ဆော်ဒီကလပ် အယ်လ်ဟီလယ်အသင်းသည် နာပိုလီအသင်းမှ နိုင်ဂျီးရီးယားတိုက်စစ်မှူး အိုဆင်မန်ကို ပြောင်းရွှေ့ကြေးယူရိုသန်း (၁၄၀)ဖြင့် ကမ်းလှမ်းလိုက်ကြောင်း သိရသည်။
အယ်လ်ဟီလယ်အသင်းသည် ပြီးခဲ့သည့်ရက်သတ္တပတ်က PSG တိုက်စစ်မှူး ဘာပေကို ကမ္ဘာ့စံချိန်တင်ပြောင်းရွှေ့ကြေး ယူရို သန်း(၃၀၀)ဖြင့် ကမ်းလှမ်းခဲ့သည့်အသင်းဖြစ်ပြီး ဘာပေက ဆွေးနွေးညှိနှိုင်းမှုပြုရန် လက်မခံသည့်အတွက် အိုဆင်မန်ကို ပြောင်းလဲကမ်းလှမ်းခဲ့ခြင်းဖြစ်ကြောင်း သိရသည်။
ဥရောပမီဒီယာများ၏ ဖော်ပြမှုအရ အယ်လ်ဟီလယ်အသင်းသည် အိုဆင်မန်ကို ယူရိုသန်း(၁၂၀)ဖြင့် စတင်ကမ်းလှမ်းပြီး ပယ်ချခံရသည့်အတွက် ယူရိုသန်း(၁၄၀)ဖြင့် ထပ်မံကမ်းလှမ်းခဲ့ခြင်းဖြစ်ကြောင်း သိရသည်။
ဗစ်တာအိုဆင်မန်(၂၄ နှစ်) သည် ပြီးခဲ့သည့်ရာသီက စီးရီးအေဂိုးသွင်းဘုရင်ဆု ရရှိခဲ့သူဖြစ်ပြီး ပရီးမီးယားလိဂ်ထိပ်သီးအသင်းများ၏ ခေါ်ယူရန် ပစ်မှတ်ထားခြင်းခံနေရသူ ဖြစ်သည်။
၎င်း၏ပြောင်းရွှေ့ကြေးကို နာပိုလီအသင်းဥက္ကဋ္ဌ ဒီလော်ရန်တစ်က ယူရိုသန်း(၁၅၀)ဟု သတ်မှတ်ထားသော်လည်း ကမ်းလှမ်းမှုများကို လက်ခံစဉ်းစားသွားမည်ဟု ပြောကြားထားသည်။
အယ်လ်ဟီလယ်အသင်းသည် ပြောင်းရွှေ့ ကြေးယူရိုသန်း(၁၄၀) ပေါင်(၁၂၀.၃)သန်းဖြင့် နာပိုလီအသင်းထံ ကမ်းလှမ်းခဲ့သလို၊ အိုဆင်မန်ကိုလည်း တစ်ပတ်ပေါင်(၁)သန်းဖြင့် ကမ်းလှမ်းခဲ့ခြင်းဖြစ်ကြောင်း သိရသည်။
အယ်လ်ဟီလယ်အသင်းသည် ယခုနွေရာသီတွင် ယူရို(၁၇၈)သန်း သုံးစွဲထားကြောင်း သိရသည်။
