ဂျာမနီလက်ရွေးစင်အသင်းနှင့်အတူ ခြေစမ်းပွဲများ ယှဉ်ပြိုင်ကစားနေသောကြောင့် နိုင်ငံတကာရက်သတ္တပတ်အလွန်မှသာ ဆွေးနွေးမှုများကို တေ့တေ့ဆိုင်ဆိုင်လုပ်ဆောင်သွားနိုင်ဖွယ်ရှိကြောင်းလည်း သိရသည်။

အာဆင်နယ်အသင်းသည် ဝက်စ်ဟမ်းအသင်းမှ အင်္ဂလန်ကွင်းလယ်ကစားသမား ဒက်ကလန်ရိုက်စ်နှင့် ဆောက်သမ်တန်အသင်းမှ ဘယ်လ်ဂျီယံကွင်းလယ်ခံစစ်ကစားသမား ရိုမီယိုလာဗီယာတို့ကိုလည်း ခေါ်ယူရန် ကြိုးပမ်းနေသည်။

ထို့ပြင် ကွင်းလယ်၌ အားဖြည့်မှုများ ပြုလုပ်ရန်စီစဉ်နေသလို၊ အသက်(၃၀)ရှိပြီဖြစ်သည့် ဂါနာကွင်းလယ်လူ သောမတ်စ်ပါတေးကို ပြန်လည်ရောင်းထုတ်ရန် စီစဉ်နေကြောင်းလည်း သိရသည်။ အာဆင်နယ်အသင်းသည် ၂၀၂၅ ခုနှစ်တွင် စာချုပ်သက်တမ်းကုန်ဆုံးမည့် သောမတ်စ်ပါတေးကို သက်တမ်းတိုးလိုခြင်းမရှိတော့သဖြင့် ပြောင်းရွှေ့ကြေးရရှိမည့် ယခုနွေရာသီ၌ ရောင်းထုတ်ရန် စီစဉ်လာခြင်းဖြစ်ကြောင်း သိရသည်။

အာဆင်နယ်အသင်းသည် ဝါရင့်ကွင်းလယ်လူ ချာကာနှင့်လည်း လမ်းခွဲတော့မည်ဖြစ်၍ ပြီးခဲ့သည့်ရာသီက ခြေစွမ်းပြခဲ့သည့် အမာခံကစားသမားနှစ်ဦးစလုံးကို ဆုံးရှုံးရမည့်အခြေအနေလည်း ဖြစ်နေသည်။