ချယ်လ်ဆီးကွင်းလယ်ကစားသမား အန်ဇိုဖာနန်ဒက်ဇ်က ရိုးမားအသင်းမှ အာဂျင်တီးနားလက်ရွေးစင်အသင်းဖော် ဒီဘားလားအား ချယ်လ်ဆီးအသင်းထံ ပြောင်းရွှေ့လာရန် မျှော်လင့်ကြောင်း ဖွင့်ဟပြောကြားခဲ့သည်။
ဒီဘားလား (၂၉ နှစ်)သည် ပြီးခဲ့သည့် ၂၀၂၂ နွေရာသီကမှ ဂျူဗင်တပ်စ်အသင်းမှ ရိုးမားအသင်းထံသို့ ပြောင်းရွှေ့လာခဲ့သူဖြစ်သည်။ ၎င်းသည် ရိုးမားအသင်းနှင့် ၂၀၂၅ ခုနှစ်အထိ စာချုပ်သက်တမ်းရှိနေသော်လည်း ယင်းစာချုပ်တွင် ပြည်ပကလပ်အသင်းထံသို့ ပေါင် (၁၀)သန်းဖြင့် ပြောင်းရွှေ့ခွင့်ရှိသည်ဆိုသောအချက်ပါဝင်ကြောင်း သိရှိရသည်။
ချယ်လ်ဆီးအသင်းသည် အသင်းတိုက်စစ်ပိုင်းအတွက် ဒီဘားလားကို ခေါ်ယူရန်စိတ်ဝင်စားနေပြီး ယခုအခါ အန်ဇိုဖာနန်ဒက်ဇ်က ၎င်းကို ချယ်လ်ဆီးအသင်းတွင် မြင်တွေ့လိုကြောင်း ပြောကြားခဲ့ခြင်းဖြစ်သည်။
အန်ဇိုဖာနန်ဒက်ဇ်က “ချယ်လ်ဆီးအသင်းက ဒီဘားလားကို ခေါ်ယူဖို့ စိတ်ဝင်စားနေတယ်ဆိုတဲ့ သတင်းတွေကို ကျွန်တော် ဖတ်ရပါတယ်။ ကျွန်တော့်အနေနဲ့ သူ့ကို ချယ်လ်ဆီးအသင်းဆီ ပြောင်းရွှေ့လာစေချင်ပါတယ်။ ကျွန်တော် သူနဲ့ စကားပြောဖြစ်ပါတယ်။ ချယ်လ်ဆီးအသင်းမှာ လက်ဖက်ရည်အတူတူသောက်ဖို့အတွက် အဖော်တစ်ယောက်လောက်လိုချင်နေတယ်လို့ သူ့ကို ကျွန်တော် ပြောခဲ့ပါတယ်”ဟု Ole သတင်းစာသို့ ပြောကြားခဲ့သည်။
