အယ်လ်အစ်တီဟတ်အသင်းမှ ပြင်သစ်ဝါရင့်တိုက်စစ်မှူး ဘန်ဇီမာသည် အယ်လ်ဝယ်ဒါအသင်းအား (၃-၀)ဂိုးဖြင့် အနိုင်ရသည့်ပွဲတွင် ကြွက်သားဒဏ်ရာရရှိခဲ့ကြောင်း အသင်းမှအတည်ပြုခဲ့သည်။ သို့သော် အယ်လ်အစ်တီဟတ်အသင်းမှထုတ်ပြန်ချက်တွင် ဘန်ဇီမာ၏ဒဏ်ရာအခြေအနေနှင့် အနားယူရမည့်ကာလကို အသေးစိတ်ဖော်ပြထားခြင်းမရှိကြောင်း သိရသည်။
အသက် ၃၅ နှစ်အရွယ်ရှိ ဘန်ဇီမာသည် ၄၂ မိနစ်တွင် ဒဏ်ရာကြောင့် ဆက်လက်မကစားနိုင်တော့သဖြင့် ပေါ်တူဂီတိုက်စစ်ကစားသမား ဂျိုတာနှင့် လူစားလဲခဲ့ရသည်။ ၎င်းသည် ယခုနွေရာသီတွင် အယ်လ်အစ်တီဟတ်အသင်းသို့ အံ့အားသင့်ဖွယ် ပြောင်းရွှေ့လာပြီး ရာနှုန်းပြည့်အနိုင်ရသည့် လေးပွဲတွင် တစ်ဂိုးသာ သွင်းယူခဲ့သော်လည်း ကျင်းပပြီးစီးခဲ့သည့် အာရပ်ကလပ်ချန်ပီယံများဖလားတွင် လေးပွဲကစားရာ၌ သုံးဂိုးအထိ သွင်းယူပေးခဲ့သည်။
ဘန်ဇီမာအနေဖြင့် အယ်လ်အစ်တီဟတ်အသင်းနှင့် ဒေါ်လာ သန်း ၂၂၀ ကျော်တန်ဖိုးရှိ နှစ်နှစ်စာချုပ် ချုပ်ဆိုထားခြင်းဖြစ်သည်။ သို့သော် မကြာသေးမီက အသင်းတွင် နည်းပြဖြစ်သူ နူနိုဆန်တိုနှင့် အဆင်မပြေမှုများရှိနေကြောင်း သတင်းများလည်း ထွက်ပေါ်ခဲ့သည်။
ဘန်ဇီမာ အနားယူမည့်ကာလကို မသိရသေးသော်လည်း လာမည့် အယ်လ်ဟီလာအသင်းနှင့်ကစားမည့် ဆော်ဒီဒါဘီပွဲစဉ်ကိုမူ လွဲချော်ရန်သေချာသလောက်ရှိနေသည်။ နေမာကို ခေါ်ယူထားပြီး ဘူနူ၊ ကူလီဘလီ၊ နေးဗက်စ်၊ မီလင်ကိုဗစ်၊ မီထရိုဗစ်၊ မယ်လ်ကွန်စသော ကစားသမားများလည်းရှိနေသည့် အယ်လ်ဟီလာအသင်းသည် လေးပွဲကစားရာတွင် ၁၀ မှတ် ရရှိထားသည်။
