၂၀၂၃-၂၄ ဘောလုံးရာသီ ပရီးမီးယားလိဂ်ပြိုင်ပွဲတွင် အင်္ဂလန်ကစားသမားများ ပွဲကစားချိန် နည်းပါးနေကြောင်း ဗြိတိန်သတင်းစာ Daily Mail က ဖော်ပြခဲ့သည်။ အင်္ဂလန်အသင်းနည်းပြ ဆောက်ဂိတ်သည် လာမည့် နိုင်ငံတကာရက်သတ္တပတ်အတွက် လက်ရွေးစင်အသင်းလူစာရင်းကို ယခုအပတ်တွင် ထုတ်ပြန်ရမည်ဖြစ်ပြီး လူရွေးချယ်မှု၌ အခက်အခဲရှိလာနိုင်ကြောင်း သိရသည်။
နောက်ဆုံးကစားထားသည့် ပရီးမီးယားလိဂ် ပွဲစဉ်-၃ တွင် ပွဲထွက်ကစားခွင့်ရသည့် ၂၂၀ ဦးအနက် အင်္ဂလန်ကစားသမားအရေအတွက်မှာ ၅၇ ဦးသာရှိခဲ့ပြီး ခြောက်ဦးမှာ ဂိုးသမားများဖြစ်သည်။ ယင်းကစားသမားများထဲတွင် အင်္ဂလန်အသင်းကိုယ်စားပြု ကစားဖူးသူအရေအတွက်မှာ ၂၈ ဦးသာ ရှိခဲ့သည်။
Big Six အသင်းများတွင် အာဆင်နယ်အသင်းက လေးဦး၊ ချယ်လ်ဆီးအသင်းက သုံးဦး၊ မန်စီးတီးအသင်းက နှစ်ဦး၊ မန်ယူ၊ လီဗာပူးလ် နှင့် စပါးအသင်းများက တစ်ဦးစီ ပွဲထွက်ကစားစေခဲ့သည်။ ဘရန့်ဖို့ဒ်၊ ဘန်လေ၊ ဖူလ်ဟမ်၊ နော်တင်ဟမ်၊ ရှက်ဖီးယူနိုက်တက်နှင့် ဝုလ်ဗ် အသင်းများမှာ ပရီးမီးယားလိဂ် ပွဲစဉ်-၃ ၌ ပွဲထွက်စာရင်းတွင် အင်္ဂလန်ကစားသမား တစ်ဦးမျှ အသုံးမပြုခဲ့ကြောင်း သိရသည်။
ယခုရာသီ ကစားထားပြီးဖြစ်သည့် ပရီးမီးယားလိဂ် ပွဲစဉ် သုံးပွဲတွင် အင်္ဂလန်ကစားသမားများ၏ ပွဲထွက်ခွင့်ရသည့် ရာခိုင်နှုန်းမှာ ၂၈ ရာခိုင်နှုန်းသာ ရှိခဲ့သည်။ ယင်းအရေအတွက်မှာ ပြီးခဲ့သည့်ရာသီ ပွဲစဉ်-၃ အပြီး ၃၁ ရာခိုင် နှုန်း၊ ၂၀၂၀-၂၁ ရာသီက ၃၆ ရာခိုင်နှုန်းနှင့် နှိုင်းယှဉ်လျှင် ပိုမိုကျဆင်းလာကြောင်း Daily Mail က ရေးသားခဲ့သည်။ အဆိုပါကိန်းဂဏန်းများသည် အနာဂတ် အင်္ဂလန်အသင်းအတွက် သတိပေးခေါင်းလောင်းထိုးသံဖြစ်နေကြောင်း ယင်းသတင်းတွင် ဖော်ပြခဲ့သည်။
အင်္ဂလန်နည်းပြ ဆောက်ဂိတ်အတွက် ပိုမိုစိုးရိမ်ရမည်မှာ နောက်ခံအတွင်းလူရွေးချယ်မှုဖြစ်ပြီး ပြီးခဲ့သည့်တစ်နှစ်နီးပါးအတွင်း နည်းပြစိတ်ကြိုက်ဖြစ်ခဲ့သည့် ငါးဦးအနက် ဘင်ဝှိုက်တစ်ဦးသာ ကျေနပ်စရာအနေအထားရှိသည်။ မန်စီးတီးနောက်ခံလူ စတုန်းစ် နှင့် လိဂ်ချန်ပီယံရှစ်ကလပ် လက်စတာအသင်းသို့ ပြောင်းရွှေ့သွားသည့် ကိုအာဒီမှာ ဒဏ်ရာရနေပြီး မက်ဂွိုင်းရားနှင့် ဒိုင်ယာမှာမူ မိခင်ကလပ်များတွင် ပုံမှန်နေရာပျောက်ဆုံးခဲ့သည်။
မက်ဂွိုင်းရားမှာမူ ပြီးခဲ့သည့်ဇွန်လကတည်းက ပြိုင်ပွဲမကစားရတော့ကြောင်း သိရသည်။ အင်္ဂလန်အသင်းသည် ယူကရိန်းနှင့် ယူရိုခြေစစ်ပွဲ၊ စကော့တလန်နှင့် ခြေစမ်းပွဲများ ကစားမည်ဖြစ်သည်။
