အာဆင်နယ်အသင်းသည် ဘရန့်ဖို့ဒ်အသင်းမှ စပိန်ဂိုးသမား ဒေးဗစ်ရာယာကို ခေါ်ယူရန် စီစဉ်နေကြောင်း သိရသည်။
အာဆင်နယ်အသင်းသည် လက်ရှိအချိန်တွင် အကယ်ဒမီအသင်းမှ ဂိုးသမားနှစ်ဦးကို ခေါ်ယူထားခြင်းအပါအဝင် ဂိုးသမား(၅)ဦးရှိနေသော်လည်း ပထမဂိုးသမား ရမ်းစ်ဒေးလ်ကို ပိုမိုတွန်းအားပေးနိုင်ရန်နှင့် ဒုတိယဂိုးသမားနေရာ၌ ပိုမိုအရည်အသွေးမြင့်သည့် သူကို ထားရှိရန်အတွက် ဒေးဗစ်ရာယာကို ခေါ်ယူရန် စီစဉ်ခြင်းဖြစ်ကြောင်း သိရသည်။
ဒေးဗစ်ရာယာ(၂၇ နှစ်)သည် ၂၀၁၂ ခုနှစ်ကတည်းက အင်္ဂလန်မြေသို့ ရောက်ရှိနေခဲ့သူဖြစ်ပြီး အာဆင်နယ်နည်းပြ အာတီတာက ၎င်းကို ပြီးခဲ့သည့်နှစ်များကတည်းက သဘောကျနေခဲ့ကြောင်း သိရသည်။
လက်ရှိအချိန်တွင် ဒေးဗစ်ရာယာကို ခေါ်ယူရန် ဘိုင်ယန်မြူးနစ်အသင်းကလည်း ကြိုးပမ်းနေပြီး ဘရန့်ဖို့ဒ်အသင်းက စာချုပ်သက်တမ်း တစ်နှစ်သာကျန်ရှိတော့သည့် ကစားသမားအတွက် ပေါင်သန်း(၄၀)အလိုရှိနေကြောင်း သိရသည်။
ဒေးဗစ်ရာယာသည် ဘရန့်ဖို့ဒ်အသင်းနှင့် သက်တမ်းတိုးလိုခြင်းမရှိဘဲ ထိပ်တန်းအသင်းတစ်သင်းသို့ ပြောင်းရွှေ့ရန် ဆန္ဒရှိနေရာ ယခုအခါ အာဆင်နယ်အသင်းက အလားအလာအကောင်းဆုံးဖြစ်လာကြောင်း သိရသည်။
ဘရန့်ဖို့ဒ်နည်းပြ သောမတ်စ်ဖရန့်ခ်ကလည်း ”ကမ်းလှမ်းမှုရရှိဖို့ မျှော်လင့်ပါတယ်။ ကျွန်တော်တို့ ရောင်းထုတ်ဖို့ စောင့်မျှော်နေပါတယ်။ ဒေးဗစ်ကလည်း သွားချင်နေပါတယ်။ ဒါဟာ ကျွန်တော်တို့အတွက် ကောင်းပါတယ်။ သူ့ကို ခေါ်ချင်တဲ့အသင်းက ထိုက်တန်တဲ့စျေးနှုန်းနဲ့ ကမ်းလှမ်းဖို့တော့ လိုပါတယ်”ဟု ပြောကြားခဲ့သည်။
