စပါးကွင်းလယ်ကစားသမားသစ် မတ်ဒီဆန်က အသင်းဖော် အင်္ဂလန်တိုက်စစ်မှူး ဟာရီကိန်းအနေဖြင့် ဂျာမန်ထိပ်သီး ဘိုင်ယန်မြူးနစ်အသင်း၏ ခေါ်ယူရန် ကြိုးပမ်းမှုကို ငြင်းဆန်ပယ်ချပြီး စပါးအသင်းတွင်သာဆက်နေရန် မျှော်လင့်နေကြောင်း ပြောကြားခဲ့သည်။
အသက် ၂၆ နှစ်အရွယ်ရှိ အင်္ဂလန်လက်ရွေးစင်ကွင်းလယ်ကစားသမား မတ်ဒီဆန်သည် ယခုနွေရာသီတွင် ပရီးမီးယားလိဂ်မှ တန်းဆင်းခဲ့ရသည့် လက်စတာအသင်းမှ စပါးအသင်းထံသို့ ပေါင် ၄၅ သန်းဖြင့် ပြောင်းရွှေ့လာခဲ့သူဖြစ်သည်။ မတ်ဒီဆန်သည် ဟာ ရီကိန်းနှင့် ရင်းနှီးသည့်သူငယ်ချင်းဆက်ဆံရေးရှိသူဖြစ်ပြီး ၎င်းတို့နှစ်ဦးသည် အားလပ်ချိန်များတွင် ဂေါ့ဖ်ကစားလေ့ရှိကြောင်း သိရှိရသည်။
သို့သော် ဂျာမန်ထိပ်သီး ဘိုင်ယန်မြူးနစ်အသင်းသည် ဟာရီကိန်းအား ခေါ်ယူရန်အတွက် ကလပ်စံချိန်တင်ပြောင်းရွှေ့ကြေး ပေါင် ၈၅ သန်းဖြင့် ကမ်းလှမ်းရန်အသင့်ရှိနေကြောင်း သိရသည်။ ထို့ကြောင့် ယခုနွေတွင် ဟာရီကိန်း၏ စပါးကစားသမားဘဝမှာ ယခုနွေတွင် အဆုံးသတ်ဖွယ်ရှိနေပြီး ဘိုင်ယန်မြူးနစ်သို့ ပြောင်းရွှေ့ရန် အလွန်နီးစပ်နေကြောင်း ဥရောပမီဒီယာများက ဖော်ပြနေကြသည်။
သို့သော် မတ်ဒီဆန်က ၎င်းအနေဖြင့် ဟာရီကိန်းအား စပါးအသင်းတွင်သာ ဆက်လက်ကစားစေလိုကြောင်း ပြောကြားခဲ့ခြင်း ဖြစ်သည်။ မတ်ဒီဆန်က “ကျွန်တော် စပါး ကို မရောက်ခင်ကတည်းက ဟာရီကိန်းနဲ့ သူငယ်ချင်းတွေ ဖြစ်ပြီးသားပါ။ ကျွန်တော်တို့ ဟာ အင်္ဂလန်လက်ရွေးစင်အသင်းတွက် အတူကစားရင်း သူငယ်ချင်းတွေ ဖြစ်လာခဲ့တာပါ။ ကျွန်တော်တို့အနေနဲ့ ဘောလုံးပြင်ပမှာလည်း တူညီတဲ့ စိတ်ဝင်စားမှုတွေ ရှိနေပါတယ်။ ကျွန်တော့်အနေနဲ့ ဟာရီကိန်းကို အသင်းမှာပဲ ဆက်နေစေချင်ပါတယ်။ ကျွန် တော့်အမြင်မှာတော့ ဟာရီကိန်းဟာ လက်ရှိမှာ ကမ္ဘာ့အကောင်းဆုံး နံပါတ် ၉ တိုက်စစ်မှူး ဖြစ်ပါတယ်။ ဘာတွေ ဖြစ်လာမယ်ဆိုတာ မသိနိုင်ပေမဲ့ ဟာရီကိန်းက ပရော်ဖက်ရှင်နယ်အရမ်းပီသသူ ဖြစ်ပါတယ်” ဟု ပြောကြားခဲ့သည်။
နောက်ပိုင်းနှစ်များတွင် စပါးအသင်း၌ ဟာရီကိန်း၏ အနာဂတ်မှာ လှုပ်ခတ်နေပြီး ပြီးခဲ့သည့် ၂၀၂၁ နွေရာသီကလည်း မန်စီးတီးအသင်းထံသို့ ပြောင်းရွှေ့ရန် အလွန်နီးစပ်ခဲ့ကြောင်း သိရှိရသည်။ အသက် ၃၀ အရွယ်ရှိ ဟာရီကိန်းသည် ၂၀၂၄ ခုနှစ်တွင် စပါးအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး ယခုနွေတွင် ဘိုင်ယန်မြူးနစ်အသင်းထံသို့ ပြောင်းရွှေ့မည်ဟု သတင်းထွက်ပေါ်နေခြင်းဖြစ်သည်။
ဟာရီကိန်း၏အပြောင်းအရွှေ့သတင်းများမှာ ယင်းကဲ့သို့ ဆက်တိုက်ထွက်ပေါ်နေသော်လည်း အသင်းအပေါ် သက်ရောက်မှုမရှိကြောင်းလည်း မတ်ဒီဆန်က ပြောကြားခဲ့သည်။ “ဟာရီကိန်းက အလွန်ပရိုပီသသူဖြစ်တာကြောင့် သူ့ရဲ့ အပြောင်းအရွှေ့သတင်းတွေက အသင်းအပေါ် သက်ရောက်မှုမရှိပါဘူး။ ဟာရီကိန်းအနေနဲ့ အသင်းရဲ့လေ့ကျင့်ရေး အစီအစဉ်တွေမှာ ရာနှုန်းပြည့်ကြိုးစားလေ့ ရှိပါတယ်။ အသင်းမှာ သူ့ကြောင့် စိတ်အနှောင့်အယှက်ဖြစ်တဲ့သူ မရှိပါဘူး” ဟု ပြောကြားခဲ့သည်။
