အပြောင်းအရွှေ့ ကာလ တရားဝင် ဖွင့်တာ နှစ်ပတ် ကျော်လောက်ပဲ ရှိသေးပေမယ့် အာဆင်နယ် အသင်းဟာ ကစားသမား ခေါ်ယူမှုတွေ ဆက်တိုက် ပြုလုပ်နေပါတယ် ။ အာဆင်နယ် အသင်းဟာ ချဲလ်ဆီး အသင်းကနေ ဟာဗက်ဇ် ကို ပေါင် ၆၅ သန်း နဲ့ ခေါ်ယူ ထားပြီး ဖြစ်သလို ရိုက်စ် နှင့် တင်ဘာ ကိုလည်း ခေါ်ယူဖို့ သဘောတူညီမှု ရထားပါတယ် ။
အဆိုပါ ကစားသမား ၃ ဦး အတွက် အာဆင်နယ် အသင်းဟာ ပေါင် သန်း ၂၀၀ နီးပါး သုံးစွဲ ထားတာပါ ။ ဒါပေမယ့်လည်း အာဆင်နယ် အသင်းရဲ့ ငွေကြေး သုံးစွဲမှုတွေဟာ ရပ်တန့်ဖို့ မရှိသေးဘဲ နောက်ထပ် ကွင်းလယ်လူ တစ်ဦး ထပ်မံ ခေါ်ယူဖွယ် ရှိနေတယ်လို့ သတင်းထွက်နေပါတယ် ၊ အာဆင်နယ် နဲ့ သတင်းထွက်နေတဲ့ ကစားသမားတွေကတော့ ကိုင်စီဒို ၊ ဖိုဖာနာ နှင့် ချူအာမန်နီ တို့ပါ ။
အာဆင်နယ် အသင်း ရဲ့ အမာခံပရိသတ် တစ်ဦး ဖြစ်တဲ့ အစီအစဉ် တင်ဆက်သူ ပီယာစ့်မော်ဂန် ကတော့ တိုက်စစ်မှူး နေရာ အတွက် နာပိုလီ တိုက်စစ်မှူး အိုဆီမန်း ကို ခေါ်ယူဖို့ အကြံပေး သွားခဲ့ပါတယ် ။ ” ဒက်ကလန်ရိုက်စ် ပြိုင်ပွဲမှာ အာဆင်နယ် အသင်း အနိုင် ရသွားတာကို မြင်ရတာ သိပ်ကောင်းပါတယ် ။ သူက အသင်းအတွက် သိပ်ကိုမှ ကောင်းမွန်တဲ့ အင်အား ဖြည့်တင်းမှု ဖြစ်စေမှာ အသေအချာပါပဲ ။ ”
” ဒါပေမယ့် ကျနော်တို့ အနေနဲ့ ဆုဖလား အောင်မြင်မှုတွေ ကြီးကြီးမားမား ရယူချင်တယ်ဆိုရင်တော့ တစ်ရာသီကို ၂၅ ဂိုး နှင့် အထက် သွင်းနိုင်တဲ့ ကမ္ဘာ့အဆင့် တိုက်စစ်မှူးမျိုး ခေါ်ဖို့ လိုအပ်ပါတယ် ။ ကျနော် သာဆို အိုဆီမန်း အတွက် ငွေပုံအော သုံးပစ်မှာပါ ။ ” လို့ ပြောကြား သွားခဲ့ပါတယ် ။
