ကွင်းလယ်ကစားသမား ဒက်ကလန်ရိုက်စ်အတွက် အာဆင်နယ်၏ ပြောင်းရွှေ့ကြေးပေါင် ၁၀၅ သန်းဖြင့်ကမ်းလှမ်းမှုကို ဝက်စ်ဟမ်းက သဘောတူညီလိုက်ပြီဖြစ်သည်။ အာဆင်နယ်သည် ကနဦးပြောင်းရွှေ့ကြေးပေါင် သန်း ၁၀၀ အခြားအပိုဆုကြေးပေါင် ၅ သန်း စုစုပေါင်း ပေါင် ၁၀၅ သန်းဖြင့်ကမ်းလှမ်းခြင်းဖြစ်သည်။
ယခုအခါဝက်စ်ဟမ်းနှင့် အာဆင်နယ်တာဝန်ရှိသူများသည် အပြောင်းအရွှေ့ကို အပြီးသတ်နိုင်ရေးအတွက် ဗုဒ္ဒဟူးနေ့ညတွင် တွေ့ဆုံးဆွေးနွေးမှုများဆက်လက်ပြုလုပ်နေသည်။ ကနဦးပြောင်းရွှေ့ကြေးပေါင်သန်း ၁၀၀ ကို အာဆင်နယ်က ၄ ရစ်ခွဲပေးလိုပြီး ဝက်စ်ဟမ်းက ၂ ရစ်သာခွဲပေးစေလိုသောကြောင့် ဆွေးနွေးနေခြင်းဖြစ်ကြောင်း ဗြိတိန်သတင်းစာတစ်စောင်က ဖော်ပြသည်။
သို့ရာတွင် အဆိုပါကိစ္စသည် ကြီးမားသည့် ပြဿနာတစ်ရပ်မဟုတ်ဘဲ အပြောင်းအရွှေ့မှာ မကြာမီအပြီးသတ်သတောတူညီမှု ရရှိကာ ထုတ်ပြန်ကြေညာဖွယ်ရှိကြောင်းလည်း သတင်းများက ဆက်လက်ဖော်ပြသည်။ ရိုက်စ်သည် ဗုဒ္ဓဟူးနေ့မနက်ပိုင်းက အာဆင်နယ်၏ကမ်းလှမ်းမှုကို လက်ခံစေလိုကြောင်း ဝက်စ်ဟမ်းတာဝန်ရှိသူများကို ထုတ်ဖော်ပြောဆိုပြီးနောက် အပြောင်းအရွှေ့သည် ယခုကဲ့သို့ လျှင်လျှင်မြန်မြန်တိုးတက်လာခြင်းဖြစ်သည်။
အာဆင်နယ်သည် ရိုက်စ်နှင့် ပုဂ္ဂိုလ်ရေးသဘောတူညီမှုရရှိရန်လည်း ဆွေးနွေးနေသည်။ ရိုက်စ်သည် အာတီတာ၏ အသင်းတွင် ကစားရန်စိတ်ဝင်စားနေခြင်းကြောင့် ပုဂ္ဂိုလ်ရေးသဘောတူညီမှုရရှိရန်မှာလည်း ခက်ခဲမည်မဟုတ်ကြောင်း မီဒီယာများက သုံးသပ်ရေးသားသည်။ အာဆင်နယ်သည် တစ်ပတ်လျှင် လုပ်ခပေါင် ၂၅၀,၀၀၀ ဖြင့် နှစ်ရှည်စာချုပ် ချုပ်ဆိုနိုင်ရန် ရိုက်စ်ကို ကမ်းလှမ်းမည်ဖြစ်သည်။ အသက် ၂၄ နှစ်အရွယ်ရှိရိုက်စ်သည် ဝက်စ်ဟမ်းအတွက် ၂၄၅ ပွဲကစားပြီး ၁၅ ဂိုးသွင်းယူပေးခဲ့သည်။
