၂၀၂၃ ခုနှစ် နွေရာသီတွင် ပရီးမီးယားလိဂ်ကလပ်အသင်းများ ရာသီကြိုခြေစမ်းခရီးစဉ်သွားရောက်မည့် ခရီးအကွာအဝေးစုစုပေါင်းမှာ မိုင်ပေါင်း (၉၁၁၇၃)မိုင်ရှိကြောင်း ဗြိတိန်အခြေစိုက် Daily Mail သတင်းဌာနက ဖော်ပြခဲ့သည်။
၂၀၂၃-၂၀၂၄ ရာသီ ပရီးမီးယားလိဂ်ပြိုင်ပွဲ ယှဉ်ပြိုင်ကစားမည့် အသင်းများအနက် (၁၉)သင်းက အင်္ဂလန် ပြည်တွင်း သို့မဟုတ် ပြည်ပနိုင်ငံများသို့သွားရောက်၍ ခြေစမ်းပွဲများကစားမည်ဖြစ်ပြီး ဘုန်းမောက်တစ်သင်းတည်း မည်သည့်နေရာမျှမသွားဘဲ အိမ်ကွင်း၌သာ ခြေစမ်းပွဲကစားမည်ဖြစ်သည်။
ယခုနွေရာသီတွင် ခရီးအဝေးဆုံးသွားရောက်မည့်အသင်းမှာ လန်ဒန်ထိပ်သီးကလပ် စပါးအသင်းဖြစ်ပြီး သြစတြေးလျ၊ ထိုင်းနှင့် စင်ကာပူနိုင်ငံသို့ လာရောက်မည်ဖြစ်သောကြောင့် (၁၃၁၅၇) မိုင်အထိ ခရီးသွားရမည်ဖြစ်သည်။ သြစတြေးလျ၊ အင်္ဂလန်နှင့် ပြင်သစ်နိုင်ငံ၌ ခြေစမ်းပွဲကစားမည့် ဝက်စ်ဟမ်းအသင်းက (၉၂၈၆) မိုင်ဖြင့် ဒုတိယ၊ ဂျာမနီနှင့် အမေရိကန်နိုင်ငံ၌ ခြေစမ်းပွဲကစားမည့် အာဆင်နယ်အသင်းက (၈၉၀၇)မိုင်ဖြင့် တတိယ၊ ဂျာမနီ၊ စင်ကာပူနှင့် အင်္ဂလန်နိုင်ငံ၌ ခြေစမ်းပွဲကစားမည့် လီဗာပူးလ်အသင်းက (၇၉၉၂)မိုင် ဖြင့် စတုတ္ထ၊ နော်ဝေ၊ စကော့တလန်၊ အမေရိကန်၊ အိုင်ယာလန်နှင့် အင်္ဂလန်နိုင်ငံ၌ ခြေစမ်းပွဲကစားမည့် မန်ယူအသင်းက (၇၄၆၄) မိုင်ဖြင့် ပဉ္စမ၊ အမေရိကန်နိုင်ငံ၌ ခြေစမ်းပွဲကစားမည့် ချယ်လ်ဆီးအသင်းက (၆၀၈၈) မိုင် ဖြင့် ဆဋ္ဌမ၊ ဂျပန်နှင့် တောင်ကိုရီးယားနိုင်ငံ၌ ခြေစမ်းပွဲကစားမည့် မန်စီးတီးအသင်းက (၅၈၀၂)မိုင်ဖြင့် သတ္တမခရီးအဝေးဆုံးသွားရမည်ဖြစ်သည်။
ထိပ်သီးအသင်းများအနက် ပြီးခဲ့သည့်ရာသီ ဖလားသုံးလုံးချန်ပီယံ မန်စီးတီးအသင်းက ယိုကိုဟားမားမာရီနို့စ်အသင်းနှင့် ယှဉ်ပြိုင်ကစားထားပြီး ဇူလိုင် (၂၆) ရက်တွင် ဘိုင်ယန်မြူးနစ်၊ ဇူလိုင် (၃၀) ရက်တွင် အက်သလက်တီကိုအသင်းနှင့်လည်းကောင်း၊ မန်ယူအသင်းက လိဒ်စ်၊ လိုင်ယွန်၊ အာဆင်နယ်အသင်းတို့နှင့် ယှဉ်ပြိုင်ကစားထားပြီး ဇူလိုင် (၂၅) ရက်တွင် ဝရက်စ်ဟမ်း၊ ဇူလိုင် (၂၆) ရက်တွင် ရီးယဲလ်မက်ဒရစ်၊ ဇူလိုင် (၃၀)ရက်တွင် ဒေါ့မွန်၊ သြဂုတ် (၅)ရက်တွင် လန်းစ်၊ သြဂုတ် (၆)ရက်တွင် ဘီလ်ဘာအိုအသင်းနှင့်လည်းကောင်း၊ အာဆင်နယ်အသင်းက နုရင်ဘတ်၊ မေဂျာလိဂ် All-stars၊ မန်ယူအသင်းတို့နှင့် ယှဉ်ပြိုင်ကစားထားပြီး ဇူလိုင် (၂၆)ရက်တွင် ဘာစီလိုနာ၊ သြဂုတ် (၂ )ရက်တွင် မိုနာကိုအသင်းနှင့်လည်းကောင်း၊ ချယ်လ်ဆီးအသင်းက ဝရက်စ်ဟမ်း၊ ဘရိုက်တန်အသင်းတို့နှင့် ယှဉ်ပြိုင်ကစားထားပြီး ဇူလိုင် (၂၆) ရက်တွင် နယူးကာဆယ်၊ ဇူလိုင် (၃၀)ရက်တွင် ဖူလ်ဟမ်၊ သြဂုတ် (၂)ရက်တွင် ဒေါ့မွန်အသင်းနှင့် လည်းကောင်း၊ လီဗာပူးလ်အသင်းက ကာလ်ရူဟာ၊ ဂရိုင်သာဖက်တို့နှင့် ယှဉ်ပြိုင်ကစားထားပြီး ဇူလိုင် (၃၀)ရက်တွင် လက်စတာ၊ သြဂုတ် (၂)ရက်တွင် ဘိုင်ယန်မြူးနစ်၊ သြဂုတ် (၇)ရက်တွင် ဒမ်းစတက်ဒ်အသင်းနှင့်လည်းကောင်း ဆက်လက်ယှဉ်ပြိုင်ကစားမည်ဖြစ်သည်။
၂၀၂၃-၂၄ ရာသီ ပရီးမီးယားလိဂ်ပြိုင်ပွဲကို သြဂုတ် (၁၁)တွင် စတင်ကျင်းပမည်ဖြစ်ပြီး မန်စီးတီးနှင့် အာဆင်နယ်အသင်းတို့၏ ရာသီအဖွင့်ကွန်မြူနတီဒိုင်းပွဲစဉ်ကို သြဂုတ်(၆)တွင် ယှဉ်ပြိုင်ကစားမည်ဖြစ်သည်။ ပရီးမီးယားလိဂ်ထိပ်သီးများအနက် လီဗာပူးလ်က သြဂုတ်(၇)အထိ ခြေစမ်းပွဲကစားရန် စီစဉ်ထားပြီး နောက်အကျဆုံးအသင်း ဖြစ်နေကြောင်း တွေ့ရှိရသည်။
ထိပ်သီးအသင်းများ၏ နွေရာသီခရီးစဉ်
စပါး – သြစတြေးလျ၊ ထိုင်း၊ စင်ကာပူ
(၁၃၁၅၇ မိုင်)
အာဆင်နယ် – ဂျာမနီ၊ အမေရိကန်
(၈၉၀၇ မိုင်)
လီဗာပူးလ် – ဂျာမနီ၊ စင်ကာပူ၊ အင်္ဂလန်
(၇၉၉၂ မိုင်)
မန်ယူ – နော်ဝေ၊ စကော့တလန်၊ အမေရိကန်၊ အိုင်ယာလန်၊
အင်္ဂလန် (၇၄၆၄ မိုင်)
ချယ်လ်ဆီး – အမေရိကန်
(၆၀၈၈ မိုင်)
မန်စီးတီး – ဂျပန်၊ တောင်ကိုရီးယား
(၅၈၀၂ မိုင်)
နယူးကာဆယ် – အင်္ဂလန်၊ စကော့တလန်၊ အမေရိကန်
(၄၉၅၀ မိုင်)
